Mariko 4

Nyinkhori a mufandëi

(Mat 13:1-9; Luk 8:4-8)

1Yesu agandya usëya kangë umpeo a irambo. Mwirundo üküü wa antu ugamwirundëëra mpeoayo agingëa mumasua na gëkhaa mwirambo. Antu vëgëkhaa fang'i umpeo a irambo. 2Agavasëya mantu mingë gwa nyinkhori, na mumasëyo akwe agavëëra, 3“Tegheeyi! Mufandëi agenda ufandëa mbeyu. 4Nënaa uguyifandëa, ëngëja igagwa munjëa, nyonyi igaja igayila. 5Ingëja igagwa mumagwe fana naa irongo ëkeevuu. Mbeyu isëë igakinda gënyafaafo gusoko irongo naa ëkeevuu. 6Nënaa yuva radua, igafya mumwi na gusoko mërye ayo naa ëtëna nguu, igauma. 7Ingëja igagwa mumëtë a maghuya, mëeso noo ëgakura na uyitunyëëya, njeeso noo yinafaa nkhari. 8Ingëja igagwa mwi irongo nëija, igakura na ufa: imwe makumi atatu, imwe makumi mutandatu na ingëja ighana.” 9Faafo agavëëra, “Uvii tegheeyi nësa muna makutwë.”

Ndolyo a nyinkhori yasii

(Mat 13:10-17; Luk 8:9-10)

10Yesu nënaa wasagha iyene, mukhatë a antu vasaa nënaa vëgamutegheeya vëgamwendea itambëëmwe na avoo ikumi na vavëë, vëgamuwiya riana ra nyinkhori yasii. 11Mweeso noo agavëëra, “Nyenye mwaarëywe ugëmanya gëmpihë ga Utemi wa Muungu ëgweeso gwa vasaa në vëgunji muu intu vëukhanëwa gwa nyinkhori, 12gusoko,

‘Vëraraave tutë,

ëgweeso vëdëe goona,

Vëtegheeye tutë,

ëgweeso vëdëe umanya.

Nësa ti uvii sanaa vamusukëe Muungu,

Mweeso noo sawavarekëe mahutye awe.’”

Yesu uguraghira riana ra nyinkhori a mufandëi

(Mat 13:18-23; Luk 8:11-15)

13Uvii, Yesu agavawiya, “Wurë, nyee no mutimanyiena wikhori uruu? Mudaha wurë umanya wikhori mba rumwe? 14Mufandëi ugufandëa ukhani wa Muungu. Fangëja ukhani wasuu ugugwësiwaa munjëa, 15antu nëvëmukhatë ësëë vëuvutegheeya ëgweeso gënyafaafo gutufu nëvautegheeya, Setani uguja na uwuheya ukhani wasuu nëaja wafandëwaa mukhatë awe. 16Antu vangëja vii mwino mbeyu yasii nëyafandëwa mumagwe. Gënyafaafo gutufu nëvautegheeya ukhani wasuu vëuwughenyifaa gwa uyanjo, 17ëgweeso utiuvaingëa na utenda mërye mukhatë awe, vëufwaghira uwukwatëëra ukhani wasuu gwa iyoma ikufë gutufu na itungo në makhasëko mbesa urevi wadwëra gusoko a ukhani wasuu, gënyafaafo vëgimëkaa na uwurya ra utenda. 18Antu vangëja vii mwino mbeyu ëyoo nëyigagwa mukhatë a mëtë a maghuya. Usuu u wikhori wa vasaa nëvëuwutegheeya ukhani wasuu, 19ëgweeso mënyomeko a urëmi uruu, nkumbu a ughwarë na ya mantu oong'e ëguvahangaa na uwutunyiiyaa ukhani wasuu, veeso noo vëtiufaa nkhari. 20Ëgweeso vangëja vii mwino mbeyu ëyoo nënaa yafandëwe mwirongo në ija. Avaa vëuwutegheeyaa ukhani usuu, vaughenyifa, vafa nkhari: vangëja makumi atatu, vangëja makumi mutandatu na vangëja ighana.”

