Nte 23

1Na Faulo, agavakhamëëhëya miho antu vasaa va barasa, agahanya, “Aruna ane, nene naduvie usonge a Muungu gwa nkhoo oong'e në njija faka itiku ërëi ra reo.” 2Na Anania, mukumbëki në müküü agaraghëëya vasaa unë naarë vimëkie fife na Faulo vamukhue mweeso na ighanja umoomo. 3Uvii Faulo agamukhanëa, “Muungu winje ugukhua veve, veve në wë mwino nkhando a nyumba nëëfaihie sakaa në njeru! Veve wikhee ugunamwua nene gwa uhonga na seria, na kë veve wë hiya na seria veve uguraghëëya nene ukhuwa?” 4Vasaa unë arë vëmëkie fife vëgamukhanëa, “Urë veve ugumutuka mükumbëki në müküü wa Muunguna?” 5Na Faulo agahanya, “Nene ntimanyie, aruna mwino mweeso arë mükumbëki në müküü; gusoko ëandëkiwe, ‘Veve utaje urighëëtya në mavë kunë müküü wa antu vako.’”

6Ëgweeso naarë Faulo wamanya mwino ikhakho rëmwedu arë Asadukayo na rëngëja arë Afarisayo, mweeso agahumbua ruri mung'ë a barasa, “Aruna anë, Nene në Farisayo, mwana wamwa Farisayo. Nene ngughemwa gusoko a ighonje nënërëkweti nërëghookee ufëtyo wa akuyi.” 7Në aarë mweeso warighëëtya uyi, ubaghuki ugadwëëra mukhatë a Afarisayo nanë Asadukayo. Na mwirundo ugatemanuka. 8Gusoko Asadukayo vëuhanyaa mwino gutie ufëtyo wa akuyi, mba malaëka mba nkhoo. Ëgweeso Afarisayo vahuvëe asaa oong'e. 9Uvii ibobo iküü rëgakua nanguu. Aandëki vëgëtunga va uvaru wa Afarisayo vëgaëmëka wëma vëgafënga gwa nguu, “Sese gwinaona ihutye mpa rëmwe u muntu uyui, në mweeso warëtendie. Urë nësa malaëka mba nkhoo warighëëtya inakwe?” 10Nanë aarë ibobo rakua nanguu, müküü wa asikai, agaoghofa mwino Faulo udahëte uhafuangwa mafegha na veeso. Mweeso agaraghëëya asikai vatununte fang'ë na vende umuhoa mweeso gwa nguu mukhatë ao na vamutoe mung'ë a nkhambë ya asikee.

11Utiku nëuhongie Müküü agëmëka fifë inakwe na agamukhanëa, “Khamia nkhoo, gusoko mwino veve wansudangëa nene hafai uYerusalemu, uvii inoneye veve unsudangëe viuyi viuyi uko uRumi.”

Ayahudi vëutenda mufango wa umuuragha Faulo

12Naarë wacha, Ayahudi vëgatenda mufango na vëgitunga aghonjo gwa girafëa mbesa vatiulia mbesa unywa gëntu faka vamuyaghe Faulo. 13Arë varëfo antu makumi ane na usaghe në arë vatendie mufango. 14Na veeso vëgaenda kunë akumbëki në aküü nanë anyampaa na vëgahanya, “Sese gwitungalii na girafëa mwino gutatomye malëwa faka gwamuuragha Faulo. 15Gwa uvii nyenye, itambëëmwe na ibarasa, funyi irombi itungwee kunë müküü wa asikai umweta Faulo fang'ë kunë nyenye, gënya mwino nyenye mufenja umanya ija isitaaka rakwe. Na sese gwighondanëye umuragha në akë ainahumbea fifë.”

