Mariko 5

Yesu ugumuforya muntu nëuna vinyonyinyonyi vivë

(Mat 8:28-34; Luk 8:26-39)

1Uvii, vëgafika u ng'i a Ageraseno, gëtumbë ra irambo. 2Gënyafaafo gutufu nënaa Yesu woka ufuma mumasua, muntu umwe nënaa wina gënyonyinyonyi gëvë naa ufumie u mbëlëlo, agatang'ana inakwe. 3Muntu wasuu naa uguduvëa u mbëlëlo na naa gutie muntu nënaa wina udaho kangë wa umutunga gwa minyoo. 4Naa vëujaa vëumutungaa gwa mpëngu na minyoo ëgweeso mu itungo naa ugumëtënaa minyoo ësëë na uyiunanga mpëngu yasëë na naa gutie muntu nënaa udahite umughiiya. 5Mumwë anë utiku naa ugëkhaa umbëlëlo na uvitanto ugwanga na ugitemangatemanga na magwe.

6Nënaa wamwona Yesu gwa kurë, agamumankëa, agamwinamëa 7uguhanya gwaa ruri aküü, “Vëë, Yesu, Mwana wa Muungu në Müküü, wina ukhanikë na nëë? Gwa rina ra Muungu, nguguromba utankhasyee!” ( 8Gusoko Yesu agahanya, “Veve gënyonyinyonyi, muheghe muntu uyuu!)”

9Uvii, Yesu agamuwiya, “Rina rako anyu?” Mweeso noo agasucha, “Rina ranë në ‘Ijesi,’ gusoko sese gwi vingë.” 10Faafo agamunena Yesu atavijunchee vinyonyinyonyi visii mung'ë ësëë.

11Naa gwina idae iküü ra nguma rëudëmwa muntununto a gëtanto. 12Uvii, vinyonyinyonyi visii vigamunena, “Gutue kune nguma iyoo, guyiingie.” 13Mweeso noo agaviyanjëya. Uvii, vinyonyinyonyi vie vyasii vigadüa, vigingëa nguma yasii. Idae roong'e ra nguma rëkhondie maghana a njou avëë rëgatununtëëra muntununto mbë faka gërambo, rëgagwia mumajë.

14Adëmi va nguma yasii vëgamanka, vëgarëtanantya ihanyo rasëë umuji na uvijiji. Antu vëgafika goona nënaa adwëëraa. 15Vëgamwendea Yesu, vëgamwona nanë muntu uyuyouyuuyo nënaa uhukiwe na ijesi ra vinyonyinyonyi wëkhee fang'i, urie masaa na wina ihaa rakwe rëghookie, vëgaoghofa. 16Antu nënaa vërëraraavie intu rësëë vëgavakhanëa vangëja mantukë nënaa amuhangaa muntu nënaa uhukiwe gënyonyinyonyi na nguma yasii. 17Uvii, vëgandya umuromba aheghe mung'i awe.

18Yesu nënaa ugunatëa mu masua, muntu wasuu nënaa uhukiwe gënyonyinyonyi agamuromba amuyanjëye vende inakwe. 19Ëgweeso Yesu agamuhitëya. Ëgweeso gwayo agamukhanëa, “Enda ukhaya gwa antu va ukhaako, uvakhanëe mantu oong'e në Müküü wagutendëe na mwino wagoonëe uvavi.” 20Uvii, muntu wasuu agenda, agandya utanantya kuuko Udekapoli mantu oong'e nënaa Yesu wamutendëe, antu voong'e vëgataka.

Muncha wamwa Yairo na mukhema umwe vëuforiwa

(Mat 9:18-26; Luk 8:40-56)

21Yesu aganankëa kangë uvaru wa gavëë wa irambo gwa masua. Mwirundo üküü wa antu ugirunda usonge akwe, mweeso agaa wimëkie umpeo a irambo. 22Faafo agaja umwe muakuu va nyumba a umuromba Muungu, rina rakwe Yairo. Nënaa wamwoona Yesu, agigwësya usonge a mighuu akwe, 23agamunena agahanya, “Munchaanë në munyughuu urue ugiinga ukuya. Kwende, nguguromba, umuvëkëye mëkhono ako, adahe ufora na uduva!” 24Uvii, Yesu agatunguya itambëëmwe inakwe. Antu vingë ino vëgamuhonga vaa vëmutunyëëye mbaru yoong'e.

25Umwe wawe naa mukhema nëuna urue wa ukënga saghami gwa miakha ikumi na ëvëë. 26Mukhema wasuu naa aganyomwa ino na aghanga vingë. Na mbesa na waduiye mantu akwe oong'e, aina hangaa bahu ëgweeso gwayo agaremechwa nanguu. 27Naa wategheeye sayu yamwa Yesu, na uvii agauhefeera witunyiiyi wa antu ufuma unyuma, agatenya isaa rakwe. 28Agatenda uvii gusoko agiera, “Nëmba nërëtenie gutufu isaa rakwe, ngufora.”

29Gënyafaafo musemembo wa saghami akwe ugahira, agitegheeya mu muvëë wakwe mwino chuu waforiwa urue wakwe. 30Yesu agamanya muu gënyafaafo mwino nguu yamudua. Uvii, agawikengeeya mwirundo wasuu wa antu agavawiya, “Anyu nëwarëtenya isaa ranë?” 31Asëywi vakwe vëgamusucha, “Ughune mwino antu vëgutunyiiye, asikë nëuguwiya anyu newarëtenya?”

32Gweeso, Yesu agafwaghira uraraava amwone wasuu nënaa watenda uvii. 33Faafo mukhema wasuu gwa umanya nëamuhangaa, agidwëëya ugukhakhata gwa wova, agigwësya fang'i usonge amwa Yesu na urëghëtya tutë oong'e. 34Yesu agamwëëra, “Muncha, uhuvëi wako waguforiaa. Enda gwa majighana ufore chookuu uroe wako.”

35Yesu nënaa ëkëë urëghëtiye, antu vëgafika ufuma ukhaya amwa müküü uyoo wa nyumba a umuromba Muungu, vëgamwëëra, “Munchaako wakuyaa. Asikë nëëkëë ugumunyoma Musëyi?” 36Gweeso, gwa udëa ukeera nënaa varëhanyaa, Yesu agamukhanëa müküü wa nyumba a umuromba Muungu, “Utaoghofee, huvëa gutufu.” 37Kangë noo ainamuyanjëyaa muntu mba umwe ihonge inakwe ëgweeso Fetero, Yakobo na Yohana mwuunaakwe Yakobo.

38Vëgafika ukhaya amwa müküü wa Sunagogi Yesu mweeso noo agategheeya mukindo, gëëro na ihongeeya ikuu. 39Agingëa ukhatë, agavëëra “Asikë mukurya mukindo na gëëra? Muncha ainakuya, uree gutufu.” 40Ëgweeso veeso vëgamuheka. Uvii, agavaduya voong'e gunjë, agavahora ihe ina nyinya wa muncha wasuu na asëywi vakwe vasaa, vëgingëa u mbee fanaa naa urë muncha wasuu. 41Agamukwata mukhono, agamwëëra, “Talita kumi,” rianaayo, “Mung'ënya agëkhema, nagwëëra, fëtya!” 42Gënyafaafo muncha agafëtya, agandya geendenda. (Naa wa irika ra mëakha ikumi na ëvëë.) Faafo antu vëgatakicha nanguu ukëra. 43Yesu agavaghëëya ino utanantya sayu ësëë gwa muntu. Agavëëra vëmufe muncha malëwa.

Currently Selected:

Mariko 5: RNT

Highlight

Copy