Miteko 17

Pawulo ni Sila oTesalonika

1Eviraka wAnfipoli ni wApoloniya, yaaphiya oTesalonika weiwo yaaraayawo eSinagoga* ya aYuda. 2Ntoko yaakhovelelaaya, Pawulo aarowa muSinagogani*, ni wa iSaabadu tthaaru aahuuluma ni yaawo sa Yoolempwa*, 3aathaliheraka ni awooniheraka weera waatthuneya Kristu ohaawa ni ovenyerera mookhwaani, eeraka: “Yeesweene Yoowo kinoolaleeraakani, ti Kristu.” 4Akina a aYuda yaaviriyeliwa ni yaamutthara Pawulo ni Sila. Ancipale a aGrego yaamoova Muluku nitho athiyana atokweene ancipale yaamuttharatho. 5aYudatho yaakhala ni nrima. Awo yaahaathukumanyiha akina ootakhala murima variyari wa oohivara muteko, ni ethukumanaka atthu ancipale, yaapacera onyakulihana otokotoko musidadeni. Yaaphiya vaate wa Yasoni emwaasaka Pawulo ni Sila weera yaapurulele eriyari ya atthu ancipale. 6Wa soothesene, ehaaphwanyaka, yaampurula Yasoni ni axunna akina ohoolo wa asitokweene a esidade ekhuwelaka: “Asilopwana awo antannya munyakunyaku elapo yootheene vano aaphiya wenno, 7ni Yasoni oowaakhelela owannyawe. Ootheene awo annavirikanyiha ikano sa Seesari, yeeraka weera ookhala mwene mukina oniitthaniwa Yeesu.” 8Yiiwaka yeeyo, atthu ancipale ni asitokweene a esidade yaakhala ni owali. 9Vano yaalivihiwaaya musurukhu ni Yasoni ni axunna akina, yaahaataphula.

Pawulo ni Sila oBereya

10Moohiyuni, axunna yaamurumiha Pawulo ni Sila oBereya. Ephiyaka iwe, yaarowa muSinagogani* mwa aYuda. 11Atthu a oBereya yaari maneethixa waapwaha atthu a oTesalonika. Yaahaakhela mutthenga ni otthuna otokotoko, esomelaka mahuku ootheene Yoolempwa* weera yoone sootheene saari hiiho. 12Vano, ancipale variyari wa aYuda, athiyana aGrego atokweene ni alopwana, yaaroromela. 13Esuwelaka aYuda a oTesalonika weera Pawulo eera alaleiyaka masu a Muluku oBereya, yaarowa iwe, enaasesera ni enaanyakuliha atthu ancipale. 14Woowaakuveya axunna yaamurumiha Pawulo wa elapo ya ephareiya, mene Sila ni Timootheyo yaahala oBereya. 15Atthu yaarongwe ni Pawulo, yaamuhoola mpaka wAtheena, epwahaka ni malamulo a Pawulo weera Sila ni Timootheyo ekumane ni yoowo, wawereya okhale woowaakuveya.

Pawulo wAtheena

16Aawehereraka awo wAtheena, Pawulo aanyoonyiwa vancipale mmunepanimwawe woowoona weera esidade yaasareya miluku sikina. 17Tivawo mahuku ootheene annuuluma muSinagogani* ni aYuda, ni ni aGrego yaamoova Muluku, nitho aahuuluma mmuttettheni mutokweene wa esidade ni yaale yaaphwanyaneya weiwe. 18Asuweli akina a Epikuro ni a mahusiho a Estoyika yannatthekula ni Pawulo. Akina yaakoha yeeraka: “Eheeni ontthunaawe ohima, namatipura ola?” Akina yaaheera: “Nnoona ntoko owo onlaleiya miluku sa anamarwa,” niwoko Pawulo aalaleiya masu ooreeraxa mwaha wa Yeesu ni wa ovenyerera. 19Yaamukuxa ni yaamurongha omuthukumanoni wAreyopago*, yaamukonghaaya: “Nihusiho heeni nnyowani nyuwo munlaleiyaanyu? 20Nyuwo munoonihera miruku sikina soohisuwanyeya, ni nintthuna osuwela sintaphulelaaya iyo.” 21Vano, atthu a wAtheena ni anamarwa yaakhala weiwo, yaavira ehuhuwaaya yiiwaka ni ethalihaka mahuku ootheene miruku sinyowani soopwahaxa. 22Vano Pawulo aaheemela vamuthukumanoni wAreyopagu* ni aaweerela: “Atthu a wAtheena! Kinoona weera nyuwo munnasivela vancipale ottittimiha miluku, 23niwoko keettaka musidadenimwanyu kooweha nnenesene icaambulosanyu sa ediini, ni koophwanyatho nipuro na ecaambulo ekina ni yoolempwa ela: WA MULUKU OOHISUWANYEYA. Moone miyo kinoolaleerani Yoowo nyuwo munimulapaanyu muhimusuwelaka. 24Muluku opanke elapo ya vathi ni sootheene siri mwemmo, ti Apwiya a wiirimu ni a elapo ya vathi, ni Owo khammaka impa soopakiwa ni atthu. 25Owo khanrumeeliwa ni matata a atthu ntoko ahaawelaka etthu, niwoko Owo muneenaawe omvaha okumi, omumula ni sootheene wa ootheene. 26Muluku aampanke mutthu mmoha paahi, ni wa yoowo sookhumelela miloko sootheene sa atthu sinkhala mweelaponi yootheene. Aari Yoowo akhalihale ihuhu ni mapuro miloko saatthuneyaaya omaka. 27Aapaka yeeyo weera emwaasaase naamwi waatthuneya omwaapaapela, hata ahirakamenle wa khula mutthu a hiyo. 28Vano, mwa Yoowo hiyo nri ni okumi, nineetta ni ninkhala, ntoko yeenraaya akina a anamaswaanyu ooreera: “Hiyotho nri a ekhapiraawe.” 29Nireene hiyo a ekhapira ya Muluku, nihuupuwele weera Muluku onlikana ni icaambulo sa iyuuma soorikaxa, naari sa maluku, soopakiwa ni eruso, naari soowuupuwela sa mutthu. 30Ehuhu evinre Muluku khaalikelenle ohisuwela iwo, mene vano onlamulela weera mmapuroni moothemwene, ootheene erukunxe mirimasaya. 31Aakhaliha nihuku nimoha Owo aneeraawe athorihe elapo ni ekhaikhai mwa Mulopwana omuthanlalaawe. Ni ohoonihera yeeyo wa omutthu wootheene, woomuvenyereriha Mulopwana Owo.” 32Yiiwaka sa ovenyerera wa anamakhwa akina yaamveiha, ni akinatho yaaheera: “Mwaha wa yeeyo, nnimwiiwe ehuhu ekina.” 33Mwa yeeyo Pawulo aahiivenxa variyariwaya. 34Alopwana akina yaathukumana ni yoowo ni yaaroromela. Variyariwaya aari Diyonisiyo, a wAreyopagu*, nitho muthiyana mmoha iitthaniwa Damari, ni akina vamoha ni yaawo.

Currently Selected:

Miteko 17: VMK2021

Highlight

Copy