Miteko 10

Kenturiyoni* Korneliyu

1Aakhala oSesareya mulopwana mmoha iitthaniwa Korneliyu, kenturiyoni* a mpatta wa anakhotto oosuweliwa ntoko a wItaliya. 2Owo ni amusaawe ootheene yaari a murima wa omuluku ni yannamoova Muluku. Owo annavaha soovaha sincipale wa muloko wa atthu, ni annavekela wa Muluku. 3Nihuku nimoha, wooxekuwani, owo aahoona moonelo mmoha. Aamoona nnenesene ndyelo a Muluku aamwaattamenle amweerelaka: “Korneliyu!” 4Oowoopihiweene owo aangweha, anamukoha: “Eheeni, Apwiya?” Ndyelo aamwaakhula: “Mavekelowaanyu ni sooveleelasanyu soowela ntoko yooveleela yoowuupuxera ohoolo wa Muluku. 5Vano mwaarumihe alopwana akina a oYope weera emurowele Simeyoni mmoha, oosuweliwatho ntoko Pedru, 6mwa yoowo ophiyenre vaate wa naxapala Simeyoni onkhala vakhiviru wa ephareiya.” 7Apwahaka ndyelo aamuulumenle, Korneliyu aawiitthana eeli a arumeiyaawe ni nakhotto mmoha a murima wa omuluku, mmoha a yaale yaamurumeela, 8ni aathaliheraka sootheene saakhumelenle, aahaarumiha oYope.

Moonelo wa Pedru

9Oxaawaya, nsuwa vamuru, awo yeettaka ni ekhuveelaka esidade, Pedru aawela osulu wa empa weera avekele. 10Avoliweene etala, aatthuna oca. Erehereriwaka yooca, aatthukeliwa ni okomoka. 11Aahoona wiirimu woohuleya, ni etthu yoolikana ntoko ekuwo etokotoko yaakhuruwela vathi etthukiweene maleembe maxexe, 12ereeneno inama sootheene sa nyetto mixexe, soowiipurula sa vathi nitho apalame a wiirimu. 13Vano nsu nimoha naamweerela: “Muvenye, Pedru, mwiive ni mukhuure.” 14Pedrutho aahaakhula: “Hata vakhaani Apwiya! Nkinatoko okhuura etthu yoohitteela, naari yoonanara!” 15Nsu naamweerela emaara yanaaveeli: “Muhiitthane yoohitteela yeeyo Muluku otteelihalaawe.” 16Eyo yaaheereiya imaara tthaaru, ni wootutuxereya ekuwo ele yaahokoloxeriwa wiirimu. 17Pedru atikhinaka etaphulelo ya moonelo ole, alopwana yaarumihiwe ni Korneliyu yaaphwanya empa ya Simeyoni, ni yaaheemela vamulako. 18Yiitthanaka, yaakoha aari weiwo muletto Simeyoni, oosuweliwa ntoko Pedru. 19Pedru nlelo atthokelelaka sa moonelo, Munepa waamweerela: “Simeyoni, asilopwana araru anoowaasani nyuwo. 20Tivawo, muvenye ni mukhuruwe. Muhihovele orowa ni yaawo, niwoko Miyo kaarumihale.” 21Pedru aakhuruwa ni aaweerela asilopwana: “Ti miyo yoowo mummwaasaanyu. Murweenle heeni?” 22Asilopwana yaamwaakhula: “Nirweenle mpatta wa kenturiyoni* Korneliyu. Owo mulopwana oororomeleya ni oomoova Muluku, oottittimihiwa ni muloko wootheene wa aYuda. Ndyelo ootteela aamweerela weera onoowiitthanani owannyawe weera owo iiwe maswaanyu.” 23Pedru aawiitthana weera evolowe, ni aahaavaha nipuro noophiyera. Oxaawaya Pedru aarowa ni yaawo, ni axunna akina a oYope yaamuhoolela.

