Mariko 14

Mufango wa umuuragha Yesu

(Mat 26:1-5; Luk 22:1-2; Yoh 11:45-53)

1Naa ësaghie matiku avëë gutufu ëfike sigunkuu a Fasaka nanë a Mikaate nëëtësasie. Akumbëki aküü na asëyi va Seria naa vëufenja njia a umukwata Yesu gwa lakuno vëmuuraghe. 2Ëgweeso vëgahanya, “Tajee gumukwate iyoma ra sigunkuu, antu taja vëjë utenda mukindo.”

Yesu uguvirwa makuta Ubetania

(Mat 26:6-13; Yoh 12:1-8)

3Yesu naa wëë Ubetania, ukhaya amwa Simioni Munyamatana. Nënaa wëë umesa ale malëwa, mukhema umwe nënaa wëna galëmbo ga ikuta ra urumba ra ughuri üküü agaja, agagabelua galëmbo gasaa, agamumiminëa Yesu urumba usuu gitwe. 4Mukhatë a antu nënaa vërëfo faafo vëgahura vëgiëra, “Sokokë uyaghaya noosoo urumba uruu? 5Aja idahëte urinjwa gwa hela dinari maghana atatu, vafewa atuki!” Vëgamukenëa mukhema wasuu.

6Ëgweeso Yesu agavëëra, “Mureki, gusokokë muu munyoma? Watendaa intu ija. 7Atuki mwinawe matungo oong'e itambëëmwe nanyee, muudaha uvaariya itungo roong'e nëmwayanja. Ëgweeso nene ntiutenda itambëëmwe nanyee matungo oong'e. 8Mweeso watendaa mwino aja udahite, wooviraa mwërë wanë urumba uwughondanëya gwa uvikwa. 9Ngumukhanëa tutë, urëmi woong'e fana Sayu Njija ijeutanantiwa, intu ërëë nëwarëtendaa rëuhanywa gwa umukumbukwa.”

Yuda ugumutoneera Yesu

(Mat 26:14-16; Luk 22:3-6)

10Uvii Yuda Isikarioti, umwe wa vasaa ikumi na vavëë, ageenda kunu akumbëki aküü gusoko amutoneere Yesu. 11Akumbëki aküü nënaa vategheeya sayu asëë, vëgayanja vëgaraghana umufa hela. Uvii, Yuda agaandya ufenja iyoma ra umutoneera.

Yesu ugutenda sigunkuu a Fasaka itambëëmwe na asëywi vakwe

(Mat 26:17-25; Luk 22:7-14, 21-23; Yoh 13:21-30)

12Itiku ra mwandyo ra sigunkuu a Mikaate nëëtisasie, itungo në mwaankhoo wa Fasaka ugukigitwaa, asëywi vakwe vëgamuwiya, “Ugufenja gugughondanëëye fe ilëwa ra Fasaka?”

13Uvii Yesu agavatuma vavëë va asëywi vakwe uguvëëra, “Endi umujini, na faafo mutang'ana na muntu umwe nëukenkete siva a majë. Muhongi, 14faka mukhaya nëwinjë gingëa, mumwëëre munya khaya, ‘Musëyi uguhanya: wëëfe mwaango wanë fana nëjeula Fasaka itambëëmwe na asëywi vanë?’ 15Mweeso noo ugumuraghëëra mwaango ugharë mu oroofa nëwaghondanëëywe na uwudona. Gughondanëëyi faafo.”

16Asëywi vëgatunguya, vëgenda umujini, vëgahanga mu intu rëuvii mwino Yesu naa wavakhanëa. Vëgaghondanëëya ilëwa ra Fasaka. 17Nënaa aa mpëndë, Yesu agafika itambëëmwe na asëywi vakwe ikumi na vavëë. 18Nënaa vëumesa vëula, Yesu agahanya, “Tutë ngumukhanëa, umwe wanyu nëugula itambëëmwe na nee uguntoneera.” 19Faafo asëywi vakwe vëgaandya usimba, vëgamuwiya umweemwe, “Wurë, u nenena?” 20Yesu agavëëra, “Uu në umwe wanyu nyee mwë ikumi na vavëë nëugusinëëya mukaate itambëëmwe na nee müükuu. 21Tutë MwaaMuntu winjë kunu winjë mwino Maandëko Meru ëgumuhanyaa, gweeso, hëhëë akwe muntu wasuu nëugumutoneera MwaaMuntu! Sanaa bahu gwa muntu wasuu nësa inafafwaa!”

