Arumi 4

Nyinkhori amwa Iburahimu

1Guhanye ntuni, uvii, kunë Iburahimu tata witu? 2Nësa Iburahimu naa watendiwe aghooke ufuma na wikunkunyayi wakwe, uvii ukweti intu ra gikumajua. Ëgweeso atiudaha gikumajua usonge a Muungu. 3Maandëko në Meru ëguhanyaa, wurë? “Iburahimu agamuhuvëa Muungu, rësëë rëgamutenda atendeke wa tutë na ughookie kunë Muungu.” 4Munya utenda mwëmo ugurëfwaa, gënyamwëmo gakwe ti dahwa ëgweeso në tutë akwe. 5Gwa wasuu në atihaghamëa ntendo yakwe mughonjo ëgweeso umuhuvëe Muungu në uguvarekea në mavë, uvii Muungu ugukeera uhuvëi wa muntu wasuu na ugughemwaa ayanjëke usonge akwe. 6Gwa uvii noo Daudi uguhanyaa aforiwe muntu wasuu në Muungu ugumwonaa wa tutë na ughookie ti gwa ntendo.

7“Vëforiwe vasaa nevarekewe

mahutye awe, na vasaa

në mahutye awe akunëkëwe,

8Aforiwe muntu në Müküü

urëkumbukwa ihutye rakwe.”

9Iforiwa ërëë nërëuhanyiwa uu gwa anya utowa ngovi gutufu namba noo gwa anya udëa utowa ngovi? Guhanya vii mwino uhuvëi ugamutenda Iburahimu atendeke wa tutë na ughookie. 10Rasëë naa rëgamanyëka wurë kunë mweeso? Rëgatendeka nënaa akëë namba nënaa akëë namba nenaa watowa ngovi? Ti ësa yuu watowe, ëgweeso nënaa akëë aina towa ngovi. 11Agatowa ngovi ëtendeke ughookie intu nëwarëhangie gwa uhuvëi nënaa akëë aina towa ngovi. Soko ayo unë naaumutenda mweeso tata wa vasaa voong'e nëvëhuvëe nanë vinatowaa ngovi na gwa uvii vëmanyëke anya tutë na vëghookie. 12Na uvii uvii atende tata wa anya utowa ngovi tisa në vëtowe ngovi gutufu ëgweeso në vëhongie nyinkhori a uhuvëi në tata witu Iburahimu naa ukweti nënaa akëë aina towa ngovi.

Iraghano ra Muungu rëughenyifwaa gwa uhuvëi

13Iraghano kunë Iburahimu nanë ufafo wakwe, mwino urëmi ugutendeka wawe, rinadwëëraa gwa njëa a seria ëgweeso gosoko naa wahuvëe, agayanjiwa mwino wa tutë na ughokie. 14Gusoko mbesa avoo gutufu nëvëmëkwatëëre seria vëufewa ayoo nënaa vë vëkëywe iraghano na Muungu, uvii uhuvëi utina riana mbanduvë, riëso iraghano ra Muungu ti gëntu. 15Seria ëgweetaa ikuwo, ëgweeso fana gutie seria gutie ihutye.

16Gusoko ësëë iraghano ërëë rëhaghamëe uhuvëi mwino chuu rëdwëëre ufuma u mboto a Muungu, na uvii në tutë mwino iraghano rasëë në gusoko a woong'e: Ti gwa avoo gutufu nëvëmëkwatëëre seria, ëgweeso noo gwa avoo nëvëduvie gwa uhuvëi mwino Iburahimu. Mweeso unë tata witu sese soong'e. 17Mwino Maandëko në Meru ëhanyiye, “Nagutendie utende tata wa ndughu nyingë usonge amwa Muungu wasuu në mweeso umuhuvëe, nëuguvafaa ufanga akuyi, na gwa iragheyo rakwe, mantu nënaa ëtifo ëtendeke ërëfo.” 18Iburahimu agahuvëa na uhaghamëa mbesa naagutie wëhaghamëyi, uvii watendekie tata wa ndughu nyingë mwino Maandëko në Meru egahanya: “Ufafo wako ugutendeka wingë mwino njota.” 19Na munyampaa wa mëakha ighana rëmwedu vii, ëgweeso uhuvëi winanyumpaa mbesa naa umanyie mwino mwëërë wakwe naa waye mwino ukure, mukhema wakwe Sara noo naa mughumba.

20Iburahimu inahangaa wisaghasaghëi na iraghano rasëë ra Muungu, agahanga nguu ufuma uhuvëi agamukuta Muungu. 21Naa umanyie tutë mwino Muungu ugudaha utenda ayoo nëwayaraghanie. 22Gwa soko uhuvëi wakwe Muungu agamwoona munya tutë na ughookie. 23Ëgweeso nkhani naa yiandekiwe ti gusoko akwe mweeso gutufu, 24ëgweeso gusoko itu noo. Ërëë nëgughookee sese noo nëgumuhuvëe Muungu nëwamufëtiye Yesu, Müküü witu, ufuma gwa akuyi. 25Mweeso nëagauraghwa gusoko a mahutye itu na agafëtiwa sese gudahe utendeka anya tutë.

Currently Selected:

Arumi 4: RNT

Highlight

Copy