Pedru vaate wa Korneliyu

24Oxaawaya yaaphiya oSesareya. Korneliyu eera aawehereraka, ni aahaalattula amusaawe ni asinthamwenaawe oosiveleyaxa. 25Pedru avolowaka mpaani, Korneliyu aamukumanano ni aamukokhorela vamanaawoniwawe amulapaka. 26Pedrutho, aamweemexa, eeraka: “Mweemele, miyotho kiri mutthu paahi.” 27Amutthekulakano yoowo, Pedru aavolowa ni aahaaphwanya mwemmwe ethukumanneene atthu ancipale, 28ni aaweerela: “Nyuwo moosuwela nnenesene weera nlamulonahu ninkhoottiha weera muYuda athukumane ni mmalapo, naari omuxekura, mene Muluku ookoonihera weera miyo khawaatthuneya omwiitthana naari mutthu mmoha oohitteela, hoye hoye oonanara. 29Tivawo, kaasaasiwaaka, kirwiiye woohikhootta. Vano, heeni nyuwo muruminghaanyu weera kirweeliwe nno?” 30Korneliyu aamwaakhula: “Wa mahuku maxexe avirale, miyo kaari owaani kivekelaka ehuhuweene yeela ya oxekuwa. Woowaakuveya aakhala ohoolowaka mulopwana mmoha awanreene ikuwo soowaara, 31ni aakeerela: ‘Korneliyu, Muluku ohiiwa nivekelonanyu ni ohuupuwelela soovahasanyu. 32Murumihe weera aroweliwe oYope Simeyoni iitthaniwa Pedru. Owo ophiyenre vaate wa naxapala Simeyoni, onkhala vakhiviru wa ephareiya.’ 33Hiiho kaarumiha oroweliwa woowaakuveya, ni ti wooreera weera nyuwo mohoorwa. Ootheene hiyo nri vamaithoni wa Muluku weera niiwe sootheene Apwiya yoorumalaayani onileela.” 34Vano Pedru aapacera wuuluma: “Vano kinoowera woona weera Muluku khanono nthalu, 35mene Owo oniwaakhulela yaale a miloko sootheene ammoova ni ampaka yeeyo eri ya ekhaikhai. 36Nyuwo moosuwela mutthenga orumihiwe ni Muluku wa muloko wa aYixrayeli, onuuluma sa masu ooreeraxa a murettele mwa Yeesu Kristu, Apwiya a ootheene. 37Moosuwelatho weera masu aalaleiwa oYudeiya wootheene epaceraka oGalileiya vahoolo wa opatiso Yohaane aalaleiyaawe. 38Moosuwela moota Muluku aamuttikitthenlaawe Yeesu ni Munepa Wootteela, ni ni ikuru, ni moota Owo eettaawe ilapo sootheene apakaka itthu sooreera ni aalamihaka ootheene yaale yaalamuliwe ni Diyabu*, niwoko Muluku aari ni Yoowo. 39Hiyo nri anamoona a sootheene Owo aapakaawe mweelaponi mwa aYuda ni oYerusaleemu. Ti Yoowo yaamwiivalaaya, emuthomeyaka vamuttandani. 40Wa soothesene, Muluku aamvenyereriha vanihukuni nanaaraaru, ni aamuweriha weera ooneye, 41ohikhanle wa muloko wa atthu wootheene, mene wa anamoona Muluku aathanlalaawe khalayi, aani aahooniwa ni hiyo, naaciiye ni naawunre vamoha ni Yoowo Owo aavenyerenraawe mookhwaani. 42Owo aanirumihale olaleera muloko wa atthu ni okhalela onamoona weera Owo ti Yoowo Muluku aamukhalihalaawe Mphuki a akumi ni akhwiiye. 43Maprofeeti ootheene animukhalela onamoona Yoowo weera ootheene animuroromela Yoowo, animwaakhela elevelelo ya soottheka mwa Nsinanawe.” 44Pedru nlelo uulumaka masu ala, Munepa Wootteela waahaakhuruwela ootheene yaawo yiiwale mutthenga. 45aYuda aKristu yaarwiiye ni Pedru yaatikhina weera yamahala ya Munepa Wootteela yiittheliwe mpaka wa amalapo, 46niwoko yaawiiwa yuulumaka muulumo ni emuttottopelaka Muluku. Vahoolowaya Pedru aaweerela: 47“Awo ahaakhela Munepa Wootteela ntoko hiyo! Vano, khaawo ongwera owooceeliha weera epatisiwe ni maahi.” 48Aalamulela weera epatisiwe mwa Nsina na Yeesu Kristu. Vahoolowaya yaamvekela Pedru weera akhale ni yaawo mahuku makina.

Currently Selected:

Miteko 10: VMK2021

Highlight

Copy