Nte 5
5
Uregheghe wamwa Anania na Safira
1Ëgweeso arë urëfo muntu në uguëtaanwa Anania na mukhema wakwe uguëtaanwaa Safira. Mweeso agaghurya mari ingëja në arë yao, 2ëgweeso agafiha hela ingëja gusoko akwe mughonjo, na mukhema wakwe arë umanyie. Mweeso agatoa usaghe kunë atumami. 3Ëgweeso Fetero agamukhanëa, “Anania, asikë në Setani wijuya nkhoo ako umukhonga Mwahu Mweru na ufiha unyuma hela ingëja naarë waihangie gwa ughurya mughunda? 4Nanë arë ukëë wina ughurya arë ti mari ako mughonjona? Nanë arë waughurya hela yasii arë tiyakonaa? urë në waramwua utenda ukhani në uküü mwino urui u nkhoo ako? Veve winaakhonga antu wamukhongaa Muungu.” 5Anania narë wategheeya nkhani yasii, agagwa fang'ë agakuya na wova uküü ugavahanga voong'e naarë vategheeya uyi. 6Ahumba vëgauka vëgaukumba mwëerë wakwe na sanda#5:6 Sanda: Unë isaa ra uvëkëa akuyi. vëgamufunya unji uenda umwëka.
7Narë yakëa saa itatu vii mukhema wakwe agaja mung'ë atuune nëadwëëra. 8Fetero agamukhanëa, “Nkhanëa nene, mbesa nyenye mwaghuriye mughunda gwa hela iyiinaa?” Na mweeso agasucha, 9“Nhaa iyiiyo.” Na Fetero agamwëra, “Wurë ësëë në nyenye mwiyanjëya itambëëmwe umwëghëëya Mwahu Mweru wa Müküü? Raava, mëghuu a vasaa nëvamwëëkaa mughosya wako ëugënyamwango na veeso vëuguhoa na vevenoo vagufunye unji.” 10Genyahaafo mweeso agagwa fang'ë umëghuu akwe na agakuya. Naarë ahumba vasaa vakëa mung'ë vëgahangaa mweeso wakuyaa. Vëgamuhoa, vëgamufunya unji na vëgamwëka fifë na mughosya wakwe. 11Na wova uküü ugarëhanga kanisa roong'e na antu voong'e naarë vategheeya mantu ayai.
Makua nanë Utako
12Makua maingë nanë utako ëgatendwa mukhatë a antu gwa mëkhono a atumami. Veeso voong'e arë vëitambëëmwe ianja ramwa Solomoni. 13Arë gutie muntu unji a iburi rao nëwasoiye ukhuvëa inao, ëgweeso antu vëgavakumajua ino. 14Na ahuvëi vingë ukëanëya arë vëgiongeeya kunë Müküü, maburi a aghosya na akhema. 15Na gusoko asëë antu arë vëuvatoa unji u njëa në nküü, arue vao na uvaraëcha unto a itanda na umëkeeka në Fetero në wakërëëa hafo nampa mwimimi wakwe uvatenye vangëja. 16Na antu noo vëgagihangwëya ufuma u miji a umpeo mpeo a uYerusalemu vëgavaeta arue vao na avoo naarë vina inyonyinyonyi në ivë yamwa Setani na voong'e vëgaforiwa.
Atumami Vëukhasiwa
17Ëgweeso mukumbëki në müküü na voong'e naarë vinaawe, mwidae ra Asadukayo, na vëgagijua ghusia. 18Veeso vëgavakwata atumami na uvautëa ujera. 19Ëgweeso utiku malaëka wa Müküü agarughua inyamwango ya jera agavafunya unji na agavakhanëa, 20“Ëndi na mwende uëmëka mung'ë a hekalu na muvakhanëe antu nkhani yoog'e ya uduvi urui.” 21Na veeso naarë vategheeya uyii vëgaenda diu në nküü vëgaingëa u hekalu na vëgasëya. Itungwee mukumbëki në müküü agaja na avoo auya vakwe naarë vëitambëëmwe inao na agaëtana itambëëmwe mwirundo wa ibarasa në ikuu. Vëgagihangwëya anyampaa voong'e va Isiraeli, na vëgatüma antu u jera vende uvaeta. 22Ëgweeso atumwa naarë vafika vinavaonaa veeso mung'ë a jera, na vëgasuka vëgaeta sayu umwirundo vëuhanya. 23“Sese gwahanga jera ëutëelii, na aghoji vaëmëkie ugënyameango, ëgweeso nëgwarughua gwinahanga muntu nanë umwedu mukhatë.” 24Müküü wa aghoji va hekalu na akumbëki në aküü naarë vategheeya nkhani yasii, veeso vëgaingëwa na utako gusoko ao, vëgataka gusoko a intu ërëi. 25Na muntu umwedu agaja na uvakhanëa, “Antu avoo në nyenye arë mwavautëe mukhatë a jera vaëmëkie mukhatë a hekalu na vëuvasëya antu.” 26Na hafo müküü wa aghoji va hekalu na a tumami vawe vëgaenda na uvaeta, ëgweeso vinavaëta gwa nguu, gusoko veeso arë vaoghofete vataje utuwa na magwe na antu.
27Naarë vavaeta, vëgavaëka usonge a barasa. Na mukumbëki në müküü agavawëya 28uguhanya, “Sese gwinamughëëya nyenye gwa nguu mutasëye gwa rina ërëi, itungwee hafai nyenye mwamëijuya Yerusalemu na masëyo anyu na nyenye mufenja mweete saghami a uyi muntu kunë sese.” 29Ëgweeso Fetero na atumami vëgasucha, “Sese igunoneye umwoghofa Muungu ukëa antu. 30Muungu wa vatata vitu wamufëtiye Yesu në nyenye mwamuraghie gwa umukhoma umutë. 31Muungu wamuhumbue faka u mukhono wakwe wa gëlëlo mwino Mutongeeri na Mutyoi, avafe Vaisiraeli ufei nanë irekewa ra mahutye. 32Na sese gwëmasudanga va mantu ayai, na uvu Mwahu Mweru unë Muungu wavafie vasaa nëvamwoghofete mweeso.”
Matanantyo amwa Gamalieli
33Anyachao va mwirundo në uküü naarë veeso vategheeya vii vëgahumwa na makuo na vëgasëgha uvauragha. 34Ëgweeso Farisayo umwedu mukhatë a barasa rina rakwe Gamalieli musëyi wa seria, nënaa ukuriwe na antu voong'e, agaëmëka wëma na agaraghëëya atumami vafunywe unji gwa itungo rëkufëi. 35Na mweeso agavakhanëa, “Antu va Isiraeli, ghemi mpoa mpoa mwino chu nyenye muvatenda antu avai. 36Nyenye mukumbukiwe mwino chu Teuda agadwëëra meakha ëngëja a khae, agagitenda mweeso muntu müküü ino. Na antu vahumbee maghana ane vëgagikwatëralii inao ëgweeso mweeso agauraghwa, na ahongi vakwe voong'e vëgafaghata na mwëëmo wakwe ugahira. 37Na itungo ra uvariwa antu agadwëëra Yuda wa uGalilaya na agauta antu vëgëtunga vamuhonge mweeso. Mweesonoo agayaghaa, na voong'e naarë vamuhongete vëgafaghata. 38Uvii, gwa ihanyo ërëi itungwee nene ngumunena nyenye, ineghi na antu avai na vareki viyenedu, gusoko në mbesa mufango urui, nampa mwëëmo urui wao ufumie gwa antu veeso ugugwa. 39Ëgweeso në mbesa mwëëmo urui wa Muungu nyenye mutiudaha uvahuma. Nyenye mujie uhanga mugikhua na Muungu.”
40Uvii veeso vëgayanja masëyo akwe. Na veeso naarë vavaëtana atumami vëgavakhua na uvaraghëëya vataje vatanantye gwa rina ramwa Yesu. Veeso vëgavareka vende kunë vinjë. 41Na vëgahegha hafo ubarasa, vina uyanjo gusoko veeso vavarëywa vanoneye ukhasiwa na uiirwa mënyaa gusoko a rina rasëë. 42Na mwitiku mung'ë a hekalu na u makhaya awe vinarekaa usëya na umutanantya Yesu mwino mweeso Kiristo.
Currently Selected:
Nte 5: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.
