Mariko 3

Yesu ugumuforya munya mukhono wa ighandi

(Mat 12:9-14; Luk 6:6-11)

1Yesu agingëa kangë musunagogi na faafo naa urëfo muntu wina mukhono në ukure ighandi. 2Faafo naa vërëfo antu nënaa vëufenja nyinkwatëëyi vëdahe umusitaaka Yesu, uvii vëgindëa vëone mba ugumuforya muntu wasuu itiku ra Sabato. 3Yesu agamwëëra muntu wasuu nënaa mukhono ukure ighandi, “Njuu afaa usonge.” 4Uvii, agavoorya, “Wurë, mwikona itiku ra Sabato utenda intu në ija na mbesa në ibë, utyoa nkhoo mba umëuragha?” Veeso noo vëgakira. 5Faafo mweeso agavaravaava voong'e gwa makuwo, agoona uvavi gusoko a ukaku wa nkhoo yawe. Uvii agamwëëra muntu wasuu, “Ghoora mukhono wako!” Mweeso noo agaughoora mukhono wakwe, ugatendeka ufanga kangë. 6Gënyafaafo Afarisayo vëgadua gunjë vëgatenda choo itambëëmwe na antu va iburi ramwa Herode mwino vëudaha umuuragha Yesu.

Mwirundo wa antu umpeo a irambo

7Yesu agahegha faafo itambëëmwe na asëywi vakwe, agenda umpeo a irambo, na mwirundo üküü wa antu ugamuhonga. Antu vasaa naa vëfumië uYerusalemu, Uyudea, 8Idumea, gitumbë ra yongo ra Yorodani, Tiro na Sidoni. Antu vasaa vingë vëgamwendea Yesu gusoko a utegheeya mantu mingë nënaa wayatendaa. 9Yesu agavëëra aseywi vakwe vëmughondanëëye gëfe ga umajë gëmwe, gusoko a mwirundo wa antu utajee umutunyëëya. 10Nawaaforyaa antu vingë na arue voong'e vëgomutunyëëya gusoko vëdahe umutenia. 11Na antu nënaa vina vinyonyinyonyi vivë nënaa vamwona, vëgëgwisya fang'i usonge akwe na gwanga, “Veve u wë Mwana wa Muungu!” 12Ëgweeso Yesu agavyamurisya gwa uvikheefea vëtamudwëye gwa umuhanya gwa antu.

Yesu uguvahwania atumami ikumi na vavëë

(Mat 10:1-4; Luk 6:12-16)

13Yesu aganatia ugaa gëtanto, agavataana vasaa nënaa mweeso uvasëghëte. Uvii, vëgamwendea, 14mweeso agavahwaania antu ikumi na va vëë nëagavafa rina “Atumami,” vëkhee na mweeso, avatume utanantya 15na vitende vina wibali na udaho wa ujuncha vinyonyinyonyi. 16Uvii, vasaa ikumi na vavëë nëvëgahwaaniwa uu chaava: Simoni (wasuu në Yesu agamfangëa rina, Fetero,) 17Yakobo na Yohana vana vamwa Sebedayo (Yesu agavafa vauna avaa vavëë rina Boanege, rianayo, “Anaa gëtetemo.”) 18Anderea na Filipo, Batolomayo, Matayo, Toma, Yakobo mwana amwa Alifayo, Tadayo, Simoni Mukanaani na 19Yuda Isikarioti wasuu nëagamutoneera Yesu.

Yesu na Belisebuli

(Mat 12:22-32; Luk 11:14-23; 12:10)

20Yesu agenda ukhaya. Mwirundo wa antu ugihaangwiya kang'e, Yesu na asëywi vakwe vëgadëa uhanga iyoma ra ula malëwa. 21Uvii, anyandughu vakwe nënaavahanga sayu ësëë vëgadua venda umuhora gusoko naa vëuhanya mwino wajaa uhaa.

22Asëyi va Seria nënaa vëfumie uYerusalemu, vegahanya, “Ukweti Belisebuli! Kangë, uguvijuncha vinyonyinyonyi gwa nguu ya müküü wa vinyonyinyonyi.” 23Faafo Yesu agavataana agavakhanëa gwa nyinkhori, “Setani ugudaha wurë umujuncha Setani?” 24Nësa utemi rumwe watamanukaa makhakho makhakho nëëgifëngafënga, utemi wasuu utiudaha gëmëka. 25Na, nësa nyumba imwe atamanukaa makhakho makhakho nëëgifëngafënga, nyumba ësëë ëguhira. 26Uvii, nësa utemi wamwa Setani utamanukie vikhakho vikhakho utiudaha gëmëka ëgweeso uguhira hiiri.

27“Gutie muntu nëudahite umiingëëra nyumba a muntu në una nguu na umufumpa mantu akwe ëgweeso mwandyo amütunge muntu wasuu në una nguu, faafo unë udahite umufumpa mantu akwe.”

28“Tutë namwëëra antu vëurekewa mahutye awe oong'e na majumi awe oong'e. 29Ëgweeso wasuu nëugumurëghëtiaa në mabë Mwahu Mweru atiujaa arekewee mahutye mba nduvë, una ihutywe ra khae na khae.” 30(Yesu agarëghëtya uvii gusoko naa vëuhanya, “Una gënyonyinyonyi gëvë.”)

Yiu na vauna amwa Yesu

(Mat 12:46-50; Luk 8:19-21)

31Yiu amwa Yesu na vaunaakwe vëgafika faafo, vëgëmëka gunji, vëgamutoera ukhani vëufenja umwoona. 32Mwirundo wa antu naa vëkhee faafo vëmufiimukie. Uvii, vëgamwëëra, “Yiu wako anë vaunaako vëë gunji, vëugufenja.” 33Yesu agavakhanëa, “Yiu wanë nanë vaunaanë uu vaa anyu?” 34Faafo agavararaava antu nënaa vëëmufëëmëye, agahanya, “Raraavi! Avaa unë vaa Yiu vanë nanë vaunaanë. 35Muntu woong'e nëugutenda në Muungu ugufenja, atende, wasuu unë mwunaanë, mwanitu na yiu wanë.”

Currently Selected:

Mariko 3: RNT

Highlight

Copy