Mariko 15

Yesu usonge amwa Filato

(Mat 27:1-2, 11-14; Luk 23:1-5; Yoh 18:28-38)

1Nënaa gwacha, akumbëki aküü vëgaveeveetya itambëëmwe na anyampaa, asëyi va Seria na Ibarasa roong'e, vëgamutunga Yesu mpëëngu vëgamutoa kunu Filato. 2Filato agamuwiya Yesu, “Wurë, veve wëë Mutemi wa Ayahudina?” Yesu agasucha, “Veve wahanyaa.”

3Akumbëki aküü vëgamusitaaka Yesu mantu mingë. 4Filato agamuwiya kangë Yesu, “Wurë utiusucha ukhanina? Raraara mwino vëuduya makeesi ming'e kunu veve.” 5Ëgweeso Yesu inasucha ukhani, nanë Filato agataka.

Yesu uguramuiywa ikuya

(Mat 27:15-26; Luk 23:13-25; Yoh 18:39–19:16)

6Mu itungo ra sigunkuu Filato naa una ntende a umutungwëëra mutungwa umwe nënaa vëumufenja. 7Uvii, mukhatë a antu nënaavëtungiwe gusoko a mahutye a wuuraghi mu wikhuvi naa guna muntu umwe ugutaanwaa Baraba. 8Antu vingë vëgamwendea Filato vëgamuromba avatendëë mwino naa ëgujaa ntende akwe. 9Filato agavawiya, “Wurë, muufenja nëmutungwëëre Mutemi wa Ayahudina?” 10Agahanya uvii gusoko naa umanyie daaji mwino akumbëki aküü vëgamutoa Yesu kune mweeso gusoko a ghusia.

11Ëgweeso akumbëki aküü vëgavasusutëya antu vëmurombe Filato avatungwëre Baraba. 12Filato agawawiya kangë, “Uvii, itungwee muufenja nëtende ntuni na muntu uyuu nëmuumutaana Mutemi wa Ayahudi?” 13Antu voong'e vëganga kangë, “Mukhome!” 14Ëgweeso Filato agavawiya, “Gusokokë? Watenda ihutyekë?” Ëgweeso veeso vëgafwangëëra gwanga, “Mukhome!”

15Filato agafenja uvuyanjisya mwirundo usuu wa antu, uvii, agamurekëa Baraba ufuma ugeresa. Agaraghëëya Yesu akhuwe makhotya, faafo agamuduya akhomwe.

Asikee vëumukuna Yesu

(Mat 27:27-31; Yoh 19:2-3)

16Uvii asikee vëgamutoa Yesu umwaango aküü, mu ikulu, vëgahangwiya iburi ifanga ra asikee. 17Vëgamuriecha isaa ra ikeru ikhooku, vëgatuma ngaa a maghuya, vëgamutendeya gitwe. 18Vëgaandya umuramucha, “Amucha Mutemi wa Ayahudi!” 19Vëgamukhuva gitwe gwa itë, vëgamutiera mate, vëgatungama na umukurya. 20Nënaa vadaha umwiisëya, vëgamuruecha ijooho rësëë, vëgamuriecha masaa akwe, faafo vëgamutoa umukhoma.

Yesu ugukhomwa

(Mat 27:32-44; Luk 23:26-43; Yoh 19:17-27)

21Nënaa vëë munjia vinjë, vëgatang'ana na muntu umwe ugutaanwaa Simoni, muntu wa Ukurene. Mweeso naa ihe amwa Alekisanda na Rufo na itungo rasëë naa ufumie umuunda. Uvii, vëgamwoonyeya ahore musalaba wamwa Yesu. 22Uvii, vëgamutoa Yesu faka fana guutanwaa Goligota, rianaayo fana Ikufa ra Itwe. 23Vëgamufa divai nënaa ëhangëënkhaniwe na manemane, ëgweeso mweeso agamëhita. 24Uvii vëgamukhoma, vëgavaghana masaa akwe gwa uyakhuvëa kuura vëramue anyu uguhanga ntuni. 25Naa itungo ra gatatu diu nënaa vëgamukhoma. 26Na gëmanyiko ga masitaaka akwe naa gëandëkiwe: “Mutemi wa Ayahudi.” 27Itambëëmwe na mweeso vëgakhomwa ahëmbi vavëë, umwe guuvaru wa gëlëlo na ungëja guuvaru wa gëmoho. 28Faafo ëgakhondeka Maandëko Meru nëahanyiye, “Agavëkwa ikako rëmwe na abë.”

