Nte 25

Faulo waromba ende utegheeywa na Kaisari

1Naarë Fesito waja u mukoa wakwe nënaa matiku atatu akëa agaenda uYerusalemu ufuma uKaisaria. 2Na akümbëki në aküü nanë atongeeri va Ayahudi vëgamutoera mweeso masitaaka amwa Faulo. Na veeso vëgamukhonkhomeka mweeso, 3vëgamuromba mwino gwa uvayanjisya veeso amutoe Faulo uYerusalemu, kunu vëna mufango wa uja umusama na umuuragha në wë munjëa. 4Festo agavasucha mwino Faulo utungiwe ukoo uKaisaria, na mwino mweeso mughonjo ughemete gwenda kuuko matiku ayaaya. 5Na mweeso agahanya, “Uvii, vareki atongeeri mukhatë anyu gwende itambëëmwe nanee, na nëmbesa muntu uyi watendie ihutye mba rëmwe, vareki veeso vamusitaake.”

6Naarë mweeso wikhaa mukhatë awe matiku nëëtinankëe munana mba ikumi agaenda faka uKaisaria. Fadiu ayo mweeso agikheera itumbë ra uramwui na agaraghëëya Faulo aretwe. 7Naarë Faulo waja, Ayahudi në are vendaa ufuma uYerusalemu vëgaëmëka vëmukungëye mweeso. Veeso vëgaeta masitaaka maingë na maito kunë mweeso unë veeso vinadaha uyaroghoisya masitaaka asaa na tutë nëërëfo. 8Faulo agahanya gwa gitetea, “Nene ntinatendaa ihutye ra urua seria a Ayahudi, nambesa a hekalu, nambesa ntinamuhutya Kaisaria mbanduvë.” 9Ëgweeso Fesito, gwa ufenja uvayanjisya Ayahudi, agamuwëya Faulo, “Veve uguyanjana wende uYerusalemu, na kuuko wende uramwuwa masitaaka ayai usonge ane?” 10Ëgweeso Faulo agasucha, “Nene nëmëkie usonge a barasa ramwa Kaisari, kunë nene nënoneye uramwuwa. Nene ntinatendaa ihutye mba rëmwedu gwa Ayahudi, mwino veve umanyie ija ino. 11Uvii nëmbesa nene nëmuhutii, na natendie intu nërënoneye nene uramwuwa ikuya, nene ntiufenja ginegha ikuya. Ëgweeso nëmbesa ti tutë u masitaaka ao nëvansitaakie nene, gutie muntu mpa umwedu nëudahëte untoa nene u mëkhono ao. Nene nguromba isitaaka rane rende uramwuwa na Kaisari.” 12Uvii Festo, naarë mweeso warëghëëtya na ibarasa rakwe, agasucha, “Veve waromba wende kunë Kaisari; kunë Kaisari veve winjë.”

Faulo usonge amwa Agirifa Berinike

13Naarë matiku ëgëtunga akëa, mutemi Agirifa nanë Berinike vëgafika uKaisaria umughenyifa Festo. 14Na mwino veeso arë vikhaa kuuko matiku maingë, Festo agamudonea mutemi isitaaka ramwa Faulo, uguhanya, “Urëfo muntu hafai në Felikisi wamurekie ujera. 15Nanë aarë nene arë nëukoo uYerusalemu, akumbëki në aküü nanë anyampaa va Gëyahudi vëgampa sayu nëëmughokee, mweeso, vëuromba mweeso aramwuwe. 16Nene nëgavasucha veeso mwino arë ti ntende a Arumi umufunya muntu aramwuwe në kë munyausitaakëwa ainatang'ana usyu gwa usyu na anyaumusitaaka. Nërëufenjiwa në munyausitaakewa ahange ikhondo ra gitetea mweeso mughonjo ugining'ana na isitaaka nëusitaakiwe. 17Gwa uvii naarë veeso vaja itambëëmwe hafai, nene ntinatinyaa, fadiu ayo nene ngagikha gitumbë rane ra uramwui na ngaraghëëya asikai vamwete muntu wasuu mung'ë. 18Naarë asitaaki vakwe vëmëka, veeso vinaetaa isitaaka në rivë mug'ë a isitaaka rakwe nanee arë nëghemete uyui. 19Ëgweeso veeso arë vakweti mawëyo angëja angëja agikunguma itambëëmwe na mweeso mantu nëëghokee dini awe, nanë sayu nëëmughokee Yesu, unë arë wakuree, ëgweeso Faulo ugususutëyo mwino mweeso mufanga. 20Gwa utumba mwino nguyamanyënkëya mantu ayai, nene ngamuromba Faulo nëmbesa mweeso ugufenja uenda uYerusalemu na ende uramwuwa kuuko gwa uhonga na masitaaka awe. 21Ëgweeso naarë Faulo waromba asaghe ujera faka gwa uramwui wa mutemi në müküü, nene ngaraghëëya mweeso afwaghëëre guutëwa faka në nene nëjie umutoa mweeso kunë Kaisari.” 22Na Agirifa agamukhanëa Fesito, “Nene ajangufenja umutegheeya muntu uyi mughonjo.” Fesito agamukhanëa, “Fadiu veve winjë umutegheeya.”

Faulo usonge amwa Agirifa nanë Berinike

23Uvii fadiu ayo Agirifa ina Berinike vëgaja na luhëda nküü, na vëgaingëa u nyumba a wihangwëyi itambëëmwe na aküü va asikai nanë antu në aküü va muji. Uvii Fesito agaraghëëya Faulo aetwe mung'ë. 24Na Fesito agahanya, “Mutemi Agirifa nanë nyenye nyoong'e nëmwë hafai itambëëmwe nasee. Nyenye mumukengee muntu uyi në Ayahudi voong'e vinenere kunë nene, avoo në va kuuko uYerusalemu nanë va hafai, vakuriye mukindo mwino mweeso atinoneye uduva mpa gunyui. 25Ëgweeso nene ntinaona mwino watendie intu mpa rëmwedu nërëmunoneye mweeso uuraghwa. Na mwino mweeso mughonjo warombie nëmutoe kunë Kaisari, nene nëgaramwua umutoa mweeso. 26Ëgweeso nene ntikweti ukhani në wa tutë wagwandëka kunë müküü wane nëëmughokee mweeso. Gwa uvii nene namwetaa usonge anyu, na, ino usonge ako, Mutemi Agirifa, mwino, nëwadaha umumanyënkëëya mweeso, nene nëudaha uhanga intu ragwandëka. 27Gusoko ëraghëëre kunë nene ti ihaa, umutoa mutungwa, na udëa uraghëëra daaji masitaaka nëëmughokee mweeso.”

Currently Selected:

Nte 25: RNT

Highlight

Copy