Ilëwa ra Müküü

(Mat 26:26-30; Luk 22:14-20; 1Ko 11:23-25)

22Nënaa vëula, Yesu agaduya mukaate, agafunya asi, agauvegha na uvafa asëywi vakwe uguhanya, “Hori uruu unë muvëë wanë.” 23Faafo agaduya gëkoombe, agamudwëëya asi Muungu, agavafa, vëganywa mugëkoombe gësëë. 24Agavëëra, “Ëyëë unë saghami anë a iraghano ra Muungu, saghami nëëguhunuwa gusoko a antu vingë. 25Tutë namwëëra, ntiunywa kangë divai akhari ya musabibu faka itiku rësëë nëikwë nëjëe unywa nëmpya mu Utemi wa Muungu.” 26Faafo vëgëëmba ryëmbo, vëgatunguya, vëgenda mu Ughongo wa Miseituni.

Yesu uguhanya mwino Fetero ujie umukhana

(Mat 26:31-35; Luk 22:31-34; Yoh 13:36-38)

27Yesu agavëëra asëywi vakwe, “Nyee nyoong'e muuhanga wisaghasaghii nanee, gusoko Maandëko Meru ëguhanya, ‘Ngumukhuva mudëmi nkhoo noo igufaghata.’ 28Ëgweeso nëikwë nafëtya ngumutongeera uko Ugalilaya.” 29Fetero agamwëëra, “Na mbesa voong'e vëutenda vina wisaghasaghii na vee na ugureka, nene ntiugureka kamwe!” 30Yesu agamwëëra, “Tutë nagwëëra utiku uruu, nëkëë jololo inakunkua mëhënjo ëvëë, ugunkhana mëhënjo itatu.” 31Ëgweeso Fetero agatintaara uhanya, “Na mbesa inoneye ukuya itambëëmwe na vee, ntiugureka mbanduvë.” Asëywi voong'e noo vëgahanya uvii.

Yesu uguromba ubusitani a uGetisemane

(Mat 26:36-46; Luk 22:39-46)

32Uvii, vëgafika mubusitani nënaa ëgutaanwaa Getisemane. Yesu agavëëra asëywi vakwe, “Ëkhai afaa itungo në nee nguromba.” 33Agavahora Fetero, Yakobo na Yohana, agaandya ukhasëka ino na ulwa. 34Agavëëra, “Nënaa uvavi üküü munkhoo ngiinga ukuya. Ëkhai afaa na mutaree.” 35Agenda usonge nduvingë, agigwësya fang'i agaromba mwino, nësa igudahëka, tajee arëkëëre itungo rësëë ra makhasëko. 36Agahanya, “Tata wanë, kunu vee mantu oong'e ëgudahikaa. Gëheye kunu nee ükuu uru wa makhasëko. Ëgweeso itatendee mwino nene nëanjëte, ëgweeso mwino ugufenja veve.”

37Uvii agasuka gwa asëywi vasaa nëvatatu, agavahanga varaa. Agamuwiya Fetero, “Simoni, wurë, waraana? wadëa ughimëya uraa mbesa itungo rëmwena?” 38Faafo agavëëra, “Fëti na uromba mutajee gingëa mumaghemwa. Nkhoo ësëghëte, ëgweeso mwërë ulegheku.”

39Agenda uromba kangë ugusukëëra nkani iyiiyo. 40Agasuka kangë, agavahanga varaa too. Miho awe naa itofaa na too. Vëgawurya ra umusucha.

41Nënaa waasukia muhënjo wa gatatu agavëëra, “Ëkëë muree na utuyana? Itungwee gwadahëkaa! Itungo rafikaa! MwaaMuntu wootendewa mumëkhono a antu në abë. 42Wuki, kwendi kunu gwinjë. Raraavi, wasuu nëujie untoneera wahumberaa.”

Yesu ugukwatwa

(Mat 26:47-56; Luk 22:47-53; Yoh 18:3-12)

43Yesu nënaa ëkëë ugurëghëtya, Yuda, umwe wa vasaa ikumi na vavëë, agafika, itambëëmwe na irumbë ra antu nëvëna matemeo na mafënë. Antu vasaa naa vatumwaa na akumbëki aküü, asëyi va Seria na anyampaa. 44Mutoneeri Yuda naa waafaa gëmanyëkëo: “Wasuu nëngumutomya uyuuyo wasuu, mukwati na umuhora gwa umughoja.”

