Arumi 10
10
1Vaunaanë, nëngufenja nanguu munkhoo anë, na irombi ranë nëngumurombaa Muungu, unë gusoko Ayahudi, vëdahe utyowa. 2Gusoko ngumusudangëa mwino vina wikunkunyayi wa umufenja Muungu, ëgweeso wikunkunyayi usuu utijengiwe mwihaa. 3Gusoko, vëtimëmanyie tutë a Muungu, na gwa ufenja uraghëëra daaji tutë awe veeso aghonjo, vinagetoa fana tutë a Muungu. 4Gusoko Kiristo unë mpeo a Seria, gusoko mu muntu nëuhuvëe avarëywe mwino munya tutë.
Ukhomoi gwa antu voong'e
5Gwa uyanjëka usonge akwe Muungu gwa umëkwatëëra seria, Musa agaandëka mwino, “Muntu nëugutendaa uvii uguduva gwa njëa ësëë.” 6Ëgweeso tutë ëyoo nëëguhangëkaa gwa uhuvëi ëguhanya vii, “Utahanyee munkhoo ako, Uu anyu nëugunatëa gwenda girunde? (uvii, unë umusimia Kiristo fang'ë), 7mbesa, Uu anyu nëugutununtu faka gwa arungu? (uvii unë umweeta Kiristo gunto ufuma gwa akuyi.)” 8Ëgweeso Maandëko në Meru ëguhanya wurëhe? Ukhani uroo wëë fifë navee mu moomo wako, na munkhoo ako, unë ukhani uroo wa uhuvëi nëguuwutanantyaa. 9Gusoko, nëwamukumua Yesu gwa moomo wako mwino unë Müküü, na uhuvëa munkhoo ako mwino Muungu agamufëtya mu akuyi, ugutyoeka. 10Gusoko gwa nkhoo muntu uguhuvëa nautendwa ayanjëke usonge a Muungu, gwa moomo ugukumua na uhanga utyoi. 11Gusoko andëko rëuhanya, “Mu muntu nëumuhuvëe atiuviriwa mënyaa.” 12Gusoko gutie utemanui mukhatë a Muyahudi na Muyunani, gusoko mweeso uyuuyo unë Müküü wa voong'e, munya ughwarë gwa voong'e nëvëumutaanaa, 13Gusoko, “Mu wasuu nëuguromba gwa rina ra Müküü ugutyoeka.” 14Uvii, antu vëumuromba wurëhe wasuu nëvëtimuhuvëe? Kangë vëumuhuvëa wurë wasuu nëvina mutegheeyaa? Kangë vëumutegheeya wurë nëgutie mutanantii? 15Kangë vëutanantya wurë, nëvadëa utowa? Mwino yiandekiwe, “Uu mëja mwino ntuni mëghuu awe nëvëutanantyaa Sayu Njija!”
16Ëgweeso ti voong'e nëvëgamëghenyifa Sayu Njija ëyoo. Gusoko Isaya uguhanya “Mukuu, u anyu nëagayihuvëa sayu yitu?” 17Uvii uhuvëi, gëandëyo gayo unë utegheeya na utegheeya gujaa gwa ukhani wamwa Kiristo. 18Ëgweeso nene nguweya, Wurë! Veeso vinategheeyana? Nhaa, vategheeye,
“Ruri wawe wakundanëe
mu urëmi woong'e,
Na nkhani yawe yafikie
faka mpëo a urëmi.”
19Ëgweeso nene nguwëëya, Wurë! Vaisiraeli vënamanyaana? Mwandyo Musa uguhanya:
“Nene ngumutenda muvaonëe wiru
antu në ti ndughu,
ngumutenda mutende mwina ikuwo
gwa ndughu ra antu në afutu.”
20Na Isaya ugusoya mbesa uhanya,
“Avoo nënaa vëtiumpenjaa nene,
vëgang'anga,
Nëgadwëëra kunë vasaa nënaa
vëtiguurëyaa sayu yanë.”
21Ëgweeso gwa Isiraeli uguhanya,
“Mumwë woong'e nëgavaghoorëa
mëkhono anë antu nëvandekie na
në vëë matwe makaku.”
Currently Selected:
Arumi 10: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.
