Matayo 27

Yesu ugutowa kunë Filato

(Mrk 15:1; Luk 23:1-2; Yoh 18:28-32)

1Nënaagwera, akumbëki në aküü voong'e nanë anyampaa va antu vëgaronga choo vëdahe umuuragha Yesu. 2Vëgamutunga mpëëngu, vëgamuhora, vëgamutoa kunë Filato, müküü wa mükoa.

Ikuya ramwa Yuda

(Nte 1:18-19)

3Faafo, Yuda nënaa agamutoneera nënaawoona mwino vadahaa ümüramuëya Yesu, agafëa agahanya munkhoo akwe agavasuchëya akümbëki aküü hela yasii makumi atatu. Agavëëra, “Nahutyaa gwa umuduya muntu nëatina ihutye auraghwe.” 4Ëgweeso veeso vëgahanya, “Sese gwina ntuni na rësëëhe? Rësëë ihanyo rako.” 5Mweeso noo agayajughüta majënkëlë a hela isii mu hekalu, agafuma gunjë, agenda ginyomya. 6Akumbëki në aküü vëgayihora hela isii, vëgahanya, “Ëtinoneye uyivëka mu mpamba a hekalu gusoko në hela ya saghami.” 7Uvii, vëgisëya, vëgayighuera muunda wa muumba nyungu utende fana goovëka aghenyi. 8Gwa riana rasëë faka rëo muunda wasuu ugutaanwaa muunda wa saghami. 9Uvii nkhani ya munyagëdaghu Yeremia igakhondeka: “Vëgayihora manjëkele makumi atatu a hela, uguri wa wasuu nëugatendwa na vasaa mukhatë a vana va Isiraeli, 10na vëgaghuera muunda wa muumba nyungu mwino Müküü naa wandagheeye nene.”

Filato ugumuwëëya Yesu

(Mrk 15:2-5; Luk 23:3-5; Yoh 18:33-38)

11Yesu agimëka usonge a müküü wa mükoa. Uvii, müküü wa mükoa agamuwëëya, “Wurë, veve uu wëë mutemi wa Ayahudina?” Yesu agamwëëra, “Veve wahanyaa.” 12Ëgweeso akumbëki në aküü nanë anyampaa nënaa vëumusitaaka, inasuchaa ukhani. 13Uvii Filato agamuwëëya, “Wurë, utitegheeye, mwino vëugusitaakana gwa asaa oong'e?” 14Ëgweeso Yesu inasuchaa ukhani mbarumwe nanë müküü wasuu wa mükoa agataka ino.

Yesu ugufewa iramuëyo ra ikuya

(Mrk 15:6-15; Luk 23:13-25; Yoh 18:39–19:16)

15Naagujaa gwë uvii itungo ra sigunkuu a Fakasa müküü wa mükoa ümütungwëëra mutungwa umwe në Ayahudi naavëumufenja. 16Itungo rasëë naa gwina mutungwa umwe, naarë muvë ino rina rakwe Baraba. 17Uvii, antu nënaavihaangwëëya itambëëmwe, Filato agavawëëya, “Muufenja nëmutungweëëre anyu mukhatë avaa nëvavëë, Baraba namba Yesu nëugutaanwa Kiristo?” 18Agahanya uvii gusoko naa umanyie daaji mwino vëgamweeta kunë mweeso gusoko a wiru.

