Matayo 26

Mufango wa umuuragha Yesu

(Mrk 14:1-2; Luk 22:1-2; Yoh 11:45-53)

1Yesu nënaawadaha urighëëtya asaa oong'e agavakhanëa asëywi vakwe, 2“Mumanyie mwino në matiku avëë akëra guutenda gwina sigunkuu a Pasaka, na Mwaamuntu ugufunyiwa gusoko akhomwe. 3Itungo rasëë akumbëki në aküü nanë anyampaa va antu vëgatang'ana itambëëmwe mumwaango wamwa Kayafa, mukumbëki në müküü. 4Vëgisëya mwino vëumukwata Yesu gwa lakuno vëmuuraghe. 5Ëgweeso vëgaramua intu rasëë rëkeutendeka itungo ra sigunkuu, tajee yaghayagha ëjeudwëëra mu antu.”

Yesu uguvirwa makuta uBetania

(Mrk 14:3-9; Yoh 12:1-8)

6Yesu nënaa wëë uBetania, ukhaya amwa Simioni munyamatana, 7mukhema umwe nënaa wina galëmbo ga alabasta#26:7 Alabasta: Rena ra galëmbo. nëëkweti urumba wa ughuri në üküü, agamuhanga faafo mu mesa nënaa wikhee ale malëwa, agamumiminëa urumba wasuu gitwe. 8Asëywi vakwe nënaavoona asaa vëgakheefa vëgahanya, “Ntüni ujughuta mantu vii? 9Urumba uruu aja udahite urinjwa gwa hela nyingi atuki vafewa hela isii.” 10Yesu agayamanya masëgho awe, agavëëra, “Sokokë muumujunjanga mukhema uyuu? Mweeso wantendea intu ija. 11Atuki mwaakhweti matiku oong'e, ëgweeso matiku oong'e në ntiutenda itambëëmwe nanyee. 12Mukhema uyuu wamiminëaa urumba gusoko aghondanëëye uvekwa kunë nene. 13Nene ngumukhanëa tütë, goong'e mu urëmi, fana Sayu Njija ëgutanantiwa, intu ërëë nëwarëtendaa rëuhanywa gwa umukumbukwa mweeso.”

Yuda uguramua umutoneera Yesu

(Mrk 14:10-11; Luk 22:3-6)

14Faafo, Yuda Isikarioti, umwe wa vasaa ikumi na vavëë, ageenda gwa akumbëki ne aküü, 15agavëëra, “Nyenye muumpa ntüni nëmbaa nene ngumufunya kunë nyenye?” Vëgamuvarëya majënkëlë makumi atatu a hela, 16na ufuma itungo rësëë Yuda agaaufenja iyoma ra umutoneera.

Yesu ugutenda sigunkuu a Pasaka itambëëmwe na asëywi vakwe

(Mrk 14:12-21; Luk 22:7-14, 21-23; Yoh 13:21-30)

17Itiku ra mwandyo nënaaëkëë inafika Sigunkuu a Mëkaate nee ëtisasie, asëywi vëgamwendea Yesu vëgamuwëëya, “Ugufenja gugughondanëëyefe sigunkuu a Pasaka?” 18Yesu agavasucha, “Ëndi mujini ukhaya a muntu ungëja, mukhanëi: ‘Musëyi uguhanya, itungo ranë rafikaa, ukhaako ngutenda sigunkuu a Pasaka itambëëmwe na asëywi vanë.’” 19Asëywi vëgatenda mwino Yesu naawaaraghëëyaa, vëgaghondanëya malëwa a Pasaka. 20Nënaa gwatenda mpëndë, Yesu agikhaa mumesa itambëëmwe na asëywi vakwe ikumi na vavëë. 21Nënaavëula, Yesu agahanya, “Nene ngumukhanëa tütë, umwe wanyu uguntoneera.” 22Asëywi vëgahura ino, vëgaandya giwëëya umweemwe, “Wurë, Müküü, uu nenenahe?” 23Mweeso agasucha, “Mweeso unë watendea mukhono wakwe muchungu itambëëmwe nanee winjë untoneera nene. 24Nhaa Mwaamuntu winjë kunë winjë mwino Maandëko në Meru ëguhanyaa, ëgweeso hëhëë akwe muntu wasuu nëugumutoneera MwaaMuntu! Esa naa bahu gwa muntu wasuu sa inafafwaa.” 25Yuda, wasuu nënaaugufenja umutoneera, agamuwëëya, “Musëyi! Wurë, uu nenenahe Müküü?” Yesu agamusucha, “Veve wahanyaa.”

