Nte 24

Ayahudi vëumusitaaka Faulo

1Nanë aarë akëa matiku atano Anania mükumbëki në müküü agaja itambëëmwe na anyampaa vëgëtunga na murongi wa seria umwedu Teritulo. Vëgaëmëka usonge a müküü wa mükoa na vëgamusitaaka Faulo. 2Nanë aarë Faulo waëtaanwa, Teritulo agaandya umusitaaka Faulo, uguhanya: “Gusoko ukëërëa veve sese gwahangie majëghana maküü, na gusoko a utongeeri wako, munya ukuriwa në müküü Felikisi, mantu maingë atendiwe ija gusoko a ndughu itu. 3Gwa njëa yoong'e na ng'andë yoong'e sese gusëngëëya ërëi gwa uyanjo üküü. 4Ëgweeso, gutayaghaye itungo rako ino, nene nguguromba veve gwa gëhe gako ugutegheeye sese gukufëi. 5Gusoko sese gwaune muntu uyi në mululu, uguhangënkhania Ayahudi mu urëmi woong'e, na mweeso në mutongeeri wa ikhakho ra Anasarayo. 6Mweeso mbesa uvii wasoiye urëkhomba hekalu, na sese gugamukwata. 7Ëgweeso müküü wa asikai Lusia agaja na agamuhoa ufuma kunë sese gwa nguu nküü, uguraghëëya asitaaki vakwe vaje usonge ako. 8Gwa umuwëye mweeso mughonjo veve ugudaha umanya ufuma kunë mweeso mu gëntu në sese gumusitaakie mweeso.”

9Na Ayahudi noo vëgarumëya masitaaka asaa, vëuhanya mwino asaa oong'e në a tutë.

Faulo ugitetea usonge amwa Felikisi

10Na naarë müküü wa mükoa wamuhumbwëra mukhono mweeso arighëëtye, Faulo agasucha: “Gwa umanya mwino veve gwa mëakha miingë waiye umuramwui wa ndughu ëyëë, nene ngitetea mughonjo gwa uyanjo. 11Mwino veve mughonjo udahëte umanya, atinankëe matiku ikumi na avëë ufuma fana nene ngaenda uYerusalemu ümükürya Muungu u hekalu. 12Na veeso vinang'angaa nene ngikunguma na muntu mpa umwedu mba uvaruruja antu, mbesa mung'ë a hekalu mba mung'ë a sinagogi, mba mung'ë a muji. 13Nambesa veeso vadahëte uraghëëra tutë kamwe kunë vee masitaaka nëvansitaakie nene. 14Ëgweeso ukhani urui nene ngurumëya kunë veve, mwino ugining'ana na Njëa, unë veeso vëumëtaana ikhako, nene ngumukuryaa Muungu wa vatata vitu, nëhuvëe oong'e nëëraghëëywe na seria mba nëëandikiwe na anyagëdaghu. 15Nene nëkweti ighonje kunë Muungu unë avaa aghonjo noo varumëye, mwino antu nëvatutë nanë tivatutë vajie ufëtya. 16Uvii nëtintaare matiku oong'e ëse nina nkhoo në njija usonge a Muungu na usonge a antu. 17Naarë mëakha ëgëtunga ngasuka akëa nene haafo umëtoera ndughu ane waarëyi nanë dahwa. 18Mwino nene arë ngutenda uyii, veeso vëgang'anga nene nadaha gioya mung'ë a hekalu, arë gutie mwirundo mba nduvë mba mukindo. Ëgweeso Ayahudi vëgëtunga ufuma Asia arë varëfo haafo, 19veeso vanoneye ëse varëfo hafoi usonge ako na veete isitaka, nëmbesa vëkweti intu kunë nene. 20Mba fangëja uvareke antu avai aghonjo vahanye intu kë nënarëtendie në veeso varëune naarë nene naëmëka usonge a barasa. 21Ëgweeso intu ërëi rëmwedu në arë nëgarëa usonge ao, ‘Gwa utanantya ufëtyo wa akuyi nene ngughemwa usonge ako itiku ërëë ra reo.’”

22Ëgweeso Felikisi, unë arë umëmanyie Njëa vija nanguu, agavasimia veeso uguhanya, “Itungo në Lusia müküü wa asikai waja nene nëjie uramwua isitaaka ranyu.” 23Uvii mweeso agafunya maraghëëyo kunë müküü në munyui wa asikai amughoje Faulo ugëtungo, ëgweeso ëse ukweti uhaghaaro, nanë vambuya vakwe vaja vataghëëywe ufuma umwarëëya nanë umufa mantu në mweeso uyas'eghëëte.

Faulo usonge amwa Felikisi ina Durusila

24Naarë matiku ëgëtunga akëa Felikisi agaja itambëëmwe ina mukhema wakwe Durusila, unë arë Muyahudi. Na agatuma Faulo aretwe na amutegheeye mweeso nëugurighëëtya uhuvëi mung'ë amwa Kiristo Yesu. 25Na mwino Faulo agarighëëtya gwa nguu nëëghookee tutë nanë wibali wa uduvi nanë uramwui nëujie, Felikisi agaoghofa na agahanya, “Enda kunë winjë, nëhikwe nahanga itungo ngugwëtaana.” 26Itungo ërëëro ërëëro mweeso arë ughemete mwino Faulo udahëte umufa hela. Uvii mweeso arë ugumwëtaananga tëkëtëkë vende usanya inakwe. 27Ëgweeso naarë mëakha ëvëë akëa, Forikio Fesito agahoa üküü wa mukoa gikhondo ramwa Felikisi. Felikisi gwa ufenja uvayanjisya Ayahudi agamureka Faulo ugëtungo.

Currently Selected:

Nte 24: RNT

Highlight

Copy