Matayo 24

Yesu ugurighëtya ukhonontwa gwa Hekalu

(Mrk 13:1-2; Luk 21:5-6)

1Yesu agadua mu Hekalu, na nënaa uwukie winjë kunë winjë, asëywi vakwe vëgamwendea, vëgamuragheera makhaya a Hekalu. 2Yesu agavëëra, “Vija, mudahëte uyararaava ayaa oong'e! Tutë, nene ngumukhanëa nyenye, gutie igwe mbanduvë nërëjëusagha afaa gunto a riuya, rëtikhonontwa.”

Ilwe nanë makhasëko

(Mrk 13:3-13; Luk 21:17-19)

3Yesu nënaawëkhee gunto a Gëtanto ga Mëseituni, asëywi vëgamwendea umpëo, vëgamuwëëya, “Gukhanëe mantu ayaa ëgudwëëra nanee? Uu ndolyokëhe nëëjieuraghëëra uja kunë vee nanë mpeo a urëmi?” 4Yesu agasucha, “Ighoji mutajeeukhongwa na muntu. 5Gusoko vingë vëudwëëra na urëtümëa rinaane vëuhanya: ‘Nene uu nee Masihi uyoo,’ na uvayaghaya antu vingë. 6Muutegheeya fëta na gëfwefwe ga fëta, ëgweeso mutakhakhatee gusoko inoneye asaa ëdwëëre, ëgweeso mpëoayo sa ëkëë. 7Ndughu ëmwe ëgikhuva na ndughu ëngë. Afaa nanë afoo guutendeka gwina njaa nanë gëtentemo ga fang'ë. 8Oong'e asaa ë mwino mwandyo wa uhungu wa ufafwa mwana.

9“Uvii vëumuduya gusoko mukhasiwe na guuraghwa. Ndughu yoong'e yiumuhura gusoko a rina ranë. 10Kangë, vingë vëuvureka uhuvëi wawe, vëgihongeera na gihura. 11Vëudwëëra anyagëdaghu va weegheeghe nëvëjeuvayaghaya antu vingë. 12Gusoko a ryongeeyo ra ubë uyanjo wa antu vingë ugunyumpa. 13Ëgweeso nëugughëmëëya faka mpëo, ugutyoeka. 14Ëgweeso neekëë mpëo inafika, Sayu ëyëë Njija a utëmi wa Muungu ëgutanantiwa muurëmi woong'e utendeka usudanga gwa ndughu yoong'e.”

Ilwe nëiküü

(Mrk 13:14-23; Luk 21:20-24)

15“Uvii, mwuurëona ‘Ihurësyo ra urüvëki’#24:15 Ihurësyo ra urüvëki: Gingëya sanamu naumingëya mukhatë a hekalu na umëvëka fifë na masabahu. nërahanyiywe na munyagëdaghu Danieli rimëkie fana gweru gwa majëghana (imunoneye munyausoma na amanye rianaayo). 16Faafo, nëvë uYudea na virukëe uvitanto. 17Nëwëgitembe ra ukhaakwe atajë asime uhora intu umwakwe. 18Nëwë umuunda atajë asuke nyuma uhora isaa rakwe. 19Hëhëë awe akhema nëvëëwiito na nëvëgonchaa matiku asaa. 20Rombi umanka kunë nyee gutatendekee matungo a uryuku namba itiku ra mwëkhari! 21Gusoko itungo rësëë guutendeka gwina ilwe iküü, nërinadwëëraa mbanduvë ufuma mwandyo wa urëmi faka rëo, na rëtiujaa rëdwëëree kangë. 22Nësa matiku asaa inakefiwaa, gutie mwaamuntu mbaumwe nënaa ugutyoeka, ëgweeso matiku asaa ëgukefiwa gusoko a vasaa nëvahwaaniywe.

23“Uvii, në muntu wamwëëra matiku asaa: ‘Masihi wëë afaa’ namba ‘Wëë afoo,’ mutamuhuvëe. 24Gusoko vëudwëëra masihi va weegheeghe nanë anyagëdaghu va weegheghe. Vëutenda ndolyo nënküü nanë makura oodaha umuyaghaya, nësa ëgudahëka, nanë ahwaaniwa va Muungu. 25Tegheeyi, namukhanëa ruvë mantu ayaa. 26Uvii, nëvamwëëra, ‘Raraavi, wëë umbugha,’ taja mwende kuuko, namba, ‘Raraavi wifihie ukhatë,’ mutahuvëee, 27gusoko, mwino ufëto ugumwëëkaa udua ukiya faka umweri, gujeutendeka uvii uja gwa MwaaMuntu. 28Faafo fana mwimba urë unë igihaangwëëya ndëë.”

