Nte 3
3
Fetero ina Yohana Vamuforya Munyagëteve
1Itungwee Fetero nanë Yohana arë vinjë u hekalu itungo ra marombi, saa a kenda. 2Na muntu umwedu munyagëtevee ufuma ufafwa arë ugukenkwaa na antu mwitiku na arë vëumuhinëtëyaa ugënyamwango ga hekalu në arë gëutaanwa gënyamwango në Gëja. Faafo arë ugurombaa afewe mantu na antu nëvëungëa uhekalu. 3Narë wavaona va Fetero ina Yohana vëuingëa uhekalu, mweeso agavaromba vamufe gentu nëvakwete. 4Na Fetero ina Yohana vëgamukhamëchëya miho na uhanya, “Gurarave sese.” 5Na mweeso agavararava veeso, ugughema ufewa gëntu ufuma kunë veeso. 6Ëgweeso Fetero agahanya, “Ntikwete hela na mbesa sahabu, ëgweeso ngugufa rasëë nënë rëkweti. Gwa rina ramwa Yesu Kiristo wa uNasareti nguguraghëëya wuka enenda.” 7Na agamukwata mukhono wa gëlëlo, agamuhumbua gunto. Gënyafaafo mëghuu akwe nanë makunku akwe ëgahanga nguu. 8Na agariima gunto agaëmëka na wenenda. Againgëa uhekalu itambëëmwe inao, ugwenenda na uguriimanga kunu ugumukurya Muungu. 9Na antu voong'e vëgamwona mweeso ugwenenda na umukurya Muungu. 10Narë vamumanya mweeso mwino në uyuuyo unë naa ugikhaa gwa uromba warëëyi ugënyamwango në Gëja ga hekalu; na vëgijuwa na utako uküü ino gwa rasëë nërëgadwëëra kunë mweeso.
Matanantyo amwa Fetero uhekalu
11Narë këë ughaghamëre kunë Fetero nanë Yohana, antu voong'e vëgamanka itambëëmwe kunë veeso mwianja nërëutaanwa Ianja ramwa Solomoni, vëtakëte. 12Na itungo narë Fetero waona uyi agavakhanëa antu, “Aghosya va Isiraeli,” gusokoke në nyenye mutaka gwa ërëë, mba gusokoke në nyenye mukhamëchëye miho kunë sese, gënya mwino sese gwamutëndaa muntu uyuu ëmëke gwa nguu yitu nanë weru witu? 13Muungu wamwa Iburahimu na wamwa Isaka na wamwa Yakobo, Muungu wa vakükü vitu agamukurya mutumami wakwe Yesu. Në uyuuyo në nyenye mugamufunya na umukhana usonge amwa Filato, itungo në mweeso agaramua umutungwëra. 14Ëgweeso nyenye mugamukhana uyoo në Mweru na munyatutë mugafenja mufewe muuraghi. 15Na mugamuuragha uyoo Müküü wa ufanga, wasuu në Muungu agamufëtya ufuma gwa akuyi. Gwa uyuu sese gwë vamasudanga. 16Na gwa rina ramwa Yesu na gwa uhuvëi wa rina rakwe wamutendaa muntu uyi atende wina nguu, nyenye mwaona na umanya. Na gwa uhuvëi ukëërëa kunë Yesu wamufaa muntu uyuu ufanga uruu nëukhamu usonge anyu nyenye nyoong'e.
17“Na itungwee, aruna ane, nëmanyie mwino mwatendie gusoko a udëa umanya, mwino vatendie atemi vanyu. 18Ëgweeso Muungu watanantiye khaëngë gwa mëomo anyagëdaghu, mwino Kiristo wakwe unoneye ukhasëka, Muungu watendie intu ërëi rëtende ra tutë. 19Uvii fei, mwifetukëye kangë mureke ntendo yanyu në mbë, muheeywe mahutye anyu, aje matungo a uturisiwa nkhoo yanyu në Müküü wëitambëëmwe na nyenye. 20Na uvii mweeso adahe umutuma Kiristo në Muungu wamuhwaniye gusoko anyu, Yesu, 21unë arë inoneye irunde rëmughenyife faka itungo në Muungu winjë uyatenda mantu oong'e ëtende mafya. Ërëë Muungu warërighëëtiye gwa mëomo a anyagëdaghu vakwe në veru ufuma khae. 22Musa wahanyiye, Müküü Muungu winjë umwetea nyenye munyagëdaghu ufuma mukhatë anyu mwino wang'waniye nene. Nyenye imunoneye mümükurye gwa roong'e në mweeso winjë urëhanya. 23Na ëutendeka mu muntu nëwadëa umükürya munyagëdaghu wasuu ugukhamatuwa kue na antu va Muungu na uuraghwa. 24Na anyagëdaghu voong'e vadahie urighëëtya, ufuma Samweli na avoo unë vëjie unyuma, noo vatanantiye ntuni nëëjie udwëëra matiku ayai. 25Nyenye mwë ahongi va anyagëdaghu na va iraghano në Muungu wavafie va tata vanyu, uguhanya kunë Iburahimu, ‘Na mung'ë a ufafo wako, ndughu yoong'e ya muurëmi yiuforiwa. 26Muungu, narë wamuhwania mutumwa wakwe, agamutuma kunë nyenye tanju, umuforya nyenye na umutenda mu muntu ifetukëye na urekanuka na ntendo yakwe në mbë.’”
Currently Selected:
Nte 3: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.