Arumi 5

Uyanjëka usonge akwe Muungu

1Itungwee, gusoko gwatëndiwe gwanyatutë usonge akwe Muungu gwa uhuvëi, uvii gwina majëghana na Muungu gwa njëa a Müküü witu Yesu Kiristo. 2Gusoko a mweeso gwa njëa a uhuvëi gwamëhangie mboto ëyëë në chuu gwimëkie mukhatë ayo, na uyanja mu ndolyo a uküü wa Muungu. 3Nhaa, tiuvii gutufu, ëgweeso guyanjëtë noo mu malwe itu gwa umanya mwino malwe ëgweetaa ughimu, 4weeso ughimu ugweetaa ukhamu na ukhamu ugweetaa ihaghamëyo. 5Ihaghamëyo rasëë rëtiudaha ugukhonga, gusoko Muungu wadahie ukununtëa munkhoo yitu uyanjo wakwe gwa njëa a Mwahu Mweru nëwagufee.

6Nënaa ëkëë gwalegheku, itungo nëna ranoneya, Kiristo agakuya gusoko a antu nëabe. 7Ti goro muntu ukuya gusoko a muntu nëughokie, ruvëë muntu ugudaha usoya ukuya gusoko a muntu në muja. 8Ëgweeso Muungu waraghëëre daaji mwino uguyanjëte, gusoko itungo nënaa ëkëë gwanyamahutye, Kiristo agakuya gusoko itu. 9Gusoko itungwee gwatendiwe guyanjëke usonge akwe Muungu gwa saghami amwa Kiristo, nanguu ukëra gujie utyowa na mweeso mwikuwo ra Muungu. 10Gusoko, nënaa ëkëë gwarughu vakwe, Muungu agagukhuvëya na mweeso gwa ikuya ra Mwanakwe. Gusoko itungwee gukhuvëywe na mweeso, në daaji nanguu mwino gutyowa gwa ufanga wamwa Kiristo. 11Mbesa ti uvii gutufu, ëgweeso guyanjëte noo mwino Muungu gwa njëa a Müküü witu Yesu Kiristo, itungwee gwahangie ukhuvëi.

Adamu nanë Kiristo

12Gwa njëa a muntu umwedu ihutye regingëa muurëmi, ryeso rëgasacha ikuya. Uvii ikuya rëganing'anëa mu ufafo woong'e wa anaantu, gusoko voong'e vatendie mahutye. 13Nënaa Seria ëkëë inadwëëra ihutye naa rërëfo muurëmi, ëgweeso ihutye rinavariwa fana gutie seria. 14Ëgweeso ikuya rëgibala ufuma Adamu faka Musa, ryeso rëgavibala nanë avoo nënaa vinatendaa ihutye nërikhwete mwino ramwa Adamu, wasuu nëuna nyinkhori mwino wasuu nëujie.

15Ëgweeso gëfëwa gasëë naa gëti mwino ihutye rasëë. Gusoko nësa gwa uhutya wasuu umwedu vingë vëgakuya, nërëkëaniye ino uu mboto a Muungu, na gëfëwa nëgëë mu mboto akwe mwaamuntu umwedu Yesu Kiristo gëkëanëye gusoko a vasaa në vingë. 16Na gëfewa gësëë goosoo gëë hiya na ihutye ra muntu uyoo umwedu. Gusoko gwa uhonga ihutye rasëë rëgaja iramuëyo, rëgaja gwa njëa a ihutye rasëë, ëgweeso gëfewa goosoo ëgahonga gëgaja gusoko a mahutye mingë vëtendeke vatutë na vëghookie. 17Tutë, gwa ihutye ra muntu umwedu, ikuya rëgibala gusoko a muntu uyoo umwedu ukëanëya ino vasaa nëvëughenyifaa mboto nyingë, na gëfewa gësëë ga tutë, vëjegibala mu ufanga gwa njëa amwa uyoo umwedu, Yesu Kiristo. 18Uvii kangë nësa gusoko a ihutye rëmwedu antu voong'e vëgahanga uramui, uvii uvii gwa ntendo imwedu a tutë antu voong'e vëutendeka va tutë na vëghookie mu ufanga. 19Gusoko mwino gwa utenda ihutye muntu umwedu antu vingë vëgatendeka anyamahutye, uvii uvii gwa tutë a muntu umwedu antu vingë vëgatendeka anya tutë. 20Ëgweeso Seria ëgingëa gusoko ihutye rësëë ëgaongeeya mahutye. Na mahutye nënaa akëanëya, mboto ëgakëanëya nanguu. 21Gusoko, mwino chuu ihutye rëgibala mu ikuya, uvii uvii gwa njëa a tutë mboto ibale faka ufanga wa khae na khae kunë Yesu Kiristo Müküü witu.

Currently Selected:

Arumi 5: RNT

Highlight

Copy