Mariko 10

Gireka

(Mat 19:1-12; Luk 16:18)

1Yesu agahegha kuuko agenda ntumbi a Uyahudi agafika uyongo ra Yorodani. Maumbë a antu ëgamwendea kangë, na mwino chuu noo ugutendaa agavasëya. 2Afarisayo vëgamwendea na gwa umusimanga vëgamuwiya, “Wurë, gunoneyena muntu umureka mukhemaakwe?”

3Yesu agasucha, “Musa naa wamukhanëe ntuni?” 4Veeso noo vëgahanya, “Musa naa wahanyiye mughosya amufe mukhemaakwe ryandëko ra gireka na umureka.”

5Yesu agavasucha agahanya, “Musa agamwandëkëa iraghëyo rësëë gusoko naa mwëkhani nkaku mutiutegheeyaa. 6Ëgweeso udua mwandyo wa utundwa urëmi, Muungu aguumba mughosya na mukhema. 7Gusoko ësëë muntu uguvareka ihe ina nyinya vëkhuvie vëna mukhemaakwe, 8na avaa vavëë veeso noo vëutendeka mwërë rumwe. 9Në Muungu warëkundëkie muntu atarëkundukue.”

10Nanë ukhaya kangë asëywi vëgamuwiya sayu a ukhani wasuu. 11Mweeso noo agavëëra, “Nëugumureka mukhemaakwe na uroghoa ungëja ugutenda ufumbu na umuhutya mukhemaakwe. 12Na mukhema nëwamureka mughosyaakwe na uroghowa na ungëja ugufumba.”

Yesu uguvaforya ang'ënya

(Mat 19:13-15; Luk 18:15-17)

13Antu vëgamwetea Yesu ang'ënya në anyuughuu avatenie, ëgweeso asëywi vakwe vëgavakenea. 14Yesu nënaa woona asaa, agakheefa agavëëra, “Vareki ang'ënya vasaa vije kune nee tajee muaghëëye gusoko Utemi wa Muungu uu ni gusoko a antu nëvëgëtë ang'ënya avaaa. 15Ngumukhanëa tutë, muntu woong'e nëwadëa uwughenyifa Utemi wa Muungu mwino mung'ënya në munyuughuu atigingëa mu Utemi wasuu.” 16Faafo noo agavahora mumëkhono akwe, agavavëkëa mëkhono akwe gunto awe, agavaforya.

Muntu nënaa mughwarë

(Mat 19:16-30; Luk 18:18-30)

17Yesu nënaa wandya kangë muhënjo wakwe, muntu umwe agaja umankie, agatungama agamuwiya, “Musëyi në muja, ntende ntuni nëdahe uwusaa ufanga wa khae na khae?” 18Yesu agamusucha, “Asikë nëuguntaana muja?” Gutie në muja ëgweeso u Muungu imwenedu. 19Uyamanyie maraghëëyo: “Na Utafumbee, utauraghee, utaivee, Utaduyee usudangëi wa weegheeghe, Utaegheeghee, vakurye ho ina yiu wako.” 20Mweeso noo agamusucha, “Musëyi, ayaa oong'e nayakwatëëre udua ubalanda wanë.” 21Yesu agamuraraava, agamuyanja, agamwëëra, “Ugufenjiwa utende intu remwe, enda urinje oong'e nëukweti, uvafe atuki, veenoo uguhanga ughwari girunde, newadaha njuu ung'onge.” 22Nënaa wategheeya asaa, agahura, agenda kune winjë wina uvavi gusoko naa mughwari nanguu.

23Yesu agararaava mbaru yoong'e, agavëëra asëywi vakwe, “Gukaku wurë gwa aghwarë gingëa mu Utemi wa Muungu.” 24Asëywi vëgatachiwa na nkhani yakwe. Yesu agavëëra kangë, “Anaanë, gukaku ino gingëa mu Utemi wa Muungu! 25Guoro nanguu ngamëa uhefeera mu iboyo ra mukufa ukëra mughwarë gingëa mu Utemi wa Muungu.” 26Asëywi vakwe vëgataka ino vëgagiwiya, “Uu anyu, nëudahite utyoeka?” 27Yesu agavararaava agavëëra, “Gwa mwa muntu itiudahika, ëgweeso kune Muungu ti uvuu, gusoko kune Muungu oong'e igudahikaa.”

28Fetero agamwëëra, “See noo wurë? Gwarekie oong'e gwaguhonga vee!” 29Yesu agahanya, “Tutë namwëëra, mu muntu nëwarekie khaya mbesa muuna mbesa muhaja, mbesa gusoko anë na gusoko a Sayu Njija, 30mumatungo ayaa, uguhanga mëhënjo ighana ukëra khaya, muuna, muhaja, nyinya, ang'ënya na mëunda itambëëmwe na makhasëko na matiku në ëjie uguhanga ufanga wa khae na khae. 31Ëgweeso vingë nëva mwandyo vëutendeka vya umpeo, na va umpeo vëutendeka vya mwandyo.”