19Filato nënaawëkhee mwitumbë ra iramuëyo, mukhemaakwe agamutweera ukhani: “Utajee wighumëe mukhanë ya muntu uyuu në muja. Gusoko rëo nakhasëkaa ino mundoti gusoko akwe.” 20Ëgweeso akumbëki në aküü nanë anyampaa vëgavafema antu, vërombe Baraba atungwëërwe na Yesu auraghwe. 21Müküü wa mükoa agavawëëya, “Anyu mukhatë a avaa nëvavëë nëmufenja nëmutungwëërehe?” Vëgamusucha, “Baraba!” 22Filato agavawëëya, “Itungwee, nëtende ntuni na Yesu nëugutaanwaa Kiristo?” Voong'e vëgahanya, “Akhomwe!” 23Filato agawëëya, “Gusokokëhe? Watendie ihutyekë?” Veeso vëgafwaghëëra gaanga: “Akhomwe!” 24Uvii, Filato nënaawona mwino atiudaha uhanga intu ëgweeso yaghayagha a antu, agahora majë, agoya mëkhono usonge a mwirundo wasuu wa antu, agahanya, “Nene ntiuhondwa gwa ikuya ra muntu uyuu, ëse nyenye aghonjo.” 25Antu voong'e vëgahanya, “Saghami akwe ëtendeke gunto itu na gunto a vana vitu!” 26Faafo Filato agamutungwëra Baraba ufuma mugeresa, ëgweeso agamuduya Yesu akhomwe.

Asikee vëumukuna Yesu

(Mrk 15:16-20; Yoh 19:2-3)

27Asikee va müküü wa mükoa vëgamwëngëya Yesu mu ikulu#27:27 Ikulu: Khaya agëtemi. vëgamuhaangwiyëa iburi roong'e ra asikee. 28Vëgamuyueya masaa akwe, vëgamuriecha nkhaanju a ikeru në ikhooku.

29Vëgatuma ngaa a maghuya, vëgamuriecha gitwe, vëgamutendeya noo mwaanga mumukhono wakwe wa gëlëlo. Vëgatungama usonge akwe, vëgamukuna vëuhanya, “Amucha, Mutemi wa Ayahudi!” 30Vëgamutiera mate, vëgauhora ibuva, vëgamukhuvëa gitwe. 31Nënaavamukuna, vëgamuruecha nkhaanju ësëë, vëgamuriecha masaa akwe, vëgamutoa umukhoma.

Yesu ugukhomwa

(Mrk 15:21-32; Luk 23:26-43; Yoh 19:17-27)

32Nënaa vëtungwiiye vinjë, vëgamuhanga muntu umwe rina rakwe Simoni, mwenyeji wa uKurene, vëgamwoonyeeya uwuhora musalaba wamwa Yesu. 33Nënaa vafika fana guutaanwaa Goligota, rianaayo, “Fana Ikufa ra itwe,” 34Vëgamufa muhangëënkhano wa divai nanë gësungu. Ëgweeso Yesu nënaawasoya agahita unywa. 35Vëgamukhoma na vëgivaghania masaa akwe gwa uyakhuvëa kuura. 36Vëgëkhaa, vëgaaumughoja. 37Gunto a itwe rakwe vëgavëka usitaako wakwe nënaaugandeka, “Uyuu unë Yesu Mutemi wa Ayahudi.” 38Ahëmbi vavëë vëgakhomwa noo itambëëmwe namweeso, umwe uvaru wa gëmoho na ungëja uvaru wa gëlëlo.

39Antu nënaavëukëra faafo vëgamutuka vëuhingisya matwe awe na uhanya, 40“Veve! Ti ugitenda urëkhononta hekalu na urëjenga gwa matiku atatuna? Itungwee ifonie mughonjo. Nësa veve wëë Mwana wa Muungu, uvii tununta umusalaba!” 41Uvii nanë akumbëki në aküü itambëëmwe nanë asëyi va Seria nanë anyampaa vëgamukuna vëuhanya, 42“Agavafonia vangëja ëgweeso gifonia mughonjo atiudaha! Atee mweeso uu Mutemi wa Ayahudi!” Uvii, itungwee nëasime ufuma umusalaba seenoo guumuhuvëa. 43Naumuhuvea Muungu na uhanya nee mweeso unë Mwana wamwa Muungu, uvii, “Muungu nëamufonie nësa uguyanjisiwaa na mweeso.” 44Uvii nanë vasaa nënaavakhomiwe itambëëmwe na mweeso vëgamutuka.

Yesu ugukuya umusalaba

(Mrk 15:33-41; Luk 23:44-49; Yoh 19:28-30)

45Ufuma itungo mumwe gëfaghato, ng'ë oong'e ëgatendeka ëëmukiti. 46Itungo ra saa kenda Yesu agarëa gwa rurë aküü, “Eli, Eli lama sabakitani?” rianaayo, “Muungu wanë, Muungu wanë, njuuchu wandeka?” 47Ëgweeso vasaa nënaa vëmëkie faafo nenaa vategheeya uvii vëgahanya, “Ugumutaana Eliya.” 48Umwe wawe agamanka agahora intu nërëofifa majë, agamëhombya mu gëntu nëgëlulu, agamëtendea umpeo a ibuva, agamufa anywe. 49Vangëja vëgahanya, “Tiika goone mbesa Elia ujie umufonia.” 50Uvii, Yesu agarëa kangë gwa ruri aküü, agatëna nkhoo. 51Faafo ifufa ra hekalu#27:51 Ifufa ra hekalu rëgalamuka: Muungu nënaa wifihie wadwëëra. rëgatamuka mafande avëë, ufuma gunto faka fang'ë, ng'ë igahingëhuka, magwe ëgatamuka, 52mbëlëlo ëgarughuka na antu vingë va Muungu nënaa vakure vëgafëtiwa, 53veeso noo, nënaavafëtya, vëgafuma mu mbëlëlo, vëgingëa mu muji në weru, antu vingë vëgavoona.

54Uvii, musikee në müküü nanë vasaa nënaavëumughoja Yesu nënaavoona gitentemo ga fang'ë nanë mantu asaa nënaa adwëëraa, vëgooghofa ino, vëgahanya, “Tutë muntu uyuu naa Mwana wamwa Muungu.” 55Na faafo naavërëfo akhema vingë vëgihenga gwa kurë. Vasaa unë avoo nënaavëgamuhonga Yesu ufuma uGalilaya vëumutumamëa. 56Mukhatë awe na Mariamu Magidalena, Mariamu nyinya wawe Yakobo nanë Yosefu, itambëëmwe nanë nyinya wawe vana vamwa Sebedayo.

Ivëkwa ramwa Yesu

(Mrk 15:42-47; Luk 23:50-56; Yoh 19:38-42)

57Nënaa a mpëndë, agaja muntu umwe mughwarë muntu wa uArimataya, rina rakwe Yosefu. Mweeso noo naa musëywi wamwa Yesu. 58Agamwendea Filato agaromba afewe mwëërë wamwa Yesu. Uvii, Filato agaraghëëya afewe. 59Yosefu agauhora mwëërë wasuu agaufëëmëya sanda njija a gitani, 60agauvëka mu mbëlëlo akwe në mpya nënaa wamëdaghëë mwitalaghwe. Agarëfingiitya igwe iküü usonge a gënyamwaango ga mbëlëlo, ageenda kunë winjë. 61Mariamu Magidalena nanë Mariamu uyoo ungëja naa vëkhee gwa umëraraava mbëlëlo.

Mughoji wa mbëlëlo

62Fadiu ayo, soogëntu itiku nënaarëhongie ëroo ra Maghondanëëyo, akumbëki në aküü nanë Afarisayo vëgamwendea Filato 63vëgahanya, “Müküü, gukumbukiwe mwino mweegheeghe uyo agahanya nënaa ëkëë inakuya atëë, ‘Nëmatiku atatu akëra ngufëtya.’ 64Uvii raghëëya mbëlëlo ëghojwe faka matiku atatu gusoko asëywi vakwe vëtajee umwiva na uvakhanëa antu mwino wafëtyaa. Weegheeghe uruu wa u mpeo ugutendeka ubë nanguu ukëra uroo wamwandyo.” 65Filato agavëëra, “Ari, mukweti aghoji, endi mughoje mwino mumanyie.” 66Uvii, vëgenda vëgamëghoja fana antu vëuëkeua, vëgarëfariha igwe rasëë na umurëka faafo musikee mughoji.

Currently Selected:

Matayo 27: RNT

Highlight

Copy