Arumi 3

1Uvii, Muyahudi wahangie ntuni nanguu? Mba utowa ngovi, gwina saokëhë? 2Gunoneye ino gwa muu njëa. Mwandyo Ayahudi vënoneye vafewe maraghëëyo a Muungu. 3Uu ntuni, uvii, nësa mukhatë awe vinahuvëaa? Wurë, intu rasëë rëuheya uhuvëi wa Muunguna? 4Gutie mbanduvë! Mureki Muungu atende tutë na muu muntu atendeke mweegheeghe, mwino yiandekiwe,

“Vee Muungu, fana ugurighëtya,

nkhani yako unë ya tutë,

nanë fana uramwui,

veve uguhumaa.”

5Ëgweeso, mbesa uvë witu uguraghëëra mwino Muungu ugutenda gwa tutë, guuhanya ntuni? Guudaha uhanya Muungu atiutendaa fana tutë itungo nëgwagwëwa na ikuwo rakwe? (Ngurighëtya gëuntu.) 6Ti uvii mba nduvë! Gwa uvii Muungu naa ugudahawurë uwuramuëya urëmi? 7Ëgweeso nësa gwa weegheeghe wanë tutë a Muungu ëfikie gu uküü wakwe, sokokë në ëkëë nguramuëywa mwino nëmunya mahutye? 8Sokokë udëa utenda në mabë soko ësëë uja uje? Mwino antu vangë vëugurighëtyaa see mwino gwasëiye uvii. Uramuëywa kunë veeso unë gunoneye.

Gutie muntu mbanduvë nëughookie

9Uvii uu ntunihe? See Ayahudi gwëë aja nanguuna? Ti uvii mbanduvë! Gusoko nahanyiye antu voong'e, itambëëmwe na Ayahudi nanë Ayunani voong'e vëë fang'ë anguu ya mahutye, 10mwino yiandëkiwe:

“Gutie mba umwedu në wina tutë,

gutie, gutie mbanduvë,

11Gutie muntu neumanyie,

mbesa nëugumufenjaa Muungu.

12Voong'e vëhutaanëe,

voong'e vina ihondo

gutie nëugutendaa në maja,

gutie mba umwedu.”

13“Mumiro wawe uu në mbëlëlo

në ëmwaarye, vëutumëaa

ndëmë yawe gweegheegha,”

“Ululu wa nyama wëumeomo awe.”

14“Moomo wawe wijue maraghano

në mavë nanë ululu.”

15“Mëghuu awe ëmankie uhunua saghami,

16munjëa yawe gwina uruvanga

nanë makhasëko,

17Mbesa njëa a majëghana vëtimemanyie.”

18“Umükürya Muungu gutifo

mu miho awe.”

19Itungwee gumanyie mwino Seria mwino ëguhanyaa, ëguvahanyaa vasaa në vë fang'ë a Seria, uvii vëtiudaha uhanga gikwatëëya intu mbanduve, na urëmi woong'e wëë muuramui wa Muungu. 20Gusoko gutie mwaamuntu woong'e nëugutendwaa ayanjëke usonge a Muungu gwa ukwatëëra Seria. Mwëmo wa Seria unë umuraghëëra gutufu muntu mwino watendie mahutye.

Mwino Muungu ugugutendaa guyanjëka usonge akwe

21Ëgweeso itungwee njëa a Muungu a uvatenda antu vëyanjëke usonge akwe adahie ukunukuwa, kangë ti gwa uhaghamëa Seria. Ëgusudangëwa na Seria nanë anyagëdaghu. 22Muungu uguvatendaa antu vëyanjëke usonge akwe gwa njëa a uhuvëi wawe fana Yesu Kiristo, Muungu ugutendaa uvi gwa antu voong'e nëvëuhuvëa, gutie ubaghui mbanduvë. 23Antu voong'e vatendie mahutye na ukefewa na weru wa Muungu. 24Ëgweeso gwa dahwa a mboto a Muungu antu voong'e vëutendwaa vëyanjëke usonge akwe gwa njëa amwa Kiristo Yesu nëwavakhomoe. 25Muungu wamudwëye mweeso gusoko gwa saghami akwe, atëndeke njëa a uvahegheya antu mahutye awe gwa. Uhuvëi watëndie vii adahe uvaraghëëra mwino mweeso ughookie. Kheengë, Muungu na mughimu inakeeraa mahutye a antu, 26ëgweeso itungwee ërëë, uguyasughulëkëa mahutye a antu adahe uraghëëra ughoke wakwe. Gwa uvii Muungu mughonjo uguraghëëra mwino mweeso ughokie na mwino ugumutëndaa muntu gëkaku në umuhuvëe Yesu ayanjëke usonge akwe.

27Uvii, wëtëndeo witu wëgufehe? Gutie intu. Gwa seria në ëëvurë? Gwa seria a ntendona? Aa! ëgweeso gwa seria a uhuvëi. 28Uvii, gugunë mwino muntu ugumanyëkaa munya tutë gwa uhuvëi na ti gwa ntendo ya seria. 29Namba wurë! Muungu unë Muungu wa Ayahudi gutufuna? Ti Muungu wa ndughu yoong'ena? Nhaa, unë Muungu wa ndughu yoong'e noo. 30Nësa gwa tutë Muungu unë umwedu, nëujie uvayanjëya mututë vasaa nëvëndie ngovi mu uhuvëi, na vasaa nëvinatowaa ngovi ujie uvayanjëya mututë gwa njëa ya uhuvëi uruuro uruuro. 31Uvii, wurë! sese guumëtenda Seria ti intu gwa uhuvëi uruuro? Ti uvii, gënyume gayo sese guumëfa seria udaho nëukhondekie.

Currently Selected:

Arumi 3: RNT

Highlight

Copy