Ilëwa ra Müküü

(Mrk 14:22-26; Luk 22:14-20; 1Ko 11:23-25)

26Nënaavëula, Yesu agahora mukate, agafunya asi, agauvegha, agavafa asëywi vakwe uguhanya, “Hori mule, uruu unë mwëërë wanë.” 27Uvii agahora gakuu, agamufunyëya Muungu asi, agavafa uguhanya, “Nyweeri nyoong'e, 28gusoko ëyëë unë saghami anë a iraghano, nëahunuwe gusoko a wingë wa antu gwa urekewa wa mahutye. 29Nene ngumukhanëa, nyenye ntiunywa kangë divai a sabibu faka itiku rasëë nëikwë nëjieunywa nëmpya itambëëmwe nanyee mu Utemi wamwa Tata wanë.”

30Faafo, vëgëëmba ryëmbo, vëgavuka, vëgenda mugëtanto ga Mëseituni.

Yesu ugutanantya mwino Fetero ujie umukhana

(Mrk 14:27-31; Luk 22:31-34; Yoh 13:36-38)

31Uvii Yesu agavëëra, “Utiku wa reo uruu, nyee nyoong'e muutenda mwina wisaghasaghëi nanee, gusoko Maandëko Meru ëguhanya:

‘Ngumukhuva mudëmi,

nkhoo njeesoonoo ëgufaghata.’

32“Gweeso nëikwë nafëtya, ngumutongeera uGalilaya.”

33Fetero agamwëëra Yesu, “Mbesa voong'e vëutenda vina wisaghasaghëi navee na ugureka, nene ntiugureka kamwe.” 34Yesu agamwëëra, “Tutë, nagwëëra, utiku uruu, nëëkëë jololo ina kunkua, ugunkhana mëhënjo ëtatu.” 35Fetero agamwëëra, “Nëmbesa inoneye ukuya itambëëmwe gwinako, ntiugukhana kamwe.” Asëywi avoo vangëja voong'e vëgahanya vii uvii.

Yesu uguromba ubusitani a uGetisemane

(Mrk 14:32-42; Luk 22:39-46)

36Uvii Yesu ageenda itambëëmwe inaawe ubusitani a uGetisemane, agavëëra asëywi vakwe, “Ëkhai afaa faka neenoo nende afoo usonge uromba.”

37Agavahora Fetero nanë vana vavëë vamwa Sebedayo, agaandya uhanga uvavi nanë makhasëko. 38Faafo agavëëra, “Nkweti uvavi üküü munkhoo ngiinga ukuya. Ëkhai afaa mutaree sa munying'enga itambëëmwe nanëë.” 39Uvii, agenda usonge nduvëëng'ë, agagwa wuumbama, agaromba: “Tata wanë, nësa ëgudahëka gakuu akaa ga makhasëko gënankëe, ëgweeso ëtatendekee mwino nëanjëte, ëgweeso mwino vee uyanjëte.” 40Agaveendea asëywi vakwe vasaa, agavahanga vëree. Agamwëëra Fetero, “Uvii mwinadaha uromba itambëëmwe nanëë mbesa gwa itungo ra saa ëmwena? 41Mutaree rombi mutajee gingëa mumaghemwa. Nkhoo ëgufenja ëgweeso mwëërë ulegheeku.”

42Kangë, gwa muhënjo wa gavëë, mweeso ageenda na agaromba, “Tata wane, në ëkëë gëhukera ëgweeso nene nënywe, mafenji ako ëtendeke.” 43Agavendea, agavahanga kangë varaa, gusoko miho awe naa akwatwaa na too.

44Uvii, agavareka, agenda kangë usarëa muhënjo wa gatatu gwa nkhani iyiiyo iyiiyo. 45Agaveendea asëywi vasaa, agavëëra, “Wurë, mukëë murëë muutuyana? Raraavi! Itungo rëësënoo rafikaa, Mwaamuntu ugufunyiwa gwa antu nëvina mahutye. 46Fëti, kwendi kunë gwinjë. Raraavi! Chu waja wasuu nëujieuntoneera.”

Yesu ugukwatwa

(Mrk 14:43-50; Luk 22:47-53; Yoh 18:3-12)

47Uvii, Yesu nënaa ëkëë ugurighëtya inaawe, gënyafaafo agaja Yuda, umwe wa vasaa ikumi na vavëë. Itambëëmwe na mweeso vëgaja antu vingë vëkweti mafaanga nanë mafënë nënaa vatumwaa na akumbëki aküü nanë anyampaa va antu. 48Wasuu nënaa ugufenja ümütoneera agavafa ndolyo uguhanya: “Wasuu nëngumutomya uu mweeso, mukwati.” 49Uvii, Yuda agamuhumbeera Yesu, agamwëëra, “Amucha, Musëyi!” Faafo agamutomya. 50Yesu agamwëëra, “Mbuyanë, tenda nëajawajaa urëtenda.” Faafo antu vasaa vëgaja, vëgamukwata Yesu, vëgamukwatëëra gwa nguu.

