Arumi 8

Uduva gwa nguu ya Mwahu Mweru

1Gwa uvii, itungwee gutie iramwuwa ra mahuttye gwa avoo në vee mukhatë amwa Kiristo Yesu. 2Gusoko seria amwa Mwahu wa ufanga uroo nëwëë mukhatë amwa Kiristo Yesu ampee uhaghaaro, sya na seria a ihutye na ikuya. 3Soko asaa nëëtiudahëka gwa seria, gusoko mwino naa a ulegheku wa mwëërë, Muungu, gwa umutuma Mwanakwe mughonjo gwa nyinkhori a mwëërë në wa ihutye, na gwa gusoko a ihutye, agarëramuëya ihutye mukhatë a mwëërë, 4gusoko maraghëëyo nëënoneye a seria ëkhondeke mukhatë itu sese, nëgutigweenendaa gwa uhonga mantu a mwëërë ëgweeso mantu në ankhoo. 5Gusoko vasaa nëvëuhongie mwëërë vëuyasëghanëyaa mantu a mwëërë, ëgweeso vasaa nëvëmëhongie nkhoo vëuyasëghanëyaa mantu a nkhoo. 6Gusoko mafenji a mwëërë unë ukuya, ëgweeso mafenji a nkhoo unë ufanga nanë majëghana. 7Gusoko mafenji asaa a mwëërë unë urughu kunë Muungu, gusoko ëtiumëhongaa seria a Muungu, kangë ëtiudaha umëhonga. 8Vasaa nëvëuwuhongaa mwëërë vëtiudaha umuyanjisya Muungu. 9Ëgweeso nësa Mwahu wa Muungu ugëkhaa mukhatë anyu, nyee mutiuwuhonga mwëërë, ëgweeso mumëhongie nkhoo. Ëgweeso muntu gëkaku nëatikweti Mwahu wamwa Kiristo, wasuu ti wakwe. 10Na Kiristo nëwaa wë mukhatë anyu mwëërë wanyu ukure gusoko a ihutye, ëgweeso nkhoo anyu uunëmpanga, gusoko a tutë. 11Ëgweeso nësa Mwahu wakwe wasuu nëagamufëtya Yesu mukhatë a akuyi ugikhaa mukhatë anyu, mweeso nëwamufëtiye Kiristo Yesu mukhatë a akuyi ugumëtenda mëfanga na mëërë anyu në ëmuikuya, gwa Mwahu wakwe nëugikhaa mukhatë anyu.

12Uvii, nësa uunë uvii, mbuyane, gwanya hirë, ti wa mwëërë guduva gwa uhonga mantu a mwëërë, 13gusoko nësa muuduva gwa uhonga mantu a mwëërë muufenja ukuya, ëgweeso nësa muuyiuragha ntendo ya mwëërë gwa Mwahu muuduva. 14Gusoko voong'e nëvëutongeerwaa na Mwahu wa Muungu, vasaa unë vana va Muungu. 15Gusoko mwinaghenyifaa kangë nkhoo a utugwa nëëgeetaa choghofi, ëgweeso mwaghenyifiee nkhoo autendwa vana, në gwa ësëë gugëëra, Tata Matunda. 16Mwahu mweeso ugusudangëaa itambëëmwe na nkhoo yitu, mwino chu sese gwë vana va Muungu, 17na nësa gwë vana, uvii, gwë asai, asai va Muungu, nëvëusaa itambëëmwe na Kiristo, nhaa, nëgwakhasiwa itambëëmwe na mweeso gusoko gudahe na ukuriwa itambëëmwe na mweeso.

