Miteko 11

Pedru onaakiha opatisiwa wa amalapo

1Arummwa ni axunna a oYudeiya wootheene yaahiiwa yuulummwaka weera amalapotho yaahaakhela masu a Muluku. 2Hiiho, Pedru arowaka oYerusaleemu, yaawo yaari oowiineliwa yaamoothera yeeraka: 3“Nyuwo mwaavolowa mpaani mwa atthu oohiineliwa, ni mwaahooca vamoha ni yaawo.” 4Pedru aapacera waathalihera nnenesene yeeyo yaakhumelenle, eeraka: 5“Kaari musidadeni ya oYope kivekelaka, ni kikomokaka mmunepani, kaahoona moonelo. Kaahoona etthu yoolikana ni ekuwo etokotoko yaakuruxiwa wiirimu, etthukiweene mmaleembeni maxexe, yaarwa mpaka vaavaale miyo kaaraakawo. 6Kaathurumela mpuwa ni kaahoona weera yaakhalamo axinama a nyetto mixexe, axinama a ntuphini, oowiipurula, ni apalame a wiirimu. 7Vano kaahiiwa nsu nimoha naakeerenle: ‘Muvenye Pedru, mwiive ni mukhuure.’ 8Miyo kaahaakhula: ‘Hata vakhaani, Apwiya! Kheenatoko ovolowa mmwaanomwaka etthu yoohitteela, naari yoonanara.’ 9Nsu naahuuluma wiirimu emaara yanaaveeli neeraka: “Muhiitthane yoohitteela yeeyo Muluku otteelihalaawe.’ 10Eyo yaaheereiya imaara tthaaru ni vahoolowaya sootheene saahokoloxeriwa wiirimu. 11Ehuhuweene yeele emoharu, yaaphiya vaate miyo kaaphiyenraaka asilopwana araru kaarumiheliwaaka miyo oSesareya. 12Munepa waakeerela weera kihihovele orowa ni yaawo. Asilopwana athannammosa ala yaakihoolatho, ni naavolowa mpaani mwa mulopwana ole. 13Owo aanithalihera moota ndyelo iixoonihenraawe vaatewawe ni aamweerenlaawe: ‘Murumihe oroweliwa oYope Simeyoni iitthaniwa Pedru. 14Owo anooruuheleni mutthenga oneera woovuluxeni nyuwo ni ootheene a vaatewanyu.’ 15Miyo kipacerakaru wuuluma, Munepa Wootteela waahaakhuruwela yaawo ntoko waanikhuruwenlaaya hiyo ompacereroni. 16Vano kaahuupuwelela yeeyo Apwiya yaahimalaaya yeeraka: “Yohaane aapatisa ni maahi, mene nyuwo mmwipatisiwe ni Munepa Wootteela.” 17Muluku aavanghe yamahaleene yeeyo Owo onivanghaawe hiyo naaroromenlaahu Apwiya Yeesu Kristu, miyo taani oowera omukhoottela Muluku?” 18Yiiwaka yeeyo, yaahiya omukohakoha, ni yaamvuwiha Muluku yeeraka: “Vano Muluku ohaavaha orukunxa murima wa okumi mpaka amalapo asineenaaya!”

Ekerexa ya wAntiyokiya

19Yaawo yaamwaramwareiye niwoko na osoondiwa waapacenre ni okhwa wa Stefano, yaaphiya oFenisiya, oKipro ni wAntiyokiya, yaalaleeraka mutthenga aYuda paahi. 20Wa soothesene, akina a yaawo, yaari atthu a oKipro ni a oKireene, yaarowa wAntiyokiya ni yaapacera wuuluma ni aGregotho, yaathaliheraka masu ooreeraxa mwaha wa Apwiya Yeesu. 21Ntata na Apwiya naari ni yaawo, ni ancipale yaaroromela ni yaarukunxela mirimasaya wa Apwiya. 22Ihaali sa etthweene yeeyo saahiiwanyeiya ni ekerexa ya oYerusaleemu, ni atthu a ekerexa ele yaamurumiha Barnaba wAntiyokiya. 23Owo aphiyaka weiwo ni oonaka mahala a Muluku, aahakalala ni aahaalipihera weera ekhaleke oororomeleya wa Apwiya ni murima wootheene. 24Owo aari mulopwana a murima wooreera, oosareya Munepa Wootteela ni nroromelo, ni atthu ancipale yaarukunxela mirimasaya wa Apwiya. 25Vano Barnaba aarowa oTarso omwaasaasa Sawuli, 26ni amphwanyaka, aamukuxa amuronghaka wAntiyokiya. Hiiho Barnaba ni Sawuli yannathukumana ni ekerexa ya wAntiyokiya, woomalaka eyaakha emoha ni yaahaaxuttiha atthu ancipale. Ti wAntiyokiya oohusera yaapacenraayawo wiitthaniwa aKristu. 27Mahukweene yaale, maprofeeti makina yaarowa ekhumaka oYerusaleemu mpaka wAntiyokiya. 28Mmoha a yaawo iitthaniwa Agabo, aaheemela ni aahima mwa Munepa weera eniikhale etala etokoko mweelaponi yootheene ya oRooma, ni eyo yaakhumelenle ehuhu ya olamula wa Klawudiyu. 29Oohusera yaalakela waakhavihera axunna yaakhala oYudeiya, mutthu ti mutthu yeeyo owo aaweraawe. 30Yaapaka hiiho yaarumihelaka soovahasaya asitokweene a ekerexa mmatatani mwa Barnaba ni Sawuli.

Currently Selected:

Miteko 11: VMK2021

Highlight

Copy