Mariko 7

Ntende ya vaa kükü

(Mat 15:1-9)

1Mukhatë a Afarisayo na asëyi va Seria nënaa vëfumie uYerusalemu vëgihaangwiya usonge amwa Yesu. 2Vëgoona mwino mukhatë a asëywi vakwe vëgala mëkaate gwa mëkhono iikhwe, gwa udëa goya mëkhono. ( 3Gusoko Afarisayo na Ayahudi vangëja voong'e vëkwatëëre ntende ya anyampaa vawe: vëtëula intu nëkëë vënoya mëkhono vija.) 4Kangë, vëtëula intu mba nduvë nërëfumie usokoni, faka vërëoye tanju. Kang'e noo gwina ntende ingëja nëvaihorie ufuma khae mwino goya nküü, nyungu na vife ya machuma.

5Uvii, Afarisayo na asëyi va Seria vëgamuwiiya Yesu, “Asikë në asëywi vako vëtëkeere ntende ya anyampaa vitu, ëgweeso gwayo vëulaa malëwa gwa mëkhono në mëbë?” 6Yesu agavasucha, “Anyalakuno nyee! Munyagëdaghu Isaya agatavëëra tutë kunu nyee nënaa agandëka:

‘Antu avaa, uguhanya Muungu,

vëunkurya gwa nkani gutufu,

gweeso, munkhoo yawe,

vëëkure na nëë.

7Mwino vëunkumbëkaa ëtënoneye,

gusoko mantu nëvëuyasëyaa

unë maraghëyo anaantu gutufu.’

8Nyee mwarërekie iraghëyo ra Muungu na uyakwatëëra maragheyo a antu gutufu.”

9Yesu agafwaghira urëghëtya, “Nyee mumanyie uhita gwa uhughu Seria a Muungu gusoko a uhonga ntende yanyu! 10Gusoko Musa agaraghëëya: ‘Vakurye tata wako ina yiu wako,’ na ‘Nëugumutukanëeyaa ihe mbesa nyinya, nëakuye.’ 11Ëgweeso nyee muusëya, ‘Nësa muntu una intu nëudahite umwaariya ihe mbesa nyinya, ëgweeso wahanya mwino chuu intu rësëë uu Koribani (rianaayo unë gëfëwa kune Muungu), 12uvii, atinoneye kangë uvaarëya afafi vakwe.’ 13Uvii unë mwino mutiukeere ukhani wa Muungu gusoko a masëyo nëmuuyërekea. Kangë mutenda mantu mingë mwino asaa.”

Mantu nëëgumutenda muntu atendeke wëikhwe

(Mat 15:10-20)

14Yesu agautaana kangë mwirundo wasuu wa antu, agavëëra, “Ntegheeyi nyoong'e, na mumanye. 15Gutie intu nërëumwingëa muntu ufuma gunji nërëudaha umutendea muntu uvaya. Ëgweeso gwayo rasëë nërëumudua muntu unë rëumutendea muntu uvaya. 16Tegheeyi uvii, nësa mwina makutwë!”

17Nënaa wooreka mwirundo wa antu na gingëa ukhaya asëywi vakwe vëgamuwiiya riana ra wikhori wasuu. 18Mweeso noo agavëëra, “Wurë, anë nyeenoo mutimanyiena? 19gusoko rëtiumwingea munkhoo, ëgweeso munda na itungo ra usonge rëuduiywa gunji ugënyanjina?” (Gwa uhanya uvii, Yesu agaraghëëra daaji mwino malëwa oongë maja.)

20Agafwaghira uhanya, “Nërëumudua muuntu unë rëumutendea muntu uvaya. 21Gusoko gwa umudua ufuma munkhoo a muntu, ëguduaa masëgho nëmabë në ëgumutendaa muntu atendeke una ufumbu, wivi, wuuraghi, 22ulehadi, uraku, ubë, weegheeghe, uruvangi, wiru, uvira matofe, gëdida na ufutu. 23Mavaya ayaa oong'e ëgumudua muntu, meeso ëgumutendea muntu uvaya.”

Uhuvëi wa mukhema umwe

(Mat 15:21-28)

24Yesu agahegha faafo, agenda gëtumbi ra Utiro. Kuuko agingëa munyumba imwe na naa atiufenja muntu amanye ëgweeso inadahaa gifiha. 25Faafo mukhema nënaa munchaakwe ukweti gënyonyinyonyi, agategheeya sayu yamwa Yesu. Uvii, agaja, agigwisya fang'i usonge a mighuu akwe. 26Mukhema wasuu naa Mugiriki, ndughu a musirofoinike. Uvii, agamuromba Yesu agëjunche gënyonyinyonyi në gëvë ufuma kune munchaakwe. 27Yesu agamwëëra, “Mwandyo ang'ënya vëkute, gusoko ëtinoneye uhora ilëwa raa ang'ënya na uyigumëa mbwa.” 28Ëgweeso mukhema wasuu agahanya, “Guja, Müküü, ëgweeso nanë mbwa në yii fang'i mumesa ëgulaa maghee aang'ënya në ëgwangie.” 29Yesu agamukhanëa, “Gusoko a ukhani wasuu, enda. Gënyonyinyonyi gamuduaa munchaako!” 30Uvii, agenda ukhaakwe agamuhanga mung'ënya uree ugëtanda, na gënyonyinyonyi gamuduaa.

Yesu ugumuforya gëmumu kunu mbula

31Uvii Yesu agahegha gitumbë ra Utiro, agakëërëa Usidoni, agafika girambo ra Ugalilaya gwa ukëërëa ng'ë a Udekapoli. 32Uvii, vëgamweetea gëmumu kunu mbula, vëgamuromba amuvikiye mëkhono umutenya. 33Yesu agamubaghua na mwirundo wa antu, agamutendeya anaachaa mumakutwë, agatya mate na umutenya urëmë. 34Faafo agararaava gunto girunde nkhoo ëgafya agamwëëra, “Ëfata,” rianaayo “Rughuuka.” 35Gënyafaafo makutwë akwe ëgatuhuuka nanë urëmë wakwe ugatarughwiirwa, agandya urëghëtya vija. 36Yesu agavaghëëya vëtamukhanëe muntu ihanyo rasëë. Ëgweeso gwayo mwino naagavaghëëya, uvii vëgatanantya nanguu sayu ësëë. 37Antu vëgataka ukëra, vëgahanya, “Watendaa oong'e vija: waatendaa mbula vëtegheeye, na gëmumu vërëghëtye!”

Currently Selected:

Mariko 7: RNT

Highlight

Copy