Mariko 6

Yesu uguhitwa ukoo Unasareti

(Mat 13:53-58; Luk 4:16-30)

1Yesu agahegha faafo agenda ugëjiji gakwe, uhongiwe na asëywi vakwe. 2Itiku ra Sabato nënaarafika, agandya usëya musunagogi. Vingë nënaa vëgamutegheeya vëgataka, vëgahanya, “Wurë, wayahangëe fee mantu ayaa? Uu ihaakë ërëë nëwafewe? Kangë, uguyatenda wurë makura ayaa nëuguyatendaa? 3Wurë, uyuu ti mwamusesina, mwana amwa Maria, na vaunaakwe vaa Yakobo, Yose, Yuda në Simoni? Wurë, ahajaakwe ti vëuduaa afaafa mung'ituna?” Uvii, vëgaa vëna wisaghasaghëi na mweeso.

4Yesu agavëëra, “Munyandaghu atiuwuriaa ikuryo ëgweeso gwayo mung'i akwe, kunu ndughu akwe na ukhaakwe.”

5Inadahaa utenda makura faafo, ëgweeso gwayo agavavëkëa mëkhono aroe akeevu, agavaforya. 6Agataka ino gusoko a udëa uhuvëa kune veeso.

Yesu uguvatuma asëywi ikumi na vavëë

(Mat 10:5-15; Luk 9:16)

Uvii Yesu agavisoya vijiji vya faafo fifë uguvasëya antu. 7Agavataana asëywi avoo ikumi na vavëë, agandya uvatuma vavëë vavëë. Agavafa udaho wa uduya vinyonyinyonyi në vivë, 8na uveera, “Mutahoree intu mba nduvë kunu mwinjë ëgweeso mwaanga gutufu. Mutahoree mukate, nanë mpënda, nanë hela muubene. 9Rëi maatu ëgweeso mutariee nkhaanju ivëë.” 10Kangë agavëëra, “Goongë nëmwaghenyifwa mukhaya ëkhai faafo faka fana mujeuheghea faafo. 11Goongë fana antu vahita umughenyifa mba umutegheeya heghi faafo na uwukununta ukungu në wuu mighuu anyu ëtende kunë veeso. 12Uvii, vëgatunguya vëgatanantya antu vëfëe mahutye. 13Vëgaviduya vinyonyinyonyi vingë, vëgavavëra makuta aroe vaingë, vëgavaforya.”

Ikuya ramwa Yohana Mubadisi

(Mat 14:1-12; Luk 9:7-9)

14Uvii, mutemi Herode agayategheeya asaa oong'e, gusoko ukumu wamwa Yesu ugakundanëa goong'e. Antu vangë naa vëuhanya, “Yohana Mubadisi wafëtyaa ufuma gwa akuyi, gusoko ësëë nguu ya matako igutenda mwëmo mukhatë akwe.” 15Vangëja vëgahanya, “Muntu uyuu uu Eliya.” Vangëja vëgahanya, “Uyuu uu munyandaghu mwino anyandagu vangë.”

16Ëgweeso Herode nënaa wahanga sayu iyii agahanya, “Uyuu uu në Yohana! Ngamukigita nkingo, ëgweeso wafëtyaa.”

17Afoo mwandyo Herode mughonjo naa waraghëëye Yohana akwatwe, agamutunga ugeresa. Herode agatenda uvii gusoko amwa Herodia nënaa Herode agamuroghoa nënaa mukhema wamwa Filifo, muunaakwe. 18Yohana naa agamukhanëa Herode, “Etinoneye kune vee umuhora mukhema amuunaako.”

19Uvii, Herodia agamuhura ino Yohana, naa ugufenjaa umuuragha agatumba. 20Herode naa ugumooghofaa Yohana gusoko naa umanyie mwino mweeso u muntu wa ughooke na mweru, uvii agamughoja. Herode naa uyanjëte umutegheeya Yohana, mbesa gwayo nënaa wamutegheeya agahingisiwa ino.

21Rëgighëa iyoma, itungo ra sigunkuu a ufafwa kune Herode. Herode agaatendeya malëwa anyampaa va ibarasa rakwe, aküü va urughu na atongeeri va Ugalilaya. 22Uvii, muncha amwa Herodia agingëa agiisa, agavayanjësya ino Herode na aghenyi vakwe. Mutemi agamwëëra muncha wasuu, “Nomba intu gëkaku nëugufenja, nëënoo ngugufa.” 23Kangë agamurafëya, “Intu gëkaku nëwanomba, ngugufa, na mbesa uvegha gafaande gamwe ga utemi wanë.”

24Faafo muncha wasuu agadua agamuwiya yiu wakwe, “Nërombe ntuni?” Mweeso noo agamusucha, “Itwe ramwa Yohana Mubadisi.” 25Muncha agamusukëa, Mutemi umankie, agamuromba, “Ngufenja umpe itungwee ërëë mu ihaari itwe ramwa Yohana Mubasisi.”

26Mutemi agahurisiwa ino, ëgweeso gusoko aa wirafeo wakwe, na gusoko aa aghenyi vakwe nënaa vëitambëëmwe mumalëwa, agaremwa umuhitëya. 27Uvii, mutemi agamutuma musikee gwenda urieta itwe ramwa Yohana. Musikee agenda, agamukigita itwe Yohana faafo mugeresa, 28agarëeta mwihari, agamufa muncha, muncha wasuu agamufa yiu wakwe. 29Asëywi vamwa Yohana nënaa vahanga sayu, vëgenda uwuhora mwëri wakwe, vëgauvëka mumbëlëlo.

