Mariko 9

1Yesu agafwaghëëra uvakhanëa, “Tutë namwëëra, vërëfo vangëja afaafanëvëtiusoya ukuya nëkëë vënawoona Utemi na wëbali wa Muungu në ujie gwa Ukuu wa weru.”

Yesu ugufeuka ikeru

(Mat 17:1-13; Luk 9:28-36)

2Nënaa matiku mutandatu akëra Yesu agavahora Fetero, Yakobo na Yohana gunto a gëtanto gërifu veeso atufu. Kuuko, nëvëëmuraraavie, Yesu agafeuka ikeru rakwe, 3masaa akwe ëgaaufëmpëna, ëgatendeka meru gëtoo, gutie muhomboi mba umwe mu urëmi nëugudaha uyerye uvii. 4Na Eliya nanë Musa vëgavadwëëra, vëgarëghëtya inaa Yesu. 5Fetero agamwëëra Yesu, “Müküü, uu guja ino mwino chuu gwiafaa. Uvii, bahu gujenge nkhango itatu: imwe ako imwe amwa Musa na imwe amwa Eliya.” 6Mweeso na vooyakwe vëgooghofa uvii (na uwurya ra uhanya.) 7Faafo noo irunde rëgadwëëra naviutanka rëgavakunëkëa, na ruri ugategheeyeka ufuma mwirunde rësëë, “Uyuu unë Mwananë muyanjwi, mutegheeyi.” 8Gënyafaafo asëywi vasaa vëgararaava kangë, ëgweeso vënamwoona muntu ungëja, ëgweeso Yesu imwene itambëëmwe inaawe.

9Nënaa vegiika ugëtanto, Yesu agavaghëëya umukhanëa muntu mba umwe mantu nënaa vayoona faka MwaaMuntu nëikwë wafëtya ufuma gwa akuyi. 10Uvii, vëgarëkwatëëra iragheyo rësëë, ëgweeso vëgaa uvëëvëëtya veeso gwa veeso riana ra ufëtya ufuma gwa akuyi. 11Vëgamuwiiya Yesu, “Asikë asëyi va Seria vëuhanya mwino inoneye Eliya aje tanju?” 12Mweeso agavasucha, “Nhaa, Eliya ujie tanju ughondanëëyaong'e. Ëgweeso gwayo gusokokë, uvii, ëandikiwe mu Maandëko në Meru mwino MwaaMuntu uguhangwa na makhasëko mingë na uhoriwa? 13Gweeso, namwëëra, Eliya wadahie uja, veeso noo vëgamutendea mwino naavëufenja mwino naawaandëkëwe.”

Yesu ugumuforya mung'ënya në wina gënyonyinyonyi

(Mat 17:14-21; Luk 9:37-43a)

14Nënaa vaafikëa asëywi vangëja avoo, vëgoona mwirundo üküü wa antu faafo. Na mukhatë a asëyi va Seria naa vëuvëëvëëtya inaawe. 15Mugënyafaafo gutufu mwirundo usuu wa antu nënaa wamwoona, voong'e vëgataka ino, vëgamumankëa vëmuramuche. 16Yesu agavawiiya, “Muuvëëvëëtya ntuni mwinaawe?” 17Faafo muntu umwe mukhatë a mwirundo usuu wa antu agamusucha, “Musëyi, namweetaa mwananë kune vee, wina gënyonyinyonyi nëgëumutendaa atendeke gemumu. 18Mu iyoma nëgamukwata gëumugwësyaa fang'i na umutenda adue ifombou mumoomo ugula mino na ukakufa mwëre woong'e. Aja naarombaa asëywi vako vëgëduye gënyonyinyonyi gësëë ëgweeso vënadaha.”

19Yesu agavëëra, “Nyee ufafo nëutina uhuvëi! Ngëkhaa gënaanyu faka nanëë? Ngumughimëëya faka nanëë? Mweeti kune nee.” 20Vëgamutoa kune mweeso. Mugënyafaafo gutufu gënyonyinyonyi gësëë nënaa gamwoona Yesu, gëgamuhingisya mung'ënya wasuu, mung'ënya mweeso noo agagwa fang'i, agighaghaya na udua ifombou mu moomo. Yesu agamuwiya ihe amung'ënya wasuu, 21“Wahangiwe na mantu asaa ufuma nanëë?” Mweeso noo agasucha, “Ufuma ung'ënya wakwe. 22Na mëhënjo mingë gënyonyinyonyi gësëë gëumugwësyaa mumoto nanë mumajë, gwa umumeeyaa chookuu. Uvii, nësa ugudaha, ugoonëe uvavi na ugwaariya!” 23Yesu agamwëëra, “Bwi, nësa ugudaha! Mantu oong'e ëgudahika gwa muntu nëuna uhuvëi.” 24Faafo, tata wasuu agakuta gwa uduya ruri, “Nahuvëa! Ëgweeso njarëëya uhuvëi wanë.”

