Arumi 9

Muungu na antu vakwe

1Ngurëghëtya tutë mukhatë amwa Kiristo, ntiurëghetya weegheghe dhamiri anë ëgunsudangëa mukhatë a Mwahu Mweru, 2mwino nëna simba ino na mauvavi nëëtiuhiraa munkhoo ane. 3Gusoko naangudaha uromba nene mughonjo nëtendwe ntinoneye na utamanuwa na Kiristo gusoko a vaunaanë, antu va umwaango wanë gwa njëa a untu, 4na vasaa unë Vaisiraeli, nëvatendiwe vana, na uküü wasuu, na maraghano, na ufewa Seria, na ikuryo ra Muungu, na maraghano akwe, 5vasaa vakuku unë vawe, na mukhatë a vasaa agadua Kiristo gwa njëa a mwëërë. Wasuu unë wëë gunto a mantu oong'e, Muungu nëugukuriwaa khae na khae. Amina. 6Ti mwino ukhani wa Muungu wakhaanëkëkaa. Gusoko vëtiutendeka voong'e Vaisiraeli nëva ufafo wa Isiraeli. 7Ëgweeso noo vëtiutendeka voong'e vana gusoko va ufafo wamwa Iburahimu, ëgweeso, Mukhatë amwa Isaki ufafo wako ugutaanwa, 8uvii, ti vana va mwëërë nëvaye vana va Muungu, ëgweeso vana va iraghano ëroo vaye mwino chuu ufafo. 9Gusoko ukhani wa iraghano uu në tuuru, Gwa itungo ërëë nëjie, na Sara ugutendeka wina mwana. 10Na tëësa uvii gutufu, ëgweeso Rebeka noo, nëwawucha wiito gwa mughosya umwe, mweeso unë Isaki, tata witu. 11Gusoko nënaa ëkëë vinafafwa vana vasaa, na nënaa ëkëë vinatenda ukhani në uja mbesa në ubë, gusoko ëmëke ndolyo a Muungu a uhwaania, ti gusoko a ntendo, ëgweeso gusoko a mafenji akwe nëugutaana. 12Agakhanëwa vii, “Në müküü ugumutumamëa në munyuughuu.” 13Mwino gwandëkiwe, “Namuyanjaa Yakobo, ëgweeso Esau namusidaa.”

14Uvii guhanye wurëhe? Gutina tutë kunë Muungu nahë? Ti uvii! 15Gusoko ugumwëëra Musa, “Naumufa majëghana wasuu nëngumufa majëghana, ngumwoonëa uvavi wasuu nëngumwoonëa uvavi.” 16Uvii, nësa në uvii, ti mu udaho wa wasuu nëugufenja, na ti gwa wasuu nëugikunkunyaayaa, ëgweeso gwa wasuu nëuguforyaa, unë Muungu. 17Gusoko maandëko ëgumuhanya Farao, mwino, “Naangagwimëcha gusoko ëyëë, gusoko nëraghëëre daaji nguu yanë kunë vee, rina ranë rëtanantiwe mung'e oong'e.” 18Uvii, nësa chu uwuu, wasuu në Muungu wayanjaa umwoonëa uvavi ugumwoonëa uvavi, na wasuu nëwayanjaa umutenda atende wëë gëdëda, ugumutenda atende wina nkhoo nkaku.

Ikuwo nanë gëhe ga Muungu

19Nyenye mwinjë uhanya kunë nene vii. Gusokokë këë mweeso ugufenja ihondo? Gusoko u nyanyu nëugudaha uyahita mafenji akwe? 20Aa! ti uvii, vee Mwaamuntu, veve uu wëë nyanyuhe nëugikunguma na Muungu? 21Namba muumbi wurë? atina udaho wa utumëa irongo mwino uyanjëte, gwa irundo rëmwe ra irongo na guumba gëfë gëmwe gëtende ga ukumu, na gëmwe getende sa gëtina ukumu?

22Uu ntunihe uvii, nësa Muungu gwa ufenja uraghëëra ikuwo rakwe, na uwudwëëya udaho wakwe, gwa ughimëëya avoo unë naa ilengo ra ikuwo rakwe, nënaa vënoneye guuraghwa. 23Kangë agafenja noo ukunukua wingë wa uküü wakwe unë wagufee sese në gwë ilengo ra gëhe gakwe sese unë, wadahie uguning'anëya uwughenyifa uküü wakwe. 24Uunë sese avoo nëwaataanie ti ufuma mukhatë a Ayahudi gutufu, ëgweeso ufuma gwa antu va Ndughu ingëja noo? 25Uu mwino chuu agahanya mukhatë amwa Hosea,

“Nguvataana antu vanë vasaa

në ti antu vanë,

Na muyanjwi wanë wasuu

në ti muyanjwi wanë.”

26“Kangë ëgutendeka afoo nëvëgëërwa,

‘Nyenye muti antu vanë,’

Faafo vëutaanwa ‘vana va

Muungu në mufanga.’”

27Isaya noo uguduya ruri wakwe kunë Isiraeli, uguhanya,

“Uvaryo va vana va Isiraeli, mbesa

wëë mwino mahangahanga a irambo,

uunë usagho wawe gutufu nëvëutywewa.

28Gusoko Müküü ugutenda mwino

ukhani wakwe gunto a ng'ë,

uguudaha na uramua.”

29Kangë mwino Isaya agatongeera uhanya,

“Nësa Müküü wa maumbë ainagurekeaa ufafao,

Sa gwëë mwino Sodoma,

naagugikhoriwa na Gomora.”

Isiraeli nanë Sayu Njija

30Uvii, guhanye ntunihe? Mwino antu va Ndughu, nëvëtiumëhongaa tutë vamëhangie tutë, ëgweeso unë tutë ëyoo në a uhuvëi, 31ëgweeso Isiraeli nëvamëhonga seria a tutë vinamëfikëaa seria ëyoo. 32Gusokokëhe? Gusoko vinamëhongaa gwa njëa a uhuvëi, ëgweeso mwino gwa njëa a ntendo. Vëgakuumëa gunto a igwe ëroo ra ugwësya, 33mwino yiandëkiwe,

“Raraava, nguvëka mu Sayuni

igwe ra ugwësya, na italaghwe

nërëuvatendaa antu vëgwe!

Na muu muntu nëumuhuvëe

atiuviriwa mënyaa.”

Currently Selected:

Arumi 9: RNT

Highlight

Copy