Arumi 11

Mwino Muungu uguvaonëa uvavi Isiraeli

1Uvii, nene nguwëëya, Wurë! Muungu waajughutye kureengë antu vakwena? Mba nduvë! Gusoko nene mughonjo në Mwisiraeli, umwe wa ufafo wamwa Iburahimu, na muntu wa ndughu akwe Benjameni. 2Muungu inavasusutëëyaa kureengë antu vakwe nëwaamanyie ufuma mwandyo. Namba mutimanyie ayoo nëahanyiwe na maandëko nëëgumuhanyaa Eliya? Mwino agamunena Muungu hiya na Vaisraeli, 3“Müküü, vavooraghie anyagëdaghu vako, vayakhonontie masabahu ako, nene nasaghaa nëmwenedu, veeso noo vëufenja nkhoo anë.” 4Ëgweeso Muungu agamusucha wurë? “Nivëkëye antu maghana a njou ëmufungatë nëvëtiutungamaa usonge amwa Baali.” 5Uvii, gwë vii gwa itungo ërëë, rërëfo isabu ra avoo nëvësighai në Muungu wavahwaaniye gwa mboto akwe. 6Ëgweeso nësa gwa mboto, ëtiutendeka gwa ntendo kangë, nësa uvii mboto ëtiutendeka mboto.

7Itungwee wurë? Antu va Isiraeli vinagëhangaa ëkoo nënaa vëugëfenja, ëgweeso avoo nëvahwaaniywe vëgagehanga. Vangëja vëgatuatëywa. 8Mwino ëandëkiwe,

“Muungu agavafa nkhoo ya gitunëkëa,

nanguu na miho mbesa vëdëe goona,

na matwë mbesa vëdëë utegheeya,

faka itiku ërëë ra rëo.”

9Na Daudi uguhanya:

“Mesa yawe na itende mpëto

na muteegho,

Na intu ra ukhankukwa,

na marëfo awe.

10Miho awe ëtendwe kiti

gusoko vëdëe goona,

Uvabeda mëghongo awe

matiku oong'e.”

11Uvii nee nguhanya, Wurë! vakhankukiwe faka ugwa chookuuna? Mba nduvë! Ëgweeso gwa ihutye rawe utyoi wawafikëe antu va ndughu ingëja, gusoko veeso aghonjo vëdahe uvaonëa wiru. 12Uvii, nësa ihutye rawe ratendekie ughwarë wa urëmi, na utuki wawe watendekie ughwarë wa ndughu, wurë? ti daaji nanguu ukhamu wawena?

Ukhomoi wa ana Arëmi vangëja

13Uvii, itungwee nene gurighëëtya na nyenye antu va Anarëmi vangëja. Itungo në nene natendekie në mutumwa wa antu va ndughu ingëja, nguukuryaa utumami në wanena? 14Fangëja ngudaha uvatenda vitende vina wiru vasaa në vëë saghami ëmwedu na nee na uvatyoa vangëja mukhatë awe. 15Gusoko nësa uhitwa kunë veeso gwasachiye urëmi ukhuvëywe na Muungu, wurë! guutendeka wurë itungo nëvayanjwa nësa ti ufanga nëvakuya.

16Nësa utu nëuhangënkhaniwe na majë itambëëmwe na changa nëwadwëëywe mwino nkhari ya mwandyo në weruchwë, uvii në ibumu roong'e ryeruchwe. Na nësa murie në weruchwë, uvii në masanja meruchwë. 17Ëgweeso nësa makhanja angëja atemiwe, na veve museituni wa gihaka naa waghombewe mukhatë ayo, watendeka wina ukhuvëi na itina ra museituni na ughinu wakwe, 18Utaje wikuryee gusoko a makhanja asaa, mba ugikurya, ti veve nëurëkweti itina, ëgweeso unë itina nërëgukweti veve. 19Uvii uguhanya, “Makhanja ayoo atemiwe gusoko nene nëhembekwe.” 20Vija: Atemiwe gusoko inahuvëaa, na veve wimëkie gwa uhuvëi wako. Utagitendee, ëgweeso wooghofe. 21Gusoko në chu Muungu inayaonëa uvavi makhanja a ntundo, wurë, ugughema uguguonea uvavi vevena! 22Uvii, raraava, uja na ukharë wa Muungu, Mweeso unë mukharë gwa avoo në vëugwa nanë muja kunë veve nësa ugufwaghëëra mu uja wakwe, nësa ti uvii, veve noo ugutemwa. 23Na vasaa noo, nëvadëa gëkhaa gwa udëa uhuvëa vëuhembekwa, gusoko Muungu udahëte uvahembeka kangë. 24Gusoko nësa veve ugatemwa waheyiwa mu museituni, në museituni wa gihaka gwa ntundo ayo, na wahembekwa, ti mwino ntundo, mu museituni në uja, ti ukëra nanguu ino vasaa në vantundo udaha uhembekwa mu museituni veeso aghonjo.

Utyoeka gwa Isiraeli Gëhe ga Muungu gwa antu voong'e

25Gwa uvii, vaunaanë, ntiufenja mudëe umanya gëmpihë ëkëë, gusoko mutaionee mwino mwanya mahaa, gwëë vii gwa uvaru rumwe ukaku waahangie Isiraeli, faka antu va ndughu ingëja vëdahe umufikëa Muungu. 26Uvii Isiraeli voong'e vëutyoeka, mwino yiandëkiwe,

“Mutyoi ujie ufuma u Sayuni,

uguuheya uvë wamwa Yakobo.

27Na ërëë unë iraghano ranë gënaawe,

Itungo nënguaheya mahutye awe.”

28Uvii, gwa Sayu Njija vatendekie arughu gusoko anyu, ëgweeso gwa sayu a uhwaaniwa vatendekie ayanjwi gusoko a vaa tata vitu. 29Gusoko vifewa vya Muungu vitikweti wighondi, mbesa utaanwa. 30Gusoko nësa nyenye khae mugamureka Muungu, ëgweeso itungwee mwahangie gëhe gakwe ufuma na ureki wawe. 31Vii uvii avoo vamurekaa Muungu itungwee, gusoko gwa nyenye goonewa uvavi veeso noo vëonewe uvavi. 32Gusoko Muungu wavatungie voong'e itambëëmwe mu uwurya ikuryo vii adahe uvaonea uvavi voong'e.

Muungu akuriwe

33Ughwarë, ihaa nanë umanyi wa Muungu unë uküü ino! Uramui wake utiumanyëkaa, mbesa njëa yakwe itiuhangëka! 34Gusoko uu anyu nëumanyie isëgho ra Mukuu? Mba uu anyu nëagatenda musëyi wakwe? 35Mba u anyu nëagamufa mweeso intu mwandyo, na mweeso noo ujie urëfwa kangë? 36Gusoko mantu oong'e ëfumie kunë mweeso, ërëfo gwa udaho wakwe, kangë ëgusuka kunë mweeso. Weru utende wëë kunë mweeso khae na khae! Amina.

Currently Selected:

Arumi 11: RNT

Highlight

Copy