Matayo 25

Wikhori wa ancha ikumi

1“Uvii, utemi wa girunde ugikhwanëywa na ancha ikumi nëvëgahora taa yawe, vëgenda umusëngëya munya uvira. 2Vatano mukhatë awe naa afütü na vatano naa vëë ihaa. 3Avoo nëafütü vëgahora taa yawe ëgweeso vëgadea uhora makuta. 4Ëgweeso avoo nëvina mafefe vëgahora makuta mu chufa itambëëmwe na taa yawe. 5Gusoko munya uvira agatinëa uja, ancha vasaa voong'e vëgatindia vëgaraa. 6Ëgweeso utiku wa mukhatë arë gwina mukindo. ‘Raraavi, mukhamwëëma! Nji gunji gumusëngëëye mweeso.’

7“Faafo ancha vasaa voong'e vëgafëtya vëgayighondanëya taa yawe. 8Avoo nëafütü vëgavëëra avoo nëvina mahaa: ‘Gufi makuta anyu nduvëëngë gusoko taa yitu yoorima.’ 9Ëgweeso vasaa nëvina mahaa vëgavëëra, ‘Ëtiukundanëa kunë sese nanë nyeenoo! Bahu endi giduka mweende gighurëya aghonjo!’ 10Uvii, ancha vasaa nëafütü nënaa venda ughura makuta, munya uvira agafika, na ancha avoo nënaavighondanëëyaa vëgingëa itambëëmwe na mweeso munyumba a uvire, faafo rurie ugautëwa. 11Nënaa itungo rarifa, ancha avoo vëgaja, vëgataana: ‘Müküü, Müküü, gurughwëëre!’ 12Ëgweeso mweeso agavasucha, ‘Nene ngumukhanëa tutë ntimumanyie nyee.’ 13Faafo Yesu agahanya, ‘Ighondanëëyi, uvii, gusoko mutirëmanyie itiku mbeesa itungo.’”

Wikhori wa atumami vatatu

(Luk 19:11-27)

14“Ëgutendeka mwino muntu umwe nënaa ugufenja utenda muhënjo gwenda ng'ë a kureengë, agavataana atumami vakwe, agavarekea mari akwe. 15Agamufa mu muntu gwa udaho wakwe: umwe agamufa talanta itano, ungëja talanta ivëë na ungëja talanta ëmwe, faafo agenda muhënjo. 16Wasuu nënaawarekewaa talanta itano agatenda mwëmo nayo agahanga usagho talanta itano. 17Uvii noo uyoo nënaawarekewaa talanta ivëë agahanga usagho talanta ivëë. 18Ëgweeso uyoo nënaawarekewaa talanta ëmwe agenda agahëmba ikhombo fang'ë agamëfiha talanta a müküü wakwe.

19“Nënaa itungo irifu rakëra, müküü agasuka, agaandya gihenga uvaryo wa utumëa nanë usagho wa talanta yakwe. 20Mutumami nënawarekewe talanta itano agaja ukwete talanta ëyoo itano usagho, agamwëëra: ‘Müküü, ugandekea talanta itano, afaa gwina talanta itano usagho nënahangie.’ 21Müküü wakwe agamwëëra: ‘Vija, mutumami muja na mughondanëëyi nëmuja. Aja umughondanëëyi nëmuja mu mantu në manyuughuu nene ngugurekea në makuu. Njuu ingëa mu uyanjo wa müküü wako.’ 22Mutumami nënaaurekewe talanta ivëë agaja, agaduya talanta ivëë usagho agahanya: ‘Müküü, nawandekee talanta ivëë. Afaa gwina talanta ingëja ivëë usagho nënahangwëye.’ 23Müküü wakwe agamwëëra: ‘Vija, mutumami muja na mughondanëëyi në muja. Aja umughondanëëyi në muja mumantu në manyuughuu, nene ngugurekea në makuu. Njuu ingëa mu uyanjo wa müküü wako.’