29Antu nënaa vëukëra faafo vëgamutuka, vëuhingisya matwe awe na uhanya, “Aa! Veve munyaumëkhonta Nyumba a umukurya Muungu gwa matiku atatu! 30Itungwee, tununta umusalaba, ifonie veve mughonjo!” 31Akumbëki aküü noo itambëëmwe na asëyi va Seria vëgamukuna vëuhanya, “Agavafonia vangëja, ëgweeso gëfonia mweeso atiudaha! 32Atee mweeso uu Masiha, Mutemi wa Isiraeli! Uvii, itungwee në atununte ufuma umusalaba faafo goone na uhuvëa.” Nanë antu vasaa nënaa vëkhomiwe itambëëmwe na mweeso vëgamutuka.

Yesu ugukuya umusalaba

(Mat 27:45-56; Luk 23:44-49; Yoh 19:28-30)

33Ufuma itungo ra mutandatu mumwe faka itungo ra kenda naa gwii kiti ng'ë ong'e. 34Itungo ra kenda mugëfaghatëo Yesu agëëra gwa ruri üküü uguhanya, “Eloi, Eloi, Lama sabakitani?” rianaayo, “Muungu wanë, Muungu wanë, njuchuu wandeka?” 35Mukhatë a antu nënaavimëkie faafo nënaa vategheeya uvii, vëgahanya, “Tegheeya! Ugumutaana Eliya.” 36Muntu umwe agamanka agamëhombya sifongo mu siki, agamëvëka gunto a ukito agamufa anywe uguhanya, “Tiarë goona nësa Eliya ujie umusimya fang'i umusalaba!” 37Yesu agaanga gwa ruri aküü, agatëna nkhoo.

38Uvii, ifufa ra Nyumba a umukurya Muungu rëgatamuka mafaja avëë ufuma gunto faka fang'i. 39Musikee umwe nënaa wëmëkie usonge akwe, nënaaawoona mwino Yesu agëëra na utëna nkhoo, agahanya, “Tutë muntu uyuu naa Mwanaa a Muungu!”

40Naa vërëfo noo akhema nënaa vëraraavie gwa kure, mukhatë awe naa Maria Magidalene, Salome, na Maria nyinya amwa Yakobo nëmunyughuu na Yose. 41Avaa vëgamuhonga Yesu nënaa wëë Ugalilaya na umutumamëa, naa gwina akhema vangëja vingë nëvëgaja uYerusalemu itambëëmwe na mweeso.

Yesu uguvëkwa

(Mat 27:57-61; Luk 23:50-56; Yoh 19:38-42)

42Itungo ra mpëndë naa radaha ufika. Rësëë naa itiku ra Maghondanëëyo, itiku nërëutongeraa Sabato. 43Faafo agaja Yosefu muntu wa Arimataya, muntu wa Ibarasa iküü, naa umanyëkie ino. Mweeso noo naa wëëndëre uja gwa Utemi wa Muungu. Uvii, agamwendea Filato gwa udëa umooghofa, agaromba afewe mwërë wamwa Yesu. 44Filato naagafënja umanya mba Yesu naa wakuyaa. Uvii, agamutaana musikee, agamuwiya mwino itungo naa narifaana fana Yesu naa wakuëyaa. 45Filato nënaa wëërwa na musikee wasuu müküü mwino itungo naa rakëraa fana Yesu naa wakueyaa, agamuyanjëya Yosefu guuhora muvëë wakwe. 46Faafo Yosefu agaghura saanda a gëtani, agawicha fang'i muvëë wasuu, agaufëëmëya na Saanda. Agauvëka mumbëlëlo nënaa ëghondanëëywe mwitalaghwe faafo agarëfingiitya igwe iküü usonge a momo wa mpanga. 47Veeso noo Maria Magidalene na Maria nyinya amwa Yose vëgoona faafo fana naa wavëkwaa.

Currently Selected:

Mariko 15: RNT

Highlight

Copy