Yesu Uguvalësya malëwa antu maghana a njou ataano

(Mat 14:13-21; Luk 9:10-17; Yoh 6:1-14)

30Atumami vasaa vëgasuka, vëgëhwaangwiya usonge amwa Yesu, vëgamufa sayu oong'e gwa asaa nënaavatendaa na usëya. ( 31Antu vingë ino naavëufika faafo na gwenda. Yesu na asëywi vakwe vinadahaa uhanga iyoma ra ula malëwa. Uvii,) Yesu agavëëra asëywi vakwe, “Kwendi see gwimwene kunu gutie muntu, mutuye nduvingë.” 32Vëgatunguya veeso vëmwene gwa masua, vëgenda kunu naa antu gutie.

33Gweeso, antu vaingë vëgavoona vëtunguiye, vëgavamanya. Uvii vaingë vëgadua mu muji, vëmankie kuuko kunu Yesu na asëywi vakwe naavinjë, vëgavatongeera ufika. 34Nënaavika umpeo a irambo, Yesu agoona mwirundo üküü wa antu, agavaonëa uvavi, gusoko naa mwino nkhoo në itina mudëmi. Agandya uvasëya mantu mingë. 35Matungo a mumwë naa akëraa. Uvii, asëywi vëgamwendea Yesu, vëgamwëëra, “Afaa uu umbugha, na itungwee yuva rakëraa. 36Bahu uvanyaghwisye antu vende umeunda na muvijiji vya fifë, veghure malëwa,” 37Ëgweeso Yesu agavakhanëa, “Vafi nyee malëwa.” Veeso noo vëgamuwiya, “Wurë, gwende ughura mikaate gwa mafesa maghana avëë, na uvafa malëwana?” 38Yesu agavawiiya, “Mukweti mikaate inga? Endi muraraave.” Nënaa vadaha uraraava, vëgamwëëra, “Ërëfo mikaate ëtaano nanë somba ivëë.”

39Uvii, Yesu agavaraghëëya asëywi vëvëkheeche antu voong'e makhakho makhakho mu mahwaa. 40Antu vegekhaa fang'i, vangi makhakho a antu ighana, na vangi makhakho a antu makumi atano. 41Agamëhora mikaate ësëë itaano nanë somba ësëë ivëë, agaravaava gunto girunde, agamurumba Muungu, agamëvëgha mikaate, agavafa asëywi vakwe vëvavaghanie antu. Nanë somba ësëë ivëë noo agavavaghania antu voong'e. 42Antu voong'e vëgala, vëgikuta. 43Vëgahwaangwiya makoko a mikaate nanë somba noo, vëgijuya makafu ikumi na avëë. 44Na vasaa nënaa valaa mikaate ësëë naa aghosya maghana a njou ataano.

Yesu ugweendenda gunto a majë

(Mat 14:22-33; Yoh 6:16-21)

45Gënyafaafo Yesu agavaraghëëya asëywi vakwe venatëe masua, vëmutongeere gwenda Ubetisaida, gitumbë ra irambo, itungo nënaa mweeso uguunyaghwisya mwirundo wa antu. 46Nënaa waanyaghwisya agenda ugëtanto uromba. 47Nënaa atenda mpëndë, masua naa imukhatëkhatë a irambo, na mweeso naa wimwene mu ng'i nënkaku. 48Uvii, agavoona asëywi vakwe vëulwa umëendesya masua, gusoko mpefo naa ëvakunkëe, utiku itungo ra ikumi, Yesu agaveendea ugweendeenda gunto a majë. Naa woofenja uvakëra. 49Ëgweeso vëgamwoona ugweendenda gunto a majë, vëgaghema ruvëë intunga, vëgakuta mwano. 50Gusoko voong'e nënaa vamwoona vëgoghoofa ino. Mu gënyafaafo Yesu agarëghëtya inaawe, “Riki, wasuu nene. Mutaoghofee!” 51Aganatëa mumasua fana naa vërë, na mpefo ëgatënëka. Veeso noo vëgatakicha ukëra, 52gusoko naa ëkëë vënamanya riana a mikaate iyoo. Nkhoo yawe naa inamanyaa intu.

Yesu uguvaforya aroe ukoo Ugenesareti

(Mat 14:34-36)

53Vëganankëa irambo, vëgafika ung'i a Ugenesareti, vëgakiimëka ukëngë na umëtungira masua. 54Nënaa vadua mumasua antu vëgamumanya Yesu gënyafaafo. 55Uvii vënatiniaa vëgafëëmëya ng'i ësëë oong'e, vëgandya uvahora aroe viree mu ndëe awe vëgavatoa mu ntumbë fana naa vategheyaa Yesu urëfo. 56Mu ntumbë nënaa Yesu wenda, muvijiji, mumiji namba mumëunda antu vegavaraencha aroe muweru, vëgamunena vëtenëe mbesa ubido wa isaa rakwe. Na voong'e nënaa vëgamutenya aroe vëgafora.

Currently Selected:

Mariko 6: RNT

Highlight

Copy