24“Ëgweeso wasuu nënaawarekewe talanta ëmwe agaja agahanya: ‘Müküü, nëmanyie veve wëë muntu mukaku, veve ugutënanga faafo fana winafandëaa, na uguhaangwëyaa fana winafifitaa. 25Nene ngooghofa, nëgamëfiha talanta ako fang'ë. Hora, uvii, maari ako.’ 26Müküü wakwe agamusucha: ‘Veve wë mutumami në muvë na mütoto! Naaumanyie mwino nene ngutënangaa fana ntinafandëa, na nguhaangwëyaa faafo fana ntinafifita. 27Naaigunoneye, uvii, umëvëka talanta anë mubenki, nënoo naanguhora ng'angu anë nanë usagho wayo! 28Uvii, muhegheyi talanta asëë, mufi uyoo nëwina talanta ikumi. 29Gusoko, nëwina intu ugufewa nagoongeywa ino. Ëgweeso wasuu nëatikweti intu, nanë rasëë neurikweti ugurehegheywa. 30Na gwa mutumami wasuu nëatikweti usagho mujughuti gunji mukiti! Kuuko guutendeka gwina gëëra na usya mino.’”

Iramuëywa ra umpëo

31“Itungo Mwaamuntu nëikwë waja mü üküü wakwe na vamalaëka voong'e sa vëitambëëmwe, faafo ujie gikhaa gunto a itumbë rakwe ra utemi në ryeru. 32Ndughu yoong'e ëguhaangwëywa usonge akwe, mweesonoo ugubaghua antu mwino mudëmi ugubaghua nkhoo na mburi. 33Uguyivëka nkhoo guuvaru wakwe wa gëlëlo na mburi guuvaru wakwe wa gëmoho. 34Faafo Mutemi uguvëëra vasaa nëvëëguuvaru wakwe wa gëlëlo: ‘Njii nyee nëmwaforiwe na Tata wanë, usai Utemi nëmwaghondanëëywe ufuma utundwa gwa urëmi. 35Gusoko naa nëna njaa nyeenoo mugampa malëwa, naa nëna nyweta nyeenoo mugampa majë, naa nëë mughenyi mugaghënyifa, 36naa nëëgëfuyu nyeenoo mugandiecha masaa, naa nërue mugaja unyoona naa nëëmuigeresa mugaja unsoya.’

37“Faafo, antu vasaa në aja vëumusucha mweeso: ‘Müküü nanee gugagoona wina njaa gugagufa malëwa mbesa naa wina nyweta gugagunywesya majë? 38Na nanaë gugagoona u mughenyi gugaghenyifa, mbesa wë gëfuyu gugagufa masaa? 39Na nanaë gugagoona urue, mbesa wëmugëtungo na gugagusoyaa?’ 40Mutëmi uguvasucha: ‘Tutë nene namwëëra nyee, muu intu nëmugamutendea umwe wa avaa vaunaanë në anyuughuu, mugantendea nene.’ 41Faafo uguvëëra vasaa nëvëëguuvaru wa gëmoho, ‘Heghi kunë nee nyee nëmwajumiwe! Endi mu moto wa khae na khae nëwaghondanëëywe Ibilisi nanë vamalaëka vakwe. 42Gusoko naa nënaa njaa nyee mwinampaa malëwa, naa nënaa nyweta mwinampaa majë. 43Na nëë naa në mughenyi mugadëa unghenyifa, na naa nërue naa nëë mutungwa nyee mugadëa uja unsoya.’

44“Faafo veeso noo vëumusucha: ‘Müküü, uu naneehe nënaagugagoona wina njaa mbesa nyweta, wëë mughenyi mbesa utina masaa, urue mbesa umutungwa seenoo gwinajaa ugwitumëaye?’ 45Mweeso uguvasucha, ‘Nene ngumwëëra tutë, mu itungo nëmugahita umutendea mantu ayaa umwe wa anyuughuu avaa, mugahita untendea nene.’ 46Uvii, avaa vinjë uhanga makhaseko a khae na khae, ëgweeso vasaa nëaja vëuhanga ufanga wa khae na khae.”

Currently Selected:

Matayo 25: RNT

Highlight

Copy