Gëmwii nëgëkunikëwe

(Luk 8:16-18)

21Yesu agafwaghira uvakhanëa, “Wurë, antu vëgwachaa gemwëë na ugëkunëkëa na nyunguna mba ugëvëka girunguna? Aa tiuwuu! Veugëvëka gunto a ihaghamëyo. 22Uvii, mu intu nërëfihiwe rëudwëywa daaji, na muu intu nërëkunëkëwe rëukunukuwa. 23Uvii tegheeyi, nësa mwina makutwë!”

24Agongeeya uvakhanëa, “Tegheeyi vija nëmuyategheeye! Ngeero ëyëëyo nëmuuvagheera antu vangëja, ëyëëyo Muungu ujie uvagheera nyee, kangë mugongeeywa. 25Wasuu nëukweti intu ugongeeywa ufewa, nëatikweti intu, nanë rasëë nëurëkweti uguhegheywa.”

Wikhori wa Mbeyu iharadali

26Yesu agafwaghira uhanya, “Utemi wa Muungu uu mwino muntu nëugufandëa mbeyu u muunda. 27Utiku uguraa, mumwë uraraavie, na itungo rasëë mbeyu ëgukinda na ukura, mweeso atighune nërëutendeka. 28Irongo ryeso u rëutendaa viyo vikure na ufa nkari: mwandyo rëudua itutu në inyeke, afu ilangilanga, mpeoayo mpeke mu ilangilanga. 29Viyo nëyavëya, muntu wasuu ugwandya umëtumëa njolo akwe, gusoko itungo ra matënanga rafikaa.”

Wikhori wa Mbeyu a Muharadali

(Mat 13:31-32, 34; Luk 13:18-19)

30Kangë, Yesu agahanya, “Guwikhorye Utemi wa Muungu na ntuni? Guuning'aniye gwa wikhorikë? 31Wë mwino mbeyu a iharadali në nyughuu ino ukëra mbeyu yoong'e. 32Ëgweeso nëafandëwa, ëgukindaa na utenda mutë üküü ukëra nkinda yoong'e ya umuunda. Makhanja akwe ëgutendaa makuu mbesa nyonyi ya girunde ëgudaha utenda viuri vyawe mu muure wayo.”

33Yesu agaatanantëya ukhani wakwe gwa nyinkhori ingëja nyingë në imwino yasii, agarëghëtya inaawe mwino naa vëgadaha utegheeya. 34Inarëghëtyaa inaawe intu mbanduvë gwa udëa ufunya nyinkhori, ëgweeso nënaa wë itambëëmwe na asëywi vakwe gutufu, naa uguvakhanëa mu intu daji.

Yesu ugukenëa muyughoyugho wa mpefo urike

(Mat 8:23-27; Luk 8:22-25)

35Mpëndë, itiku ërëëroërëëro, Yesu agavëëra asëywi vakwe, “Gunankëe irambo, gwende gitumbë.” 36Uvii, vëgaureka mwirundo wasuu wa antu, vëgamuhora Yesu mumasua fana naaurë. Naa gwina masua ingëja faafo. 37Uvii, muyughoyugho wa mpefo nküü ugaandya ukunka, mafefe a majë ëgamekhuva masua ësëë ëgaandya gijua majë. 38Yesu naa wëë ugësunkune ga masua, uree gunto a muuto. Uvii, asëywi vëgamufëtya na umukhanëa, “Musëyi, wurë, utighemete mwino chuu sese goohirana?” 39Uvii, agafëtya, agamëkenea mpefo ësëë na uyakhanëa mafefe a majë a irambo, “Kira! Rika!” Faafo mpefo ëgatënëka, ng'i ëgatuatwë. 40Faafo Yesu agavëëra asëywi, “Asikë në mughooghoofa? Wurë ëkëë mutikweti uhuvëina?” 41Veeso noo vëgaoghofa ino, vëgagiwiya, “Uyuu u nyanyu, gatë? Mbesa mpefo na mafefe amajë ëgumutegheeya.”

Currently Selected:

Mariko 4: RNT

Highlight

Copy