51Umwe wa vasaa nënaavëitambëëmwe na Yesu agaghoora mukhono, agamëhofoa mpaanga akwe, agamutema mutumami wamwa mu ukumbëki në müküü, agamutema ikutwë. 52Faafo Yesu agamwëëra, “Sucha mpaanga ako fana ëgikhaa, gusoko gëkaku muntu nëugutumëaa mpaanga ugukuya gwa mpaanga. 53Wurë, mutighunena mwino ngudaha umuromba Tata wanë na mweesonoo muugënyafaafo ugundetea ukëra maumbe ikumi na avëë a vamalaëkana? 54Ëgweeso ëgukhondeka wurë Maandëko Meru nëëguhanya mwino ënoneye utendeka uvii.”

55Itungo ërëëro ërëëro Yesu agawëëra mwirundo, “Wurë mwajaa unkwata gwa mafaanga nanë mafënë mwino nene uu në muhëmbi? Itiku gwa itiku naanëë mu Hekalu ngusëya, na mugadëa unkwata! 56Ëgweeso ayaa oong'e atendekaa gusoko Maandëko aa anyagëdaghu ëkhondeke.” Faafo asëywi voong'e vëgamureka, vëgirüka.

Yesu usonge a Barasa

(Mrk 14:53-65; Luk 22:54-55, 63-71; Yoh 18:13-14, 19-24)

57Uvii antu vasaa nënaavëgamukwata Yesu vëgamutoa ukhaya amwa Kayafa, mukumbëki në üküü, fana naavihaangwëyaa asëyi va Seria nanë anyampaa. 58Fetero agamuhonga gwa kure faka u müsee wamwa mukumbëki në müküü, agingëa ukhatë itambëëmwe na aghoji adahe goona mantu mwino ëgutendeka.

59Itungwee, akumbëki në aküü nanë iaja roong'e vëgafenja sayu a weegheeghe kunë Yesu vëdahe umuuragha, 60ëgweeso vëgadëa uhanga usudangi mbanduvë, mbesa vëgaja asudangëi vingë va weegheeghe. Mpëoayo vëgaja asudangëi vavëë, 61vëgahanya, “Muntu uyuu agahanya: ‘Nene ngudaha urëruvanga hekalu ra Muungu na urëjenga kangë gwa matiku atatu.’” 62Mukumbëki në müküü agimëka, agamuwëëya Yesu, “Wurë, utiusucha ukhanina? Antu avaa vëugusudangëa ntuni?” 63Ëgweeso Yesu agakira twëë. Mukumbëki në müküü agamwëëra, “Nene ngugurafëëya kunë Muungu nëmufanga, gukhanëe nësa veve wëë Masihi, Mwana wa Muungu!”

64Yesu agamwëëra, “Wahanyaa! Ëgweeso nene ngumwëëra nyenye, udua itungwee muumwoona Mwaamuntu wëkhee guuvaru wa gëlëlo wa Muungu në munya nguu, ujie gunto a marunde a girunde.” 65Faafo, mukumbëki në müküü agahafua masaa akwe, agahanya, “Wajumanaa! Gwina sokokë kangë a asudangëi? Itungwee mwategheeyaa ijumi rakwe. 66Nyenye mugoona wurëhe?” 67Veeso vegamusucha, “Unoneye ukuya!” 68Faafo, vëgamutiera mate guusyu, vëgamukhuva makoofi, vangëja vëgahanya kunu vëumukhuva makoofi, “Arë, guraghue, gukhanëe uu anyu nëugukhuvahe!”

Fetero ugumukhana Yesu

(Mrk 14:66-72; Luk 22:56-62; Yoh 18:15-18, 25-27)

69Fetero naawëkhee gunjë ümüsee. Uvii, mutumami umwe wa gëkhema, agamwendea, agahanya, “Veve naa wëëitambëëmwe na Yesu wa uGalilaya.” 70Fetero agakhana usonge a voong'e uguhanya, “Nene ntighune mba uguhanya ntüni.” 71Nënawafuma mugënyamwaango, mutumami ungëja wa gëkhema agamwoona, agavëëra vasaa nënaavëëfaafo, “Muntu uyuu naawëëitambëëmwe ina Yesu wa uNasareti.” 72Fetero agakhana kangë gwa urafa: “Nene ntimumanyie muntu wasuu.” 73Nënaa itungo rakëra nduvëëngë, antu nënaavëëfaafo vëgamwendea Fetero, vëgamwëëra, “Gwa tütë, vevenoo uu wëë umwe wawe, gusoko murëghëtyo wako ugugumanyisya.” 74Faafo Fetero agandya gijuma nanë urafëa uguhanya, “Nene ntimumanyie muntu wasuu!” Gënyafaafo jololo ëgakünküa. 75Fetero agayikumbukwa nkhani nënaawëërwe na Yesu, “Nëëkëë jololo inakünküa ugunkhana mëhënjo itatu.” Uvii, agadua gunjë agëëra ino.

Currently Selected:

Matayo 26: RNT

Highlight

Copy