Arumi 2

Uramui wa Muungu

1Uvii utiudaha ginegha, vee mwaamuntu, veve mba wëë wurë nëugumuramuëya ungëja, gusoko gwa umuramuëya ugiramuëya veve mughonjo soko veve, muramui, uguyatendaa mantu ayaayo. 2Gumanyie mwino uramui wa Muungu gwa vasaa nëvëutendaa mantu asaa unë uramuë wa tutë. 3Vee mwaamuntu nëuguvaramuëya vasaa nëvëutendaa mantu mwino asaa në veve noo uguyatendaa, wurë, uguwinegha uramui wa Muungu na? 4Mba ruvëë utiuwukeera uja wakwe në uküü na ughimëëyi wakwe? Utimanyiena mwino ufoo wa Muungu wina riana ra ugutongeera veve mu ufei? 5Ëgweeso ukaku nanë gëdida ga nkhoo ako ugërundëërëya uramui në ukharë kunë veve mughonjo gwa itiku ra ikuwo ra Muungu na uramuë wakwe wa tutë në ujie ukunukuwa. 6Gwa uvii ujie umurëfa muu muntu uhonga na ntendo yakwe: 7Vasaa në gwa ughimëëyi vëutendaa në maja na uwufenja weru nanë ikuryo ra Muungu nanë udëaukuya, uguvafa ufanga wa khae na khae. 8Ëgweeso vasaa nëvëtiumëhongaa tutë ëgweeso vëuhongaa uvë gujeutendeka gwina ikuwo ra Muungu ra uramui. 9Guutendeka gwina makhasëko na siida gwa muu muntu nëugutendaa ubë. Muyahudi mwandyo na Muyunani noo. 10Ëgweeso üküü, ikuryo nanë majeghana ëtendeke kunë mu muntu nanëugutendaa në maja, Muyahudi mwandyo na Muyunani noo. 11Gusoko Muungu atina ubaghui.

12Vasaa voong'e nëvatendie mahutye gwa udëa umëkwata Seria vasaa noo vëjohira gwa udëa umekwata Seria. Na vasaa voong'e nëvatendie mahutye gwa umëmanya seria, vëjieuramuëywa gwa seria. 13Muntu atiutendwaa ayanjëke usonge a Muungu gwa utëgheeya Seria, ëgweeso gwa utenda mwino Seria eguhanyaa. 14Në antu va ndugu ëngëja në vëtina Seria, ëgweeso nëvatenda mwino Seria ëguhanyaa vatendekaa Seria veeso aghonjo, mbesa vëtikweti Seria. 15Vëuraghëëra mwino asaa në Seria ëguhanyaa ëtendwe ëandëkiwe munkhoo yawe, dhamiri yawe noo igusudangëa, na masëgho awe agifëngafënga ëguvasitakaa veeso na uvarëkea. 16Uvii itiku rasëë Muungu ujie uyaramua mantu a gëmpihë a anantu gwa uhonga Sayu Njija nëngumëtanantyaa, gwa njëa amwa Yesu Kiristo.

Ayahudi na Seria

17Ëgweeso nësa veve mughonjo ugitaanaa Muyahudi, umëhuvëëre Seria na ugitendaa wëë wa Muungu, 18na gwa njëa a Seria umanyie mafenji a Muungu na udahite uhwaania intu në ija, gusoko ugusëywaa mu Seria, 19na nësa veve umanyië tutë mwino veve umutongeeri wa afoku, weru wa vasaa nëvë mukiti, 20musëyi wa afutu, musëyi wa ang'ënya në anyuughuu, munya gikhwa wasuu nëwina mahaa na tutë mu Seria, 21uvii veve nëuguvasëyaa vangëja, wurë utiudaha gisëya veve mughonjona? Veve nëugutanantyaa muntu ataivee, vee mughonjo ugivaa? 22Veve nëuguhanyaa mwino muntu atalehadee, veve mughonjo ugulehada? Veve nëuhwëëte sanamu ya arungu, uguyafumpa mahekalu? 23Veve nëugikumajuaa mu Seria, utiumukuryaa Muungu gwa udëa umëkwatëëra Seria? 24Mwino chuu yiandëkiwe, “Rina ra Muungu rëuraghanëëywaa vivë mu Ndughu ingë gusoko anyu.”

25Utowa ngovi gwina riana ino në mbesa muhongie mwino Seria ëguhanyaa, ëgweeso nëmwadëa umëkwatëëra Seria, ngovi anyu atendekaa mwino mwinatowaa ngovi. 26Uvii nësa wasuu nëinatowaa ngovi uyakwatëëre maraghëëyo a Seria, wurë, gwa udëa utowa ngovi gwa wasuu gutiuvariwa mwino chuu watowe ngovina? 27Uvii vasaa në gwa mëërë awe vinatowaa ngovi ëgweeso vëmëkwatëëre Seria vëumuramuëya nyenye në mwina rëandëko na mwatowe ngovi ëgweesogwayo mutimekwatëëre Seria. 28Gusoko wasuu ti Muyahudi në Muyahudi gwa gunjë gutufu, na ëgweeso ngovi ti ësëë në agunjë gutufu mu mwëërë. 29Muyahudi wa tutë në wasuu Muyahudi mung'ë a nkhoo. Ngovi a tutë unë a munkhoo. Ërëë në intu ra Nkhoo, na ti intu ra maandëko. Ikuryo rakwe rëtiufumaa gwa anantu ëgweeso rëufumaa kunë Muungu.

Currently Selected:

Arumi 2: RNT

Highlight

Copy