Weru nëküü nëujie

18Gusoko nguyoonaa makhasëko a itungo ërëë mwino ti gëntu mwino weru nëküü wasuu nëujie ukunukuwa kunë see. 19Gusoko ntundo yoong'e noo yiindëe gwa nkumbu ino ukunukwëëywa gwa vana va Muungu. 20Gusoko ntundo oong'e noo yatendewe mu ufaghato, ti gwa iyanje rakwe, ëgweeso gusoko akwe mweeso nëagayitendea mu tutë nëërëfo, 21gusoko ntundo ayo njeesoo nooëjie utendwa muuhaghaaro na udwëëywa mukhatë a utughwa wa ufaghato, faka vingëe mu uhaghaaro wa weru nëukuu wa vana va Muungu. 22Sese gumanyie ntundo yoong'e yiurëa gwa uvavi mu uhungu itambëëmwe faka fanoi ukharë itambëëmwe faka itungwee. 23Ëgweeso noo ti uvii gutufu, ë ngwë nanë sese aghonjo nëgukweti nkhari ya mwandyo Mwahu, guurua munkhoo yitu, guraraavie mwino gwëndëë utendwa vana unë ukhomoi wa mëërë witu. 24Gusoko gwatyowe gwa ndolyo, ëgweeso intu nënaa rëë mundolyo nëradwëëra gutie ndolyo kangë. Gusoko anyu nëuguriindëëraa intu rasëë nëurëgunehe? 25Ëgweeso intu nëgwina ndolyo aurëona nëëkëë gwinaaurëona, gurindëëre gwa ughimëëyi.

26Viuyi viuyi Mwahu mweeso ugugwaarëëya mu ulegheku witu. Gusoko gutimanyie uromba mwino ënoneye, ëgweeso Mwahu mughonjo ugugurombeaa gwa gëëro ga uvavi nëutiudaha ugëdona. 27Na mweeso nëugoona faka mukhatë a nkhoo ya antu umanyie isëgho ra Mwahu mwino rërë, gusoko uguvarombeaa antu va Muungu gwa uhonga mafenji a Muungu. 28Seenoo gumanyie mwino mukhatë a mantu oong'e Muungu ugutendaa mwëmo itambëëmwe na vasaa nëvëmwanjëte gwa uvafa në maja, uunë vasaa nëvataaniwe gwa mafenji akwe. 29Gusoko vasaa nënaa uvamanyie ufuma mwandyo, agavahwaania ufuma mwandyo vëdahe gëkhwa na Mwanakwe, uvii Mwana atende mufafwa wa mwandyo mukhatë a aruna vingë. 30Na vasaa nëagavahwaania udua mwandyo, vasaa agavataana, na vasaa nënaawaatanie, vasaa agavatenda vëtendeke vëë fana tutë, na vasaa nënaa vëë fana tutë, vasaa agavakurya.

Uyanjo wa Muungu mukhatë amwa Yesu Kiristo

31Uvii, guhanye ntunihe gwa asaa? Muungu nësa wëëguuvaru witu, uu anyu në wëë gunto itu? 32Mweeso nëinamurekeaa Mwanakwe mughonjo, ëgweeso agamuduya gusoko itu sese soong'e, ugudëa wurë ugufa mantu oong'e itambëëmwe na mweeso? 33Uu anyu nëuguvasitaaka ahwaaniwa va Muunguhe? Muungu unë uguvoonaa mwino antu va tutë. 34Uu anyu nëugumusitaaka gwa iramuëyo? Kiristo Yesu uunëagakuya, nhaa, na kangë ukëra asaa, wafëtiye mukhatë a akuyi, mweeso wëë umukhono wa gëlëlo wa Muungu, kangënoo mweeso unë ugugurombea. 35Uu anyu nëugugurekanua na uyanjo wamwa Kiristo? Wurë! unë malwe namba siida, namba makhasëko, namba njaa, namba gëfuyu, namba holota, namba ifaanga? 36Mwino ëandekiwe ëtë,

“Gusoko ako

guguuraghua mumwë woong'e,

gutendiwe mwino nkhoo

yookigitwa.”

37Ëgweeso mukhatë a mantu asaa oong'e guuhuma, na ukëra uhuma, gusoko akwe mweeso nëwaguyanjie. 38Gusoko nadahie umanyaa gwa tutë tutë mwino, mbesa nkuya mbesa ufanga, mbesa vamalaëka, mbesa anyagëbala, mbesa mantu nëërëfo, mbesa nëëjie, mbesa anya nguu, 39mbesa nëëgunto, mbesa nëëëfang'ë, mbesa ntundo ëngëja gëkaku ëtiudaha ugurekanua na uyanjo wa Muungu Mukuu witu.

Currently Selected:

Arumi 8: RNT

Highlight

Copy