Nte 16

Faulo vakhuëra ina Timoteo nanë Sila

1Na Faulo agafika noo faka uDeribe na faka uLisitira. Hafo arë urëfo musëywi, rina rakwe Timoteo, mwana wa mukhema wa Gëyahudi; në arë muhuvëi ëgweeso ihe arë Muyunani. 2Timoteo arë ugurighëëtiwa ija na aruna voong'e va kuuko uLisitira nanë va Ikonio. 3Faulo agafenja Timoteo vakhuvëe inakwe; na agamuhora mweeso na agamutoa ihungu gusoko a Ayahudi në arë vëgikhaa kuuko, gusoko voong'e arë vëmanyie mwino ihe arë Muyunani. 4Mwino veeso arë vinjë vëgakëërëa u miji, veeso vëgavafa maraghëëyo unë aramwuwe na atumami nanë anyampaa va kuuko vëkuuko uYerusalemu vayakwatëëre lii. 5Uvii makanisa ëgakhoma mu uhuvëi, na isabu ra ahuvëi rëgagiongeeya mu itiku.

Faulo Waotea Ndoti uTuroa

6Na veeso vëgaenda ukëërëa mëkoa a uFirigia na uGalatia, kunu vëughiiywa na Mwahu Mweru vatatanantye ukhani mu Asia. 7Naarë vafika u mëmbë a uMisia, vëgaëghëëya uenda u mukoa wa Bitinia, ëgweeso Mwahu wamwa Yesu ainavanjëyaa veeso. 8Uvii gwa ukëëra uMisia, veeso vëgaenda uTuroa. 9Na ndoti ëgamudwëëra Faulo utiku wasuu: agamwona muntu umwedu wa u Makedonia wëmëkie ugumunena mweeso na uguhanya, “Nju kunu uMakedonia ugwarëëye.” 10Naarë mweeso waona ndoti asëë, gënyahafo sese gugafenja uenda uMakedonia, gugaramwua mwino Muungu wagwëtanie sese gutanantye Sayu në Njija gwa antu vasaa.

Utyoeka kunë Lidia

11Gwa uvii gugaenda gwa njëa a irambo ufuma u Turoa, gugaenda gughokie faka uSamotira, na fadiu ayo gugafika uNeafoli. 12Na ufuma hafo gugafika uFilifi, në arë muji në uküü wa wilaya a uMakedonia, na arë wibalëtwe na utemi wa Gërumi. Sese gugasagha mu muji wasuu gwa matiku ëgëtunga. 13Na itiku ra sabato sese gugafuma unji a gënyamwango ga muji, gugafika u mpeo a mongo, fana sese gugaghema, faafo arë itumbë ra marombi. Sese gugagikhaa fang'ë na gugarighëëtya na akhema në arë vihangwëëya itambëëmwe. 14Umwedu në arë wagutegheeye sese arë mukhema rina rakwe Lidia, ufuma u muji wa uTiatira, në arë ugurinjaa masaa a sambarau, në arë ugumukuryaa Muungu. Müküü agarughua nkhoo akwe ategheeyeche asaa në arë Faulo ugurighëëtya. 15Na naarë mweeso wabadiswa, itambëëmwe na antu va ukhakwe, agaguromba sese uguhanya, “Nësa nyenye mwaramwua nene najaa në muhuvëi kunë Müküü, njii u nyumba ane na mwikhae.” Na agagukhonkhomeka sese gwende.

16Mwino arë sese gwinjë gitumbë ra marombi, gugataana na muncha në arë mutughwa unë arë ukweti nkhoo a gënyonyinyonyi ga uraghua na arë uguvaetea aküü vakwe sao nküü. 17Agamuhonga Faulo nanë sese, ukuriye mukindo, “Antu avai në atumami va Muungu në ugunto Nanguu, unë vëutanantya kunë nyenye njëa a utyoi.” 18Na ërëë mweeso agarëtenda gwa matiku maingë. Ëgweeso Faulo ugahura, na agagifetukëya na ugëkhanëa gënyonyinyonyi gasëë, “Nene nguguraghëëya veve gwa rina ramwa Yesu Kiristo mufume muncha uyui.” Na gëgamufuma itungo ërëëro.