Uja gwa MwaaMuntu

(Mrk 13:24-27; Luk 21:25-28)

29“Gënyafaafo nërakëra ilwe ra matiku asaa, yuva regirooriwa, mweri utigerya, njota yuugwa udua gunto, na nguu ya irunde iguhingisiwa. 30Faafo, ndolyo a Mwaamuntu ëgudwëëra gunto, na faafo ndughu yoong'e ya anaantu muurëmi ëguhoma mwano, vëumwoona Mwaamuntu ujie na maunde a gunto munya nguu na gwa üküü wa weru. 31Mweeso uguvatuma vamalaëka vakwe nëvëna ifembe nërëukutëchaa ino, veesonoo vëuvahwaangwëya ahwaaniwa vakwe udua ng'andë yoong'e ine ya urëmi, udua mpeo ëyëë a irunde faka mpëo ëyëë.

Wikhori wa mutini

(Mrk 13:28-31; Luk 21:29-33)

32“Kunë mutini isëyi wikhori uruu: Gënyafaafo gutufu makhanjaayo nëandya utotufa na udua matutu muumanya mwino itungo ra mwakha rahumbeeraa. 33Uvii uvii, nyeenoo, nëikwë mwoona mantu ayaa oong'e ëgutendeka, manyi mwino Mwaamuntu wëë fifë ino. 34Nene ngumukhanëa tutë, ufafo uruu utiukëra nëkëë mantu ayaa oong'e inadwëëra. 35Nhaa, irunde na fang'ë ëgukëra ëgweeso nkhani yanë itiukëra kamwe.”

Gutie nëumanyie itiku mbesa itungo

(Mrk 13:32-37; Luk 17:26-30, 34-36)

36“Gweeso, gwa itiku mbesa itungo ësëë gutie muntu nëumanyie ëgutendeka naneë, mbesa vamalaëka va girunde, mbesa MwaaMuntu, ëgweeso Tata imwenedu gutufu nëumanyie. 37Ëgutendeka mwino matungo amwa Nuhu. 38Gusoko matungo asaa, nënaa ëkëë inaja gharëka, antu naavëula na unywa, vëuroghoa na uroghowa, faka Nuhu nënaawingëa mu Safina#24:38 Safina: Gëëfe nëgikhweeti na khaya, në Nuhu agakhanewa agëjenge matungu a gharika. ësëë. 39Naavëtigune guna ntuni faka nënaa gharëka ëgadwëëra, ëgavahora voong'e. Ëgutendeka uvii noo itungo nëëkëë Mwaamuntu ujie. 40Itungo rasëë antu vavëë savëumuunda, umwe uguhorwa na ungëja ugurekwa. 41Akhema vavëë savëusya viyo, umwe uguhorwa na wa gavëë ugurëkwa. 42Uvii, mutaree, gusoko mutirëmanyie itiku në Müküü wanyu ujie. 43Ëgweeso kumbukwi ihanyo ërëë: nësa munyakhaya naaumëmanyie itungo roofikëa muhëmbi naatiuraa, na naatiumërëka khaya ëhëmbwe. 44Gwa uvii, nyeenoo noo, tendeki mwighondanëye gusoko Mwaamuntu ujie itungo nëmutirëghemie.”

Mutumami nëugukhoreeya vija nanë atiukhoreeya vija

(Luk 12:41-48)

45Yesu agafwagëëra uhanya, “Uu anyu, uvii, mutumami nëugukhoreeya vija na nëwina mafefe wasuu në müküü wakwe ugumufa mwëmo gwa antu vakwe avafe malëwa gwa itungo rayo? 46Aforiwe mutumami wasuu nëikwë müküü wakwe waja ugumuhanga ugutenda uvii. 47Tutë namwëëra ugumufa mwëmo mutumami wasuu aghondanëëye maari akwe oong'e. 48Ëgweeso nësa mutumami nëmubë wirighëtëya: ‘Müküü wanë watiniaa usuka.’ 49Uvii wandya uvakhuva atumami vooyakwe, wandya ula na unywa itambëëmwe na aghai, 50müküü wakwe ujie itiku nënaatirëvarëye na itungo nëatirëmanyie. 51Ugumutema mafëgha avëë na umuvëka ikhakho rëmwe na anyalakuno. Kuuko guutendeka gwina gëëro nanë usya mino.”

Currently Selected:

Matayo 24: RNT

Highlight

Copy