45Yuda nënaawafika gutufu, agamwendea Yesu ughookie daa, agamwëëra, “Musëyi!” Faafo agamutomya. 46Uvii, antu vasaa vëgamukwata Yesu, na umutendea mumëkhono a ughoji. 47Umwe wa vasaa nënaa vëmëkie faafo itambëëmwe na Yesu, aghofoa itemeo rakwe, agamukhuva mutumami wamwa Mukumbiki Müküü, agamutema ikutwe. 48Yesu agavëëra, “Wurë, mwajaa na matemeo na mafënë unkwata mwino nee nëmufumpi? 49Mu itiku naa nëitambëëmwe nanyee ngusëya mu Hekalu, na naa mwinankwataa. Ëgweeso itungwee inoneye Maandëko Meru ëkhondeke.” 50Faafo asëywi voong'e vëgamureka, vamanka. 51Naa guna mubalanda umwe nënaa umuhongie Yesu witungie mweenda. Vesoo noo vëgafenja umukwata. 52Ëgweeso mweeso agavatigha, agarëreka mweenda rësëë, agamanka wë gëfuyu.

Yesu usonge a Ibarasa ra anyampaa

(Mat 26:57-68; Luk 22:54-55, 63-71; Yoh 18:13-14, 19-24)

53Uvii, vëgamutoa Yesu kunu Mukumbëki Müküü fana naa akumbëki aküü voong'e, anyampaa na asëyi va Seria naa vatang'anaa. 54Fetero agamuhonga Yesu gwa kure, agingëa mukhatë a musee wamwa Mukumbëki Müküü, agëkhaa itambëëmwe na aghoji ugoota moto. 55Akumbëki aküü na Ibarasa voong'e vëgafenja usudanga wa umusitaaka Yesu vëdahe umuuragha, ëgweeso vinahangaa.

56Antu vingë vëgaduya usudanga wa weegheeghee kune Yesu, ëgweeso usudanga wawe naa wëë syasya. 57Faafo vangëja vëgimëka, vëgaduya usudanga wa weegheeghe vëuhanya, 58“Gwamutegheeye muntu uyuu uguhanya, ‘Ngurëruvanga Hekalu ërëë nërajengiwe na mëkhono, na gwa matiku atatu ngurëjenga rëngëja nërënajengwaa gwa mëkhono.’” 59Gweeso, mbesa uvii, usudanga wawe naa wëë syasya.

60Uvii, Mukumbëki Müküü agimëka mukhatëkhatë awe, agamuwiya Yesu, “Wurë, utiusucha ukhanina? Antu avaa vëugusudangëa vee ntuni?” 61Ëgweeso mweeso agakira twi, inahanyaa ukhani mbesa rumwe. Mukumbëki Müküü agamuwiya kangë, “Wurë, veve u wëë Masiha, Mwana aa Muungu Mukuriwana?” 62Yesu agasucha, “Nhaa, nene u nee mweeso. Kangë, mumwoona MwaaMuntu wëkhee uvaru wa gëlëlo wa Munya Nguu, ujie mukhatë a maunde a girunde.” 63Faafo Mukumbëki Müküü agarëhafua ijooho rakwe, agahanya, “Gwina sokokë kangë a ufenja usudanga? 64Mwategheeyaa ijumi rakwe! Nyee mwoona wurë?” Voong'e vëgaramua mwino inoneye auraghwe. 65Uvii, mukhatë awe vëgaandya umutiera mate, vëgamutunga mpuna, vëgamutura nkundë na umwëëra, “Raghua! u anyu në wagukhuvaa?” Nanë aghoji vëgamuhora vëgamutura nkundë.

Fetero ugumukhana Yesu

(Mat 26:67-75; Luk 22:56-62; Yoh 18:15-18, 25-27)

66Fetero nënaa ëkëë wëë muu ukumbë, umwe wa atumami va gëkhema vamwa Mukumbëki Müküü agaja. 67Nënaa wamwoona Fetero ugota moto, agamuraraava, agamwëëra, “Nanë veenoo naa wëitambëëmwe na Yesu Munasareti.” 68Ëgweeso agakhana uguhanya, “Ntighune, ëgweeso ntiëmanyie nëugurëghëtya!” Faafo Fetero agatunguya, agenda gunjë gihanja. Faafo njololo ëgakünküa. 69Muncha wasuu nënaa wamwoona Fetero kangë, agaandya kangë uvëëra antu nënaa vimëkie faafo, “Muntu uyuu uu umwe wawe.” 70Fetero agakhana kangë. Khee inakura, antu nënaa vimëkie faafo vëgamwëëra Fetero, “Fana tutë veve wëë umwe wawe, gusoko veve wëë Mugalilaya.”

71Ëgweeso Fetero agaandya uraghanëëra na girafëa uguhanya, “Nene ntimumanyie muntu uyuu nëmuurëghëtya sayu yakwe.” 72Faafo Njololo ëgakunkua muhënjo wa gavëë. Uvii, Fetero agakumbukwa mwino Yesu naa agamukhanëa: “Nëkëë Njololo inakunkua mëhënjo ëvëë ugunkhana mëhënjo ëtatu.” Fetero agarumya ndighiigho.

Currently Selected:

Mariko 14: RNT

Highlight

Copy