Nte 15

Mwirundo wa uYerusalemu

1Ëgweeso vëgaja antu vëgëtunga ufuma u Yahudi faka Antiokia na arë vëuvasëya ahuvëi, “Nëmwadëa uenda ihungu ugëning'ana na ntende a seria amwa Musa mutiudaha utyoeka.” 2Na Faulo ina Barinaba naarë vikunguma na gisuchanga itambëëmwe inao, ahuvëi vëgavahwania Faulo ina Barinaba nanë antu vangëja vëgëtunga gwenda faka uYerusalemu kunë atumami nanë anyampaa gusoko a ukhani urui. 3Uvii, kanisa rëgavatuma veeso, vëkakëra ukëërëa ung'ë a uFoinike nanë uSamaria, vëgaadonea mwino Anyagëlungu vamufëtukëa Muungu na sayu ëyëë ëgasacha uyanjo uküü nanguu gwa ahuvëi voong'e. 4Naarë vafika uYerusalemu, vëgaghenyifwa na kanisa nanë atumami na anyampaa, na vëgatanantya oong'e në Muungu wayatendie itambëëmwe inao. 5Ëgweeso ahuvëi vëgëtunga në va idae ra Afarisayo vëgaëmëka, na vëgahanya, “Inoneye antu nëti Ayahudi vatowe ihungu, na uvaraghëëya uhonga seria amwa Musa.”

6Atumami nanë anyampaa vëgagihangwëya itambëëmwe ughema ukhani urui. 7Naarë wikungumi warifia nanguu, Fetero agaëmëka na agavakhanëa, “Aruna ane, nyenye mumanyie mwino matiku a mwaandyo Muungu wahwaniye mukhatë anyu, mwino gwa momo wane antu nëti Ayahudi vategheeye sayu në njija na uhuvëa. 8Na Muungu nëumanyie nkhoo ya antu agavasudangëa veeso, uguvafa Mwahu Mweru mwino watendie kunë sese. 9Na ainatendaa ubaghui mukhatë itu na kunë veeso, ëgweeso waoyiye nkhoo yao gwa uhuvëi. 10Gwa uvii itungwee asike në nyenye mumwighëëya Muungu gwa uvariecha ahuvëi iyoki u nkingo yawe në mbesa vatata vitu mba sese gwinadaha urëkenka? 11Ëgweeso sese guhuvëe mwino gwinjë utyoewa ukëërëa mboto a Müküü Yesu, mwino chu veeso.”

Uramwui wamwa Yakobo

12Na mwirundo woong'e ugakiatwe; na vëgavategheeya va Barinaba ina Faulo nëvëuvadonea makua nanë mantu a utacha në Muungu wayatendie ukëëra kunë veeso mukhatë a antu nëti Ayahudi. 13Naarë veeso vadaha urighëëtya, Yakobo agasucha, “Aruna ane, ntegheeyi nene. 14Simioni wadaha ugukhanëa mwino Muungu mwandyo waasoiye antu nëti Ayahudi, gusoko ahwanie antu mukhatë ao gusoko a rina rakwe. 15Na itambëëmwe na ërëë nkhani ya anyagëdaghu irumëye, mwino ëandëkiwe,

16‘Nëëhikwe ayai akëa nene ngusuka,

na nene nëjie umëjenga mëkhao amwa

Daudi në aiye makumuu,

na nene nguyajenga kangë,

17uvii antu nëvasaghie vadahe umufenja Müküü,

na voong'e nëti Ayahudi në vaëtaaniwe gwa rina rane,

18uguhanya Müküü, unë wayatendie mantu

ayai amanyëke ufuma khae.’

19Gwa uvii uramwui wanë në mwino sese gutavafunduye avoo nëti Ayahudi unë vëumufëtukëa Muungu, 20ëgweeso inoneye guvaandëkëe veeso keeti na uvaraghëëya vineghe ufuma na uvaya wa arungu vawegheghe na ufuma uramatwë na ufuma ulia nyama aimwana nërënyomiye na vatanywe saghami. 21Gusoko ufuma mpafo ya mwandyo Musa arë ukweti antu vasaa mu muji në vëutanantya nkhani yakwe, na nkhani yakwe yusomwaa mu sabato mung'ë a masinagogi.”

