Miteko 15

Muthukumano oYerusaleemu

1Alopwana akina yaahoorwa ekhumaka oYudeiya mpaka wAntiyokiya, ni yaahaahusiha axunna yeeraka: “Nyuwo mwaahiineliwe ntoko ekhovelelo yaaxuttihiwe ni Moisesi, khamungwera ovuluxiwa.” 2Pawulo ni Baranaba khayaakhulenle tivawo yaapacenraaya onyakulihanaxa ni yaawo. Hiiho Pawulo ni Baranaba yaathanliwa vamoha ni akina orowa oYerusaleemu, weera yiiwanane ni arummwa ni asitokweene mwaha wa mulattu ole. 3Ekerexa yaahaarumiha ni eviraka oFenisiya ni oSamariya, yaahaathalihera akristu a weiwo moota amalapo yaarukunxalaaya mirimasaya. Ihaali iye saahaahakalaliha vancipale axunna ootheene. 4Ephiyaka oYerusaleemu, yaahaakheleliwa nnenesene ni ekerexa, arummwa ni asitokweene, ni yaahaathalihera sootheene Muluku aapakaawe mmatatanimwaya. 5Vano yaaheemela akina a yaawo yaaroromenle yaari aFarisi*, yeeraka: “Ontthuneya owiinela amalapo ni waanyesereriha weera yiiwelele malamulo a Moisesi.” 6Arummwa ni asitokweene a ekerexa yaathukumana weera yiiwanane mwaha wa mulattu ole. 7Vahoolo wa masu mancipale, Pedru aaheemela ni aaweerela: “Axunna, nyuwo moosuwela weera okhuma khalayi, Muluku ookithanla variyariwanyu weera amalapo yiiwe mmwaanomwaka masu ooreeraxa ni weera eroromele. 8Muluku onsuwela murima aahoonihera weera Owo aawaakhulela amalapo, aavahaka Munepa Wootteela ntoko aanivanghaawe khalayi. 9Owo khanipakenle nthalu hiyo ni yaawo, woonaka weera ootteeliha mirimasaya ni nroromelo. 10Vano, heeni nyuwo muntthunaanyu omweerera Muluku, mwaathatelihaka yoolemela oohusera, mwa yeeyo hata hiyo, naari makholowaahu, khayaawenre ovilela? 11Ohiyanawaya, ninroromela weera noovuluxiwa mwa mahala a Apwiyaahu Yeesu Kristu, ni hiihaawotho awo.” 12Muthukumano wootheene waamaala omwiiwaka Pawulo ni Baranaba yuulumaka sa ineneero ni sootikhiniha sootheene Muluku aapakaawe mmatatanimwaya variyari wa amalapo. 13Emalihaka wuuluma, Yakobe aaweerela: “Axunna, mukiiwe. 14Simeyoni oonithalihera moota Muluku uupuwenlaawe okhuma ompacereroni, othukumanya muloko eriyari ya amalapo mwa Nsinanawe. 15Masu a maprofeeti anaakhulela yeeyo, ntoko elempwalaaya: 16‘Vahoolowaya, nkihokolowe ni nkiteketho eheema ya Davide emonre. Nkiteketho milepesaya ni nkireherere, 17weera yaawo atthu ahanle ewaasaase Apwiya, nitho amalapo ootheene mwa yaawo Nsinanaka niitthaniwaaya, aneera Apwiya ampaka itthu iya 18soosuwanyeya okhuma khalayi.’ 19Tivawo kinuupuwelaaka weera khoontthuneya weera hiyo naaxupe amalapo anrukunxela murimaaya wa Muluku. 20Ohiyanawaya, ontthuneya weera hiyo naalepele, naaleelaka weera ehikhuure inama soonanarihiwa ni miluku sikina, ehiraruwe, ehikhuure inama soonyopotoliwa mmilo, naari ehiwure ephomaaya. 21Vano, okhuma khalayi malamulo a Moisesi aalaleiwa isidade sootheene, esommwaka muSinagogani* khula eSaabadu.”

Ekaratta ya muthukumano wa aKristu amalapo

22Arummwa ni asitokweene vamoha ni ekerexa yootheene yaalakela waathanla akina variyariwaya ni waarumiha wAntiyokiya, vamoha ni Pawulo ni Baranaba. Yaamuthanla Yudasi iitthaniwa Barsaba ni Sila, ahooleli eeli variyari wa axunna. 23Ni yaawo yaarumiha ekaratta enttharelana: ‘Ya axunninyu, arummwa ni asitokweene a ekerexa, wa aKristu amalapo ari wAntiyokiya, oSiriya ni oSilisiya: Salaama. 24Noosuwela weera akina aakhuma variyariwahu nihaalamulenle, ni yaahookacamihani yootutuxakani mmuupuwelonimwanyu ni yeeyo yaahimalaaya. 25Hiiho, nohiiwanana ootheene hiyo waathanla asilopwana akina ni woorumihelani nyuwo vamoha ni axunnihu oosiveleya, Pawulo ni Baranaba, 26mwa yaawo yaalenve okumaaya niwoko na Nsina na Apwiyaahu Yeesu Kristu. 27Tivawo, nnimurumihaahutho Yudasi ni Sila weera yaakhulele ni iyaanosaya yeeyo hiyo ninlepaahu. 28Munepa Wootteela ni hiyo naahiiwanana ohoonyesererani nyuwo ni yoonyesereriha ekina, sihikhanle paahi iyo sootthuneyaxa sinttharelana: 29Muhikhuure inama sooveleeliwa wa miluku sikina; muhiwure ephomaaya; muhikhuure enama ya asinama oonyopotoliwa mmilo, ni muhiraruwe. Mwasemba itthusene seiya, munoopaka nnene. Weera sootheene siweetteleni nnene!” 30Yaaraxenlaaya, asilopwana yaarowa wAntiyokiya weiwo yaathukumannaayawo ekerexa ni awo yaavaherera ekaratta. 31Axunna yaasoma ni yaahakalalela ni maswaaya a olipiha murima. 32Yudasi ni Sila, yaaritho maprofeeti, yaalipihera mirimasaya ni yaahaahakalaliha axunna ni masu mancipale. 33Eviraka ehuhu ekina weiwo, yaaraxeliwa ni axunna ni mareeliho a murettele, weera ehokoleele wa yaawo yaarumihale. 35Pawulotho ni Baranaba yaakhala wAntiyokiya weiwo vamoha ni ancipale akina yaaxuttihaaya ni yaalaleiyaaya masu a Apwiya.

Omwalamwala wa Pawulo ni Baranaba

36Eviraka ehuhu ekina, Pawulo aamweerela Barnaba: “Nihokolowe weera naaxekure axunna a isidade sootheene hiyo naalaleiyaahu masu a Apwiya, weera noone moota itthu sineettaaya.” 37Barnaba aatthuna omukuxa Yohaane iitthaniwatho Marku. 38Pawulotho aahuupuwela weera khawaatthuneya omukuxa ntoko mukhwiinyu, mulopwana owo aahiyale elapo ya oPanfiliya ni ahaapwaherenre okhala ni yaawo mmutekoni. 39Yaakhalano ohiiwanana vancipale moota wooweera yaamwalamwala. Barnaba, amurowanaka Marku, aalapuwa munikulani arowaka oKipro, 40mene Pawulo aamuthanla Sila ni, yaavahereriwa wa mahala a Apwiya ni mavekelo a axunna, enapwaha. 41Vano yaavira oSiriya ni oSilisiya elipiheraka ikerexa.

Currently Selected:

Miteko 15: VMK2021

Highlight

Copy