Yesu uguhanya muhënjo wa gatatu ikuya na ufëtyo wakwe

(Mat 20:17-19; Luk 18:31-34)

32Uvii, naa vëë munjëa vinje uYerusalemu Yesu mweeso naa uvatongeere. Asëywi vakwe vëgahanga wova vegaoghofa, na antu nënaa vëhongie vëgooghofa. Yesu agavahora kangë umpeo vasaa ikumi na vavëë, agaandya uvakhanëa asaa nëëjie umuhanga. 33“Tegheeyi! Gwinjë uYerusalemu, na kuuko MwaaMuntu ugutowa kunë akumbëki aküü na aseyi va Seria, veeso vëumuramuiya auraghwe na umutoa kunë antu va ndughu. 34Veeso veumuhorya na khani, vëumutyëera mate, vëumukhuva makhotya na umuuragha. Na në matiku atatu akëra ugufëtya.”

Irombi ramwa Yokobo vina Yohana

(Mat 20:20-28)

35Yakobo vina Yohana, vanaa amwa Sebedayo, vëgamwendea Yesu vëgamwëëra, “Museyi, guufenja ugutendëe intu nëguuguromba.” 36Yesu agavawiya, “Muufenja nëmutendëe ntuni?” 37Vëgasucha, “Uguyanjëye khaa umwe mukhono wako wa gëlëlo na ungëja guuvaru wa gëmoho nëikwë wakuriwa.” 38Yesu agavëëra, “Mutimanyie muuromba ntuni! Wurë, mudahana unywa gëkombe ga makhasëko nënëjie ugënywa mbesa ubadiswa mwino nëjie ubadiswa?”

39Vëgamusucha, “Guudaha.” Yesu agavëëra, “Gëkombe në nëugënywa muugënywa tutë, na muubadiswa mwino nëubadiswa. 40Ëgweeso gëkhaa ugëlëlo mbesa ugëmoho kune nee ti mwëmo wanë utenda uvii ëgweeso vëufëwa nëvaghondanëërëywe.”

41Asëywi vangëja avoo ikumi nënaa vategheeya asaa, vëgaandya uhurisiwa na Yakobo ina Yohana. 42Yesu agavataana, agaveera, “Mumanyie mwino vasaa nëvavarëywe utenda atemi va ndughu vëuvibalaa antu vasaa gwa nguu, na aküü vasaa vëuvëkheeraa antu vawe. 43Ëgweeso itatendekee uviii kune nyee, ëgweeso nëugufenja utendeka müküü mukhatë anyu inoneye atende mutumamë wanyu. 44Nëugufenja utenda wa mwandyo inoneye atendeke mutumami wa voong'e. 45Gusoko MwaaMuntu ainajaa utumamëwa, ëgweeso utumama, na uduya uduvë wakwe utende ndëfi a antu vingë.”

Yesu ugumuforya mufoku nëugutaanwa Batirimayo

(Mat 20:29-34; Luk 18:3-43)

46Uvii, vëgafika uYeriko, Yesu mweeso nënaa ugudua mu muji wasuu wëna asëywi vakwe itambëëmwe na mwirundo üküü wa antu, mufoku murombi ugutaanwa Batirimayo mwana amwa Timayo naa wëkhee umpeo a ibara. 47Nënaa wategheeya mwino uu Yesu wa uNasareti naa ukëëra faafo agaandya gwaanga, “Yesu, Mwana amwa Daudi. Nyonea Uvavi!”

48Antu vingë vëgamukenea akire, ëgweeso mweeso agafwaghira gwaanga, “Mwana amwa Daudi, nyonea uvave!”

49Yesu agimëka, agahanya, “Mutaani.” Uvii, vëgamutaana mufoku wasuu, vëgamweera, “Khomya nkhoo! Imëka, ugugutaana.”

50Mweeso noo agarëjughuta ukoo isaa rakwe, agarëghëma gunto, agamwendea Yesu.

51Yesu agamuwiya, “Ugufenja nëgutendëe ntuni?” Mufoku wasuu agamwëëra, “Musëyi, nguromba nëdahe goona kangë.”

52Yesu agamwëëra, “Enda, uhuvëi wako waguforyaa.” Gënyafaafo mufoku wasuu agadaha goona kangë, agamuhonga Yesu mu muhënjo wakwe.

Currently Selected:

Mariko 10: RNT

Highlight

Copy