16Na mwifwa wamwa Faulo agategheeya mufango wao wa umuuragha. Uvii mweeso agaenda na againgëa u nkhambë a asikee kunë arë Faulo wuutëe na agamukhanëa Faulo. 17Na Faulo agamwëtaana umwedu wa aküü në anyui wa asikai na agamwëëra, “Muhoe muhumba uyi umutoe kunë müküü wa asikai; gusoko ukweti gëntu ga umukhanëa mweeso.” 18Uvii mweeso agamuhoa muhumba wasuu na agamutoa kunë müküü wa asikai na agamwëra, “Faulo në mutungwa wanjëtaana nene na unomba nëmwete muhumba uyi kunë veve, gusoko mweeso ukweti gëntu ga ugukhanëa veve.” 19Müküü wa asikai agamuhoa mweeso kunu umukwatëe mukhono, na vëgaenda u mpeo na agamuwëya u gëmpëhë, “Veve ukweti ntuni nëugufenja unkhanea nene?” 20Na muhumba wasuu agamukhanëa, “Ayahudi virumëya vagurombe veve umwete Faulo fang'ë ubarasa fadiu, gënya mwino veeso vëufenja umanya ija nkhani nëimughokee mweeso. 21Ëgweeso veve utavayanjëye veeso. Gusoko mukhatë ao varefo antu makumi ane na usaghe në vifihie na vaindëe uja umumankëa mweeso, veeso aghonjo vitungie na virafëa mwino mbesa vëtiulia mba unywa faka vamuuragha Faulo. Na itungwee veeso vighondanëya vaindëe uramwui ufuma kunë veve.” 22Uvii müküü wa asikai agamurekea muhumba wasuu, ugumuraghëëya, “Utamukhanëe muntu mpa umwedu mwino veve wankhanëe nene sayu ëyëi.”

Faulo watowa kunë müküü wa mükoa

23Uvii mweeso agaëtaana vavëe mukhatë a aküü va asikai në anyui na agavakhanëa, “Itungo ra saa a gatatu a utiku ghondanëyi asikai maghana avëë na anyaunatëa nyumbu makumi mufungatë na anyagihoma na mëkoha maghana avëë vende faka uKaisaria. 24Kangë noo nënganëyi nyumbu gusoko Faulo adahe unatëa, mumutoe mweeso ëse mufanga ryuu faka kunë Felikisi, müküü wa mukoa.” 25Na müküü wa asikai agaandëka keeti vii; 26“Nene Kilaudia Lusia veve, Munya üküriwa ino Felikisi, müküü wa mükoa. Amucha. 27Muntu uyi arë wakwatiwe na Ayahudi, na arë wë fifë guuraghwa na veeso. Naarë nene naghea kunë veeso itambëëmwe na asikai na umutaya mweeso, na nëgamanya mwino mweeso arë Murumi. 28Na gwa ufenja umanya masitaaka në arë veeso vëmusitakie, ngamutoa mweeso u barasa ao. 29Nene ngaona mwino mweeso wasitakiwe gusoko a mawëyo a seria ao, ëgweeso arë atinoneye guuraghwa mba utungwa ujera. 30Nanë nafewa sayu mwino urëfo mufango wa umuuragha muntu uyi ngamweta kunë veve gënyahaafo, ngavaraghëëya anyaumusitaka vakwe noo vahanye masitaka ao usonge ako ntuni në veeso vamusitakie.”

31Uvii asikai, ugining'ana na maraghëëyo në arë vayafewa, vëgamuhoa Faulo na vëgamweta mweeso utiku uruurouruuro kunë Antipari. 32Na fadiu ayo, asikai nëvëuenenda na mëghuu vëgasuka u nkhambi a asikai, vëgavareka anyaunatëa nyumbu vende itambëëmwe inaa Faulo. 33Naarë veeso vafika uKaisaria na vamufa müküü wa mükoa keeti asëë veeso vëgamureka Faulo noo usonge akwe. 34Naarë wamësoma keeti asëë mweeso agawëya ufumie u mukoa wagufei. Naarë mweeso wamanya mwino Faulo ufumie u mükoa wa uKilikia, 35müküü wa mükoa agahanya, “Nene ninjë ugutegheeya veve në anyaugusitaaka vako vafika.” Na mweeso agaraghëëya aghojwe mung'ë a nyumba a mutemi Herode.

Currently Selected:

Nte 23: RNT

Highlight

Copy