Nte 17

Mukindo uTesalonika Gusoko a Matanantyo amwa Faulo

1Naarë veeso vakëara ukëërëa Amfifoli nanë Afolinia, veeso vëgaja faka uTesalonika, fana arë rërëfo sinagogi ra Gëyahudi. 2Na Faulo againgëa mukhatë, mwino arë ntende akwe. Na gwa majuma atatu arë ugusanya itambëëmwe na veeso ufuma maandëko, 3uguvadonea na uvaaghëa mwino arë inoneye Kiristo ukhasiwa na ufëtya ufuma gwakauyi, na uguhanya, “Yesu uyui, në nene ngumutanantya kunë nyenye në Kiristo.” 4Na vangëja mukhatë ao vëgahuvëa na vëgakhuvëa inaa Faulo nanë Sila. Na iburi iküü ra Ayunani nëvëumukuryaa Muungu nanë akhema ti akei në atongeeri vëgakhuvëa inao. 5Ëgweeso Ayahudi arë vëgaona wiru, na vëgahoa antu, vëgëtunga në avë nanë vahoro, veeso vëgahangwëya mwirundo. Vëgatenda mukindo u muji, na vëgamëmankëa nyumba amwa Yasoni, vëufenja uvafunya va Faulo ina Sila unji gwa antu. 6Na naarë veeso vadëa uvahanga, vëgamuutuuta Yasoni na ahuvëi vëgëtunga usonge a aküü va muji, vëkuriye mukindo, vëuhonya, “Antu avai vëukundughusya urëmi itwe fang'ë mëghuu unto vafikaa hafai noo, 7na Yasoni waaghenyifa veeso. Na veeso vëutenda hiya na maraghëëyo amwa Kaisari, vëuhanya mwino gwina mutemi ungëja nëugwëtaanwa Yesu.” 8Na antu vasaa nanë aküü va muji vëgahangënkhaniwa naarë vategheeya uyii. 9Naarë vahoa ughoji ufuma kunë Yasoni na auyakwe, vëgavareka vende kunë vinjë.

uBeroya

10Gënyahaafo ahuvëi vëgavatuma va Faulo ina Sