Nte 4
4
Fetero ina Yohana Vatowa Ubarasa
1Fetero ina Yohana narë këë veurighëëtya, akumbëki nanë müküü wa aghoji ra hekalu na Asadukayo vëgaja kunë veeso. 2Vëgahura ino, gusoko atumami vasaa arë vëuvasëya antu na uvatanantëya ufëtyo wamwa Yesu ufuma gwakuyi. 3Vëgavakwata atumami na vëgavaingëya mung'ë a jera, gusoko utiku arë wahumbea. 4Ëgweeso vaingë mukhatë a vasaa narë vategheeya ukhani vëgahuvëa na iburi ra ahuvëi rëgagiongeya ufikëa maghana a njou atano.
5Fadiu ayo aküü vawe nane anyampaa nanë aandëki vëgagihangwëya itambëëmwe uYelusalemu. 6Vëgagihangwëya itambëëmwe vina Anasi, mukumbëki në müküü na Kayafa na Yohana nanë Alekisanda, na voong'ë në va ugënyamwango ga akumbëki. 7Na itungo narë vavaëmëcha atumami mukhatëkhatë ao, vëgavawëya, “Gwa udaho kë mba gwa rina ramwanyu nyenye mwatenda ërëi?” 8Uvii Fetero arë wijue Mwahu Mweru agavasucha, “Akuu va antu nanë anyampaa, 9nëmbesa guwëywe reo, ntendo në njija në munyagëtevee uyi watendewaa, na gwa njëa kë muntu uyuu waforiwaa, nyenye mwinjë uhanya wurë. 10Nyenye nyoong'e nanë antu va Isiraeli mumanye, mwino gwa rina ramwa Yesu Kiristo wa uNasareti, në nyenye mugamukhoma umutë, në Muungu wamufëtëye ufuma gwakuyi, gusoko akwe muntu uyuu wëmëkie usonge anyu mufanga. 11Ërëë unë igwe në rahitiwe na nyenye ajengi itungwee ratendekie igwe në iküü ra musingi. 12Utyoi utigighighea u muntu mpa umwedu, gusoko mu urëmi woong'e antu vinafewa rina ra muntu ungëja në sese gudahëte utyowa na ryeeso.”
13Anyampaa va barasa vëgataka narë vaona mwino udaho wamwa Fetero inaa Yohana urë, na vëgamanya mwino chuu veeso në antu va viuyi në vinasomaa usule, na veeso vëgamanya kangë mwino veeso arë vëitambëëmwe ina Yesu. 14Ëgweeso narë veeso vamwona wasuu narë waforiwaa wëmëkie itambëëmwe inao vinadaha urighëëtya gëntu. 15Ëgweeso vëgavaraghëëya vafume unji a barasa, veeso vëgarighëëtya veeso gwa veeso. 16Vëuhanya, “Gutende urë na antu avai? Gusoko ikua ërëi rikuu ratendeka ukëërëa kunë veeso na rëdwëëre uchanya gwa antu voong'e nëvëgikhaa uYurusalemu na gutidahëte urëkhana ryëeso. 17Ëgweeso gusoko ukhani urui utaning'anëe mukhatë a antu, nëguvaghëëye veeso vatarighëëtye kangë na muntu mba umwedu gwa rina ërëi.” 18Uvii veeso vëgavaëtana na uvaraghëëya vatarighëëtye na mbesa usëya kamwe gwa rina ërëi ramwa Yesu. 19Gweeso Fetero ina Yohana vëgavasucha, “Mbesa igunoneye usonge a Muungu sese umutegheeya nyenye mbesa ukëa umutegheeya Muungu inoneye nyenye muramwue. 20Gusoko sese gutiudaha ureka urighëëtya ntendo yasëë nëgwayiune na uitegheeya.” 21Na veeso vëgavakënëa veeso gwa ukhai ino na vëeso vëgavarekea vende, vinahangaa, njëa a uvarëfya ndëfi gusoko a antu; gusoko antu voong'e vëgamukurya Muungu gusoko a rasëë nëradwëëre. 22Gusoko muntu wasuu narë watendewa ikua ra uforiwa arë wina meakha makumi ane na usaghe.
Ahuvëi Vëumuromba Muungu Avakhamie gi
23Gënyahafo veeso narë varekewa vëgaenda kunë vambuya vao na uvahanëa mwino akumbëki në aküü nanë anyampaa vaakhanëa veeso. 24Naarë vategheeya uyii, vëgahumbua nduri yao itambëëmwe kunë Muungu na uhanya, “Munyanguu Müküü, veve nëwatundie irunde nanë ng'ë nanë marambo nanë mantu oong'e në arëfo mung'ë ayo, 25na veve gwa momo wamwa tata witu Daudi, mutumami wako, wamutendie arighëëtye gwa nguu ya Mwahu Mweru,
‘Asikë në ndughu ingëja vësimbëte,
na antu vëutenda mëfango a ndende?
26Na atemi va mu urëmi vëuvëka aghonjo mëfango,
na anyagibala vëgihangwëya itambëëmwe,
umuhita Müküü na umuhita Kiristo wakwe.’
27“Gusoko në tutë voong'e vavëë Herode nanë Fontio Filato, itambëëmwe na antu nëti Ayahudi na antu va Isiraeli, vëgagihangwëya itambëëmwe umuhita mutumami wako në mweru Yesu, në veve wamutendie nëwamwiirye makuta. 28Vëgatenda rasëë roong'e në mukhono wako nanë mufango wako nëwawuragheeye nënaa këë winadwëëra. 29Na itungwee, veve Müküü, raava maoghofio ao, na ugufe sese udaho atumami vako gutanantie ukhani wako gwa udëa googhofo. 30Ughoore mukhono wako uforye antu, na utende makua na utako atendeke gwa ukëërëa u rina ra mutumwa wako në mweru Yesu.” 31Naarë veeso vadaha uromba, haafo kunë areë vataanie itambëëmwe gugahingëhuka, na voong'e vëgagijuywa na Mwahu Mweru na vëgarighëëtya ukhani wa Muungu kunu vatikweti wova.
Vëgaduva Mwino vë Mwango Umwedu
32Ahuvëi voong'e arë vina ihaa rëmwe, na nkhoo imwe. Arë gutie muntu nëuguhanya mwino gëkaku gëntu nëugëkweti në gakwe mweeso mughonjo, ëgweeso vëgaaghana oong'e gwa unig'ano. 33Na gwa nguu nyingë atumami vëgafunya usudangëi wao wa ufëtyo wa Müküü Yesu, na mboto nyingë arë yunto ao voong'e. 34Arë gutie muntu mpa umwedu narëukefewe gëntu mukhatë ao, gusoko antu voong'e naarë vakweti mëghunda na mbesa nyumba vëgaghurya na vëgaeta hela yasii naarë vaihangaa na 35na uyiëka u mëghuu a atumami. Na atumami vëgaiaghania kunë mu muntu mwino mweeso arë usëghëte. 36Na Yosefu naarë uguëtwaa na atumami rina ra nkhomba Barinaba (ryana rayo, mwana wa ufefeheyi), Mulawi, muntu wa uKufuo, 37agaghurya mughunda raarë wakwe, na agaeta hela na uyiëka u mëghuu a atumami.
Currently Selected:
Nte 4: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.
