Mariko 11

Yesu ugingëa uYerusalemu gwa irumbë

(Mat 21:1-11; Luk 19:28-40; Yoh 12:12-19)

1Nënaa voohumbeera uYerusalemu vëgafika Betifage na Betania, fife na Gëtanto ga Miseituni. Faafo agavatuma vavëë va asëywi vakwe, 2agavëëra, “Endi ugëjiji në gëusonge anyu. Nënaa mwaagingëa faafo, muumuhanga mwaandoghwe utungiwe, nëkëë ainatumëwa na muntu. Mutungwëëri mumwete. 3Në muntu wamuwiya, ‘Asikë muutenda uvii?’ Mukhanëi, ‘Müküü ugumufenja na ugumusucha afaa ruvë.’”

4Uvii vëgenda, vëgamuhanga mwa ndoghwe umwe wë mwibara utungiwe mu mufëta. Nënaa vëumutungwëëra, 5mukhatë a antu nënaa vëmëkie faafo vëgamuwiya, “Asikë në mumutungwëëra mwaa ndoghwe wasuu?” 6Asëywi vëgasucha mwino chuu naavërwaa na Yesu, veeso noo vëgaareka vënde kune naa vinjë. 7Vëgamutweera Yesu mwaa ndoghwe wasuu. Vëgaara masaa gunto a mwaa ndoghwe wasuu na Yesu agamwikheera. 8Antu vingë vëgataantaya masaa awe mwibara, vangëja vëgataantaya makhanja a mete nënaa vayatenaa umeunda. 9Antu vasaa nënaa vëtongeere nanë vasaa nanë vëhongie unyuma, vegaanga veuhanya, “Akuriwe Muungu! Aforiwe wasuu nëujie gwa rina ra Müküü! 10Waforiwaa Utemi wamwa Daudi tata witu nëujie. Akuriwe Muungu gunto girunde!”

11Yesu agingëa umuji wa uYerusalemu agenda faka mu Hekalu, agararaava mu intu gwa ukhorenkeya. Ëgweeso gusoko naa gwajaa mpëndë, agenda Ubetania itambëëmwe na vasaa ikumi na vavëë mpëndë.

Yesu uguujuma mutini

(Mat 21:18-19)

12Fadiu ayo, nënaa vëfumie Ubetania, Yesu agahumwa njaa. 13Uvii, agavoona gwa kurë mutini nënaa wina matutu mingë. Agawendea oone mbanaa ukweti mba nkhari mba imwe. Nënaawoofëkëa, agauhanga utikweti intu mbanduvë ëgweeso gwayo matutu matufu, gusoko naa ti ikhondo ra nkari. 14Faafo agawëëra mutini, “Gutie muntu nëugula kangë nkhari yako khae na khae.” Asëywi vakwe noo vëgayëtegheeya nkhani yasëë.

Yesu ugingëa mu Nyumba a umukurya Muungu

(Mat 21:12-17; Luk 19:45-48; Yoh 2:13-22)

15Uvii, vëgafika uYerusalemu. Yesu agingëa mu nyumba a umukurya Muungu agaandya uvajuncha na uvaduya antu nënaa vëurinja na ughura mantu faafo. Agayifenenguanga mesa ya vasaa nënaa vëgikhavisya hela na matumbë awe vasaa nënaa viurinja nkünda. 16Aina muyanjëyaa muntu mba umwe ukëëra mu Hekalu ahore intu. 17Faafo noo agavasëya, “Yiandëkiwe ‘khaya anë ëgutaanwa khaya a marombi gusoko a ndughu yoong'e!’ Ëgweeso nyenye mwamëtendaa mpanga a ahëmbi!” 18Akumbëki aküü na asëyi va Seria nënaa vategheeya asaa, vëgandya ufenja njëa a umuuragha. Ëgweeso vëgamwooghofa gusoko a mwirundo wa antu nëugatachiwa na masëyo akwe. 19Nënaa a mpëndë, Yesu na asëywi vakwe vegahegha u muji.

Isëyo gwa mutini nënaa wumaa

(Mat 21:20-22)

20Diu chili, nëna vëkëaniye, vëgavoona mutini wasuu wumaa woong'e nanë mërye. 21Fetero agaukumbukwa, agamwëëra Yesu, “Musëyi, raraava! Mutini uroo nëugaujuma wumaa!”

22Yesu agavëëra, “Muhuvëi Muungu. 23Numukhanëa tutë, muntu nëwagëëra gëtanto ëkëë: ‘Kunkuka ujubulie girambo!’ nëwadea uhanga wisaghasaghii munkhoo akwe, ëgweeso wahuvëa mwino mantu oong'e nëuguyarëghëtya ëgutendeka, ugutendewa intu rësëë. 24Uvii ngumukhanëa, nëmukuta na uromba intu, huvëi mwino chuu mwarëhangaa na muufewa. 25Nëmwimëka në muukuta, rekei mu muntu nëwamuhutiye intu gëkaku, gwa uvii mweeso Tata wanyu nëwëgirunde ugumurekea nyee mahutye anyu. 26Ëgweeso nëmwadëa uvarekea mahutye vangëja uvii nanë Tata wanyu në wë girunde atiumurekea nyenye mahutye anyu.”

Ihanyo ra udaho wamwa Yesu

(Mat 21:23-27; Luk 20:1-8)

27Uvii, vëgafika kangë uYerusalemu. Yesu nënaa ugweendeenda mu Hekalu, akumbëki akuu, asëywi va Seria na anyampaa vëgamwendea, 28vëgamuwiya, “Ugutenda mantu ayaa gwa nguukë? Anyu nëwakufee nguu ya utenda mantu ayaa?” 29Ëgweeso Yesu agavëëra, “Ngumuwiya rëuryo rëmwe, nëmwansucha, neenoo ngumukhanëa uu gwa nguukë ngutenda mantu ayaa. 30Wurë, nguu yamwa Yohana ya ubadisa ëgafuma girunde namba gwa antu? Nsuchi.”

31Vëgaandya uvëëvëëtya, “Nëgwahanya, ‘Ëgafuma girunde,’ uguguwiya, ‘Uvii, asikë në mwinahuvëaa?’ 32Na nëmbaa guhanye, ‘Ëgafuma gwa antu.’” (Vëgooghofa mwirundo wa antu gusoko antu voong'e vëgahuvëa mwino Yohana naa tutë munyagidaghu.) 33Uvii, vëgamusucha Yesu, “See gutighune.” Yesu mweeso noo agavakhanëa, “Nee noo ntiumukhanëa ngutenda mantu ayaa gwa nguukë.”

Currently Selected:

Mariko 11: RNT

Highlight

Copy