25Yesu nënaa wavoona mwirundo wa antu ugyëongeeya ruvë usonge akwe, agagëkenea gënyonyinyonyi nëgëvë gësëë, “Gënyonyinyonyi nëugumutendaa mung'ënya uyuu atendeke gemumu mbula, nagwëëra, mudue mung'ënya uyuu, tanjee umwingie kangë!” 26Faafo gënyonyinyonyi gësëë gëganga, gëgamugwisya mung'ënya wasuu fang'i, faafo noo gëgamudua. Mung'ënya agaa mwino mwimba, na vangëja vëgahanya, “Wakuyaa!” 27Ëgweeso Yesu agamukwata mukhono, agamuwucha, mweeso noo agimëka.

28Yesu nënaa wëngëa munyumba asëywi vakwe vëgamuwiya gwa mpoampoa, “Asikë në see gwinadaha ugëduya?” 29Mweeso noo agavëëra, “Vënyonyinyonyi në vë mwino ëkëë vëtiudahwa uduywa ëgweeso gwayo gwa marombi gutufu.”

Yesu uguhanya kangë ikuya rakwe

(Mat 17:22-23; Luk 9:43b-45)

30Yesu na asëywi vakwe vëgahegha faafo, vëgafwaghira na muhënjo ukëërëa gitumbë ra Ugalilaya. Yesu naa ainayanjaa antu vëmanye fana naa urë, 31gusoko naa uguvasëya asëywi vakwe. Agavëëra, “MwaaMuntu wooka utendewa umëkhono a antu në vëumuuragha, gweeso, nëvamuuragha matiku atatu akëra itiku ra gatatu ugufëtya.” 32Asëywi vëgadëa umanya ihanyo rasëë. Vëgooghofa umuwiya.

Anyu në Müküü

(Mat 18:1-5; Luk 9:46-48)

33Uvii, vëgafika uKafarinaumu. Na nënaa wuu unyumba, agavawiya, “Aja muuvëëvëëtya intukë munjëa?” 34Ëgweeso veeso vëgakira, gusoko munjëa naa vëgikunguma mwino anyu në müküü mukhatë awe. 35Yesu agëkhaa fang'i, agavataana vasaa ikumi na vavëë, agavëëra, “Muntu nëugufënja utenda wa mwandyo inoneye atendeke wa fang'i ukëra voong'e na mutumami wa voong'e.” 36Faafo noo agamuhora mung'ënya në munyughuu, agamwimëcha mukhatë awe, agamukumbatëa na agavëëra, 37“Nëugumughenyifaa mung'ënya në mwino uyuu gwa rina ranë, ugunghenyifa nene, na në ugunghenyifa nene, atiunghenyifa nene gutufu, ëgweeso ugumughenyifa wasuu nëwantumie.”

Neatiuguhita wë guuvaru witu

(Luk 9:49-50)

38Yohana agamwëëra, “Musëyi, gwamwoonaa muntu umwe uguduya vënyonyinyonyi gwa utumëa rina rako, na see noo gwasoosoya umughëëya gusoko mweeso atikhuvëe nasee.” 39Ëgweeso Yesu agahanya, “Mutamughëëye, gusoko gutie muntu nëugutenda makura gwa rina ranë na muu faafo adahe undighëtya nee gwa mabë. 40Gusoko, neatiuguhita nasëë, wë guuvaru witu. 41Tutë na mwëëra muntu gëkaku nëngumufa ükuu wa majë aunywe, gusoko nyee mwë antu vakwe Kiristo, tutë tuutë atiuwurya gëhabanga gakwe.

Mampëënga

(Mat 18:6-9; Luk 17:1-2)

42“Muntu gëkaku nëwamutenda umwe wa avaa në anyughuu nevëng'uvëe atende mahutye, sanaa bahu muntu wasuu utungëywa unkingo akwe igwe në iküü ra usiera na ugumëwa mwirambo. 43Mukhono wako nëwaguhutyëya, ukigite. Bahu gingëa muufanga witimpa ukëra nëwina mëkhono ëvëë na gwenda guurungu wa makhaa. 44Kuuko, mang'unywe ayo ëtiukuyaa na moto utiurimaa. 45Na mughuu wako nëwaguhutyëya, ukigite! Bahu gingëa muufanga witimpa, ukëra nëwina mëghuu oong'e ëvëë naughumëwa guurungu wa makhaa. 46Kuuko, mang'unywe ayo ëtiukuyaa na moto utiurimaa. 47Na riho rako nëraguhutyëya, rëkure! Bahu gingëa mu Utemi wa Muungu wë ng'ongo, ukëra nëwina miho avëë na ughumëwa guurungu wa makhaa. 48Kuuko mang'unywe ayo ëtiukuyaa, na motonoo utiurimaa mba nduvë.

49“Gusoko mu muntu ujie utendwa ajife gwa moto. 50Munyu uja, ëgweeso nëwasusufa, ugulombeywa na ntuni? Mutendeke muna munyu mukhatë anyu na mwikhee gwa majeghana nyenye gwa nyenye.”

Currently Selected:

Mariko 9: RNT

Highlight

Copy