Keeti u Makanisa

22Uvii atumami nanë anyampaa, itambëëmwe na kanisa roong'e, vëgaona guja uhwania antu mukhatë ao na uvatuma Antiokia itambëëmwe ina Faulo nanë Barinaba. Vëgavatuma Yuda nëuguëtaanwa Barisaba, nanë Sila, antu në arë vëkuriywe ino mukhatë a ahuvëi, 23na vëgatuma keeti itambëëmwe na, “Sese, atumami nanë anyampaa, aruna vanyu, gumuramucha nyenye antu nëti Ayahudi në muduvie Antiokia nanë uSiria nanë uKilikia. 24Gusoko sese gwategheeye mwino antu vëgëtunga ufuma kunë sese vamufunduye nyenye gwa nkhani, vakhombie mahaa anyu, mbesa sese gwinavafaa maraghëëyo. 25Sese gugaona vija gugihangwëëye itambëëmwe, guhwanie antu na uvatuma kunë nyenye, itambëëmwe na ayanjwi vitu Faulo ina Barinaba. 26Antu avai vafunyiye uduvi wao uholota gusoko a Müküü witu Yesu Kiristo. 27Gwa uvii sese gwavatuma va Yuda ina Sila, në veeso aghonjo vajie umukhanëa nyenye mantu ayaayo gwa nkhani ya umoomo. 28Gusoko adwëëre guja kunë Mwahu Mweru nanë kunë sese gutamwitwëëche nyenye mwëgho në uküü nëutambukëe mantu ayaa: 29mwino nyenye mwineghe ufuma u malëwa nëakumbëkëwe gwa arungu va wegheeghe na mutanywee saghami, mutalee nyama a imwana nërënyomiywe, nanë ufuma uramatwë. Nësa nyenye aghonjo mwadëa utenda mantu ayai, uvii nyenye mwinjë utenda ija. Gwa heri.”#15:29 Gwa heri: Iramucha mba ukhani wa urekanuka na muntu.

30Uvii naarë vatumwa, veeso vëgaenda faka Antiokia; na naarë vaahangwëëya ahuvëi itambëëmwe vëgavafa keeti asëë. 31Nanë vamësoma keeti asëë, veeso vëgayanja ino gwa ufefeheyi. 32Na Yuda ina Sila, unë veeso aghonjo arë anyagëdaghu, vëgavafefeheya ahuvëi gwa nkhani nyingë na uvakhomya nkhoo. 33Nanë veeso vikhaa, kuuko matiku ëgëtunga, ahuvëi vëgavareka Yuda ina Sila vende gwa majëghana gwa vasaa unë naarë vaatumie. 34(Ëgweeso Sila agaona guja usagha kuuko). 35Ëgweeso Faulo ina Barinaba vëgasagha Antiokia, vëusëya na utanantya ukhani wa Müküü, itambëëmwe na antu vaingë vangëja noo.

Faulo varakanuka ina Barinaba

36Nanë matiku ëgëtunga akëa Faulo agamukhanëa Barinaba, “Njuu, kwende gusuke na guvaseye aruna vitu mu muji kunë sese gwatanantye ukhani wa Müküü, na goone mwino vafwaghëëre.” 37Na Barinaba arë usëghëte vamuhoreeye Yohana nëuguëtaanwa Mariko. 38Ëgweeso Faulo agaghema ti guja umuhoreeya gusoko agavareka naarë vëkuuko uFamfilia, na agahita ufwaghëëra utenda mwëëmo itambëëmwe inao. 39Na hafo gugadwëëra wikungumi ukhai, uvii veeso vëgarekanuka, mu muntu na njëa akwe. Barinaba agamuhoa Mariko vende itambëëmwe inakwe gwa njea a irambo faka uKipuro. 40Ëgweeso Faulo agamuhwania Sila vëgahegha, kunu vëurombewa na ahuvëi vafewe mboto a Müküü. 41Na mweeso agaenda ukëërëa uSiria nanë uKilikia, uguyakhomya makanisa.

Currently Selected:

Nte 15: RNT

Highlight

Copy