Mariko 16

Ufëtyo wamwa Yesu

(Mat 28:1-8; Luk 24:1-12; Yoh 20:1-10)

1Nënaa itiku ra Sabato rakëra, Maria Magidalene, Salome na Maria nyinya amwa Yakobo vëgaghura manukato gwenda uvuvira mwërë wamwa Yesu. 2Uvii, diu në nküü itiku ra Jumafërë, vëgafika mumbëlëlo, yuva nënaa randya udua. 3Veeso noo vëgaa giera, “Anyu winjë uguhegheya igwe iroo mu momo wa mbëlëlo?” 4Ëgweeso nënaa vararaava, vëgoona igwe raheyiwaa Ryeso noo na iküü ino. 5Nënaa vingëa mumbëlëlo, vëgamwoona muhumba umwe nënaa urie isaa ryeru, wëkhee guuvaru wa gëlëlo, vëgataka go.

6Ëgweeso muhumba wasuu agavëëra, “Mutatakee. Muumufenja Yesu wa uNasareti nënaa wakhomiwe. Wafëtyaa, atifo afaa. Raraavi fana naa vamuvëkaa. 7Endi mwuakhanëe asëywi vakwe itambëëmwe na Fetero mwino wamutongeeraa ukoo Ugalilaya. Kuuko muumwoona mwino naawamwëëre.”

8Uvii, vëgadua faafo umbëlëlo vemankie, gusoko naa vëukhakhata gwa wova na utaka. Vënamwëëraa muntu mba umwe intu gusoko vëgaoghofa ino.

Yesu ugumudwëëra Maria Magidalene

(Mat 28:9-10; Yoh 20:11-18)

9Yesu nënaa wafëtya diu Jumafërë, agidwëëya mwandyo kunu Maria Magidalene, wasuu nënaa Yesu agamudwëya vinyonyinyonyi mufungatë. 10Mweeso Maria Magidalene ageenda, agavahughua vasaa nënaa viitambëëmwe na Yesu, na itungo rësëë naa vëuhongeeya na gëëra. 11Ëgweeso nënaa vategheeya mwino Yesu chuu mufanga na mwino Maria Magidalene wamwoonaa, vënahuvëaa.

Yesu uguvadwëëra asëywi vavëë

(Luk 24:13-35)

12Nënaa asaa akëra Yesu agavadwëëra asëywi vavëë wina ikeru rëngë. 13Vesoo noo vëgenda uvakhanëa vooya. Ëgweeso noo vënahuvëaa.

Asëywi vëutumwa

(Mat 28:16-20; Luk 24:26-49; Yoh 20:19-23; Nte 1:6-8)

14Mpeoayo Yesu agavadwëëra asëywi ikumi na umwe nënaa viitambëëmwe mumeesa. Agavakenëa nanguu gusoko a udëa uhuvëa kune veeso na ukaku wa nkhoo yawe, gusoko venavahuvia vasaa nënaa vamwoonaa nënaa yuu wafëtyaa. 15Uvii, agavëëra, “Endi muurëmi woong'e mutanantye Sayu Njija gwa mu muntu. 16Nëwang'uvëa na ubadiswa ugutyoeka. Nëwadëa uhuvëa uguramuiywa. 17Na ndolyo iyii yutendeka na vasaa nëvëng'uvëe: gwa rina ranë vëuduya vinyonyinyonyi na vëurëghëtya gwa murëghëtyo nëufya. 18Nëvakwata njoka mbesa nëvanywa intu gëkaku nërëna sumu, vetiuva intu. Vëuvëka mekhono awe gunto a arue, veeso noo vëufora.”

Yesu ugunantya girunde

(Luk 24:50-53; Nte 1:9-11)

19Uvii, Müküü Yesu nënaa wadaha urëghetya inaawe, agahorwa girunde, agëkhaa uvaru wa gëlëlo wa Muungu. 20Asëywi vëgenda vëutanantya ng'ande yoong'e. Müküü agatenda mwëmo itambëëmwe na veeso na uwukhamëchëëya ukhani wasuu gwa ndolyo nënaa yimukhatë ayo. Amina.

Currently Selected:

Mariko 16: RNT

Highlight

Copy