Miteko 1

Owela wa Yeesu

1Mulivurunimwaka yoopacera, Teyofilo, kaalepa mwaha wa sootheene Yeesu aapacenraawe opaka ni oxuttiha 2mpaka nihuku aawelihingwaawe wiirimu, vahoolo wa waalamulela itthu mwa Munepa Wootteela arummwa aathanlalaawe. 3Vahoolo wa ohaawawawe, Owo aahiixoonihera wa atthweene yaale ni aahaaviriyela ni mikhalelo soowaatta weera ori ni okumi. Anniixoonihera wa yaawo ehuhu ya mahuku miloko mixexe, aaleelaka mwaha wa omwene wa Muluku. 4Ehuhu emoha, acaaka vamoha ni yaawo, aahaavaha nlamulo nna: “Muhivenye oYerusaleemu, mene muweherereke yoororomelihiwa ya Atithaka mwa yeeyo kooleenlaakani. 5Vano, Yohaane aapatisa ni maahi, mene eviraka mahuku vakhaani, nyuwo mmwipatisiwe ni Munepa Wootteela.” 6Yaawo yaathukumanne yaamukoha: “Apwiya, ti vaanaano vaava muneeraanyu mukhalihetho omwene wa aYixrayeli?” 7Owo aaweerela: “Khoontthuneya nyuwo osuwela ehuhu, hata nihuku Atiithi alakenlaaya ni ikurusaya aneenaaya, 8mene mmwaakhele ikuru Munepa Wootteela wookhuruwelakani nyuwo ni mmwikhale anamoonaaka oYerusaleemu, oYudeiya wootheene, oSamariya ni mpaka ekotenle elapo.” 9Amalihaka ohima yeeyo, aawelihiwa osulu awosa engwehaka, ni nihutte nimoha naamukhuneela Yoowo moota wooweera khayaamoonnetho. 10Awo yaahala ewehexexaka nnenesene wiirimu Owo awelaka, ni woowaakuveya yaakhumelela variyariwaya axilopwana eeli ewanreene sootteela, 11yaaweerenle: “aGalileiya, heeni nyuwo mungwehexexaanyu wiirimu? Yeesweene Yoowo owelihiwe variyariwanyu wiirimu, anaahokolowe mooteene yoowo ntoko mmoonnaanyu awelaka.”

Othanliwa wa Matiya

12Vano awo yaahokoleela oYerusaleemu, erweelaka omwaako wiitthaniwa Sooliveira, waari vakhiviru wa esidade, wookwanaka ekwaha emoha* ya vaSaabaduni*. 13Ephiyakaru, yaawela empa ya osulu mwemmwe yaakhovelelaaya okhalamo. Aakhalawo Pedru, Yohaane, Yakobe, Andreiya, Filipe, Tomaxi, Bartolomeyo ni Matheyo, Yakobe, mwaana a Alfeyu, Simeyoni nanthiti ni Yudasi, mwaana a Yakobe. 14Ootheene awo yannathukumana ni murima mmoharu mmavekeloni, vamoha ni asithiyana ni Mariya, amayawe Yeesu, ni axunneiye. 15Mahukweene yaale, Pedru aaheemela variyari wa axunna yaari wookwanaka atthu ncira ni miloko miili, 16aweerelaka: “Axunna, waatthuneya weera ekwaniheriwe Yoolempwa* Munepa Wootteela waahimalaaya khalayi ni eyano ya Davide mwaha wa Yudasi, yoowo aahoolenle yaale yaamvanre Yeesu. 17Owo aahooneya ntoko mmoha a hiyo ni aavahiwa mpatta wa muteko ola.” 18Ni ntthuvelo aakhenlaawe wa sootakhalasawe, Yudasi aathuma ematta emoha. Weiwo aamorela vathi ahoolihaka muruwaawe, erutthwaawe yaameyanyeya eriyari, ni marupowaawe yaakhuma. 19Ootheene a oYerusaleemu yaasuwela yeeyo, moota wooweera ni nuulumonaya ematta ele yaahiitthaniwa Akeldama, eyo tiiyo ematta ya ephome. 20Pedru aapwaherera: “Vekhaikhai, elempwale mulivuruni ya icipo: ‘Nipuronawe nikhale mathala, ni ahikhale mutthu aneera amakewo’ nitho: ‘Mukina amorele mutekwaawe.’ 21Tivawo ontthuneyaaya weera nimuthanle mmoha a asilopwana yaari vamoha ni hiyo ehuhu yootheene Apwiya Yeesu yaakhalaaya variyariwahu, 22okhuma opatiso wa Yohaane mpaka nihuku Yeesu aawelihingwaawe osulu variyariwahu. Ontthuneya weera mmoha a yaawo akhale namoona a ovenyererawawe vamoha ni hiyo.” 23Vano yaaweemexa asilopwana eeli: Yoseefe, iithaniwa Barsaba, aasuweliwetho ni nsina na Yustu, ni Matiya. 24Vahoolowaya yaavekela: “Apwiya nyuwo munsuwela mirima sa ootheene. Munoonihere taani a eeli ala munthanlalaanyu, 25weera apwaherere muteko ola wa orummwa, mwa yoowo Yudasi ohiyalaawe arowaka nipuronawe.” 26Yaampaka mwaathanle, ni Matiya aathanliwa. Hiiho owo aahaandyeereriwa wa arummwa muloko nimmoha.

Currently Selected:

Miteko 1: VMK2021

Highlight

Copy