19Ëgweeso naarë aküü vakwe vaona mwino nkumbu yao ya uhanga sao yauraa, vëgumukwata Faulo ina Sila vëgavautuuta veeso faka uchanya usokoni usonge a aküü va muji. 20Na naarë veeso va atoa kunë aramwui vëgahanya, “Antu avai në Ayahudi na veusacha hëngahënga gwa antu va muji witu. 21Vëugusëya sese ntende nëiihiya na seria yitu në sese Arumi gutiudaha uyighenyifa na uyitenda.” 22Mwirundo ugakhuvëa mung'ë a uvakhua va Faulo ina Sila, na aramwui vëgavayuëya masaa ao na vëgafunya maraghëëyo vakhuwe na iboko. 23Nane veeso vakhua makhui në mavë nanguu, vëgavaghumëa va Faulo ina Sila mung'ë a jera, na umuraghëëya musikai wajera avaghoje ino. 24Naarë wahanga iraghëëyo erei, mweeso agavaghumëa ugësunkune ga jera na agavatungëëra mëghuu awe ugëfandwa.

25Ëgweeso gënya utiku wa mukhatë Faulo ina Sila arë vëumuromba Muungu na umwëmbëa nyëmbo ya umukumajua. Na atungwa arë vavategheeye veeso. 26Na gënyahafo gugadwëëra gëtetemo gëkuu ga fang'ë, gëgahingisya misingi a jera; na gënyahafo ndurii yoong'e ëgarughuka na mu muntu mëkhua ëganyonyoka. 27Naarë mughoji wa jera wauka na waona mwino ndurii ya inyamwango ya jera ii mwarii, agahofoa ufanga agafenja ugiuragha mweeso mughonjo, ugughema mwino atungwa voong'e vatëja. 28Ëgweeso Faulo agakurya mukindo gwa ruri në üküü, “Utagiuraghee veve mughonjo, gusoko sese soong'e gurëfo hafai.” 29Na mweeso agaraghëëya imwe yietwe na agadua winjë mung'ë, ugukhakhata itambëëmwe na wova agagwa fang'ë usonge a mëghuu amwa Faulo ina Sila. 30Mweeso agavafunya unji na agahanya, “Aküü vane, inoneye nëtende ntuni nëtyoeke?” 31Na veeso vëgamusucha, “Muhuvëe Müküü Yesu, na veve winjë utyoeka, veve nanë antu va ukhaako.” 32Uvii mughoji wa jera agavaeta veeso u nyumba akwe, na veeso vëgamukhanëa ukhani wa Müküü, mweeso nanë voong'e në arë vë unyumba akwe. 33Na mweeso agaahora itungo ërëëro ra utiku, na agavaoyeya nkhomee yao, na mweeso agabadiswa gënyahafo, itambëëmwe na antu voong'e va ukhaakwe. 34Mweeso aganing'anëya malëwa gusoko awe. Na mweeso agayanja itambëëmwe na antu voong'e va ukhaakwe mwino mweeso agamuhuvëa Muungu.

35Ëgweeso nënaa gwacha aramwui vëgatuma aküü va asikai vende uhanya. “Varekei antu vasaa vende.” 36Na mughoji wa jera agamukhanëa Faulo nkhani yasii, uguhanya, “Aramwui vatuma antu gusoko nyenye murekewe mwende, uvii itungwee fumi unji na mwende gwa majëghana,” 37Ëgweesp Faulo agamukhanëa, “Veeso vagukhua sese iboko uchanya usonge a antu, na vinaguramwua na sese noo gwë Arumi, na vagughumëa sese mung'ë a jera. Na itungwee vëufenja ugufunya gwa gëmpëhë? Na heye! vareki veeso aghonjo vaje ugufunya unji?” 38Musikai agavatoera aramwui nkhani yasii, na vëgaoghofa naarë vategheeya mwino veeso arë Arumi. 39Uvii vegaja na vëgavaromba vavaonee uvai. Na vëgavafunya unji na vëgavaromba vaheghe u muji wasuu. 40Uvii Faulo ina Sila vëgafuma unji a jera, na vëgaenda u nyumba amwa Lidia. Kuuko vëgatang'ana na aruna vao, naarë vafefeheya vëgahegha.

Currently Selected:

Nte 16: RNT

Highlight

Copy