Miteko 16

Timootheyo oniithukumanyiha ni Pawulo ni Sila

1Yaaphiya oDerbe ni vahoolowaya oListra, weiwo aakhalaawewo oohusera iitthaniwa Timootheyo, mwa yoowo amayawe yaari muYuda muKristu ni atithawe yaari muGrego. 2Axunna a oListra ni a wIkoniyo yaamukhalela onamoona wooreera. 3Pawulo atthunaka omurowano, aamwiinela niwoko na aYuda yaakhala elapo ele, woonaka weera ootheene yaasuwela weera atithawe yaari muGrego. 4Wa isidade iye yaaviraaya, yaaleela soolakela sa arummwa ni asitokweene a oYerusaleemu weera aKristu yiiwelele. 5Hiiho ikerexa saalipiheriwa munroromeloni, ni khula nihuku yannaandyeerereya atthu.

Moonelo wa mMasedoniya

6Pawulo ni asikhwaawe yaaheetta elapo ya oFrisiya ni oGalasiya, yooceelihiweene ni Munepa Wootteela olaleiya masu a Muluku elapo ya wAsiya. 7Ephiyaka mmwiinaanoni wa oMisiya, yaaheerera ovolowa oBitiniya, mene Munepa wa Yeesu khawaatthunihenre. 8Vano, yaaviralaaya oMisiya, yaarowa oTrowade. 9Ehuhu ya ohiyu Pawulo aamoona mmooneloni mulopwana mmoha a oMasedoniya eemenleene, amudyoonttelelaka: “Ngwe oMasedoniya ni munikhavihere.” 10Vahoolo wa moonelo ole, naahiireherera woowaakuveya weera nipwahe nirowaka oMasedoniya, nuupuwelaka weera Muluku aaniitthana weera naalaleerewo masu ooreeraxa.

Orukunxa murima wa Lidiya oFilipi

11Nivenyaka oTrowade, naalapuwa munikulani, nirowaka oSamotrasiya, ni oxaawaya oNeyapoli. 12Wa vaavaale naapwaha nirowaka oFilipi, eri esidade etokweene ya elapo ya oMasedoniya yaari yoolamuliwa ni aRooma. Iwe naakhala mahuku makina. 13Wa eSaabadu naavenya osidade nirowaka mukerekhere mooloko, weiwo naawehereraahu ophwanya nipuro na nivekelo. Naakilaathi ni naapacera wuuluma ni asithiyana yaathukumanne weiwe. 14Mmoha a yaawo yiiwale aari muthiyana oomoova Muluku iitthaniwa Lidiya, namathumiha a ekuwo yooxeera a esidade ya oThiyatira. Apwiya yaahula murimaawe weera iiwexexe mutthenga wa Pawulo. 15Apatisiweene vamoha ni yaawo a vaatewawe, owo aanilattula eeraka: “Nyuwo muupuwela weera miyo kiri muKristu, ngwe ni mukhale owannyaka.” Ni hiiho owo aaniviriyela.

Pawulo ni Sila okaliposo

16Nihuku nimoha, nirowaka vanipuroni na nivekelo, naakumanano epottha emoha yaarino munepa mwa yoowo yaatthoma sa ohoolo. Eyo yaawina musurukhu mwincipale wa asineenaaya ni sootthoma. 17Muthiyana owo annamutthara Pawulo ni hiyo, akhuwelaka: “Asilopwana ala ti arumeiyi a Muluku musulusulu ni anoolaleerani ephiro yoovuluxa.” 18Owo aapwaherera opaka yeeyo mahuku mancipale. Ommaleloni Pawulo aanyoonyiwa moota wooweera aarukunuwa, ni aaheerela munepa: “Mwa Nsina na Yeesu Kristu miyo kinoolamulela weera okhume mwa yoowo!” Ehuhuweene yeeyo munepa waamuhiya. 19Esuwelaka weera mootaaya woowina waamala, asineene a epottha yaamvara Pawulo ni Sila ni yaahaapurulela mmuttettheni mutokweene wa esidade mpaka ohoolo wa asitokweene. 20Vano, yaaronghaka wa asitokweene yaaweerela: “Asilopwana ala ti aYuda ni annasesera esidadaahu, 21elaleiyaka ikhovelelo soohitthuniheriwa wa hiyo aRooma waakhulela, naari opaka.” 22Atthu ancipale yaahiithukumanyiha ni soomoothera Pawulo ni Sila, ni asitokweene yaahaalamulela weera eruliwe ikuwosaya ni ewaxuliwe. 23Yaawaxuliwaaya vancipale, yaawaleliwa okaliposo. Namalipelela aahaakhela nlamulo weera aawehawehe nnenesene. 24Aakhelaka nlamulo nne, owo aahaavonyera mpatta wa okaliposo mpuwaxa, ni aahaatthukelela inaawosaya vamukhukuluni. 25Woophiyera ehuhu ya ohiyu eriyari, Pawulo ni Sila yeera evekelaka ni emwiipelaka icipo Muluku. Akina yaatthukiwe yaawiiwa. 26Wootutuxereya waakhala otetereya otokotoko wa elapo, moota wooweera mathipelo a ekaliposo yaattikinyiwa. Woowaakuveya milako sootheene saahuleya, ni onyooro wa ootthukiwa ootheene waakwaseya. 27Namalipelela aavenya, ni oonaka milako sa ekaliposo soohuleya, aatholola ekatana weera iixiive, uupuwelaka weera anamatthukiwa yaatthawa. 28Pawulotho aakhuwela: “Muhipake yeeyo, hiyo ootheene nri muumu!” 29Namalipelela aavekela yoomwaleela, anavolowa atthimakaka ni athukumelaka, anakokhora ohoolo wa Pawulo ni Sila. 30Vano aahaakhumihera vaate ni aahaakoha: “Asitokweene, ontthuneya opaka eheeni weera kivuluxiwe?” 31Awo yaamwaakhula: “Mwaaroromele Apwiya Yeesu ni mmwivuluxiwe, nyuwo ni yaawo a vaatewanyu.” 32Awo yaamulaleera masu a Muluku yoowo ni wa ootheene a vaatewawe. 33Ehuhuweene yeele ya ohiyu ole, namalipelela aahaakuxa ni aarapiha makhwattaaya. Vahoolowaya owo ni awawe ootheene yaapatisiwa. 34Vano aahaakuxa mpaka vaatewawe, aahaarumeela yooca ni aahakalala vancipale vamoha ni ootheene a vaatewawe mwaha wa omuroromela Muluku. 35Oxaawaya, asitokweene yaahaarumiha anakhottwaaya wa namalipelela ni nlamulo nna: “Mwaataphule asilopwana awo.” 36Namalipelela aamweerela Pawulo: “Asitokweene aalamulela weera nyuwo ni Sila mutaphuliwe. Vano munoowera okhuma. Murowe ni murettele.” 37Pawulotho aaweerela anakhotto: “Nri mweeraru nireene hiyo aRooma, awo aaniwaxula mwaatthuni, nihithorihiwe moota wootthuneya, ni yaaniwalela okaliposo. Ni vano antthuna onitaphula hiyo muxiirini? Hoye! Eweeke awo asineenaaya enikhumiheke!” 38Anakhotto yaahaathalihera yeeyo asitokweene, ni awo, yiiwaka weera Pawulo ni Sila yaari aRooma, yaahoopihiwa. 39Yaahoorwa waavarela mwetto ni yaakhumiheraka vaate wa ekaliposo, yaahaavekela weera evenye esidade ele. 40Aakhumalaawe Pawulo ni Sila mukaliposo, yaarowa vaate wa Lidiya, weiwo yaakumannaayawo ni axunna, ni yaahaalipihera mirima. Vano yaapwaha.

Currently Selected:

Miteko 16: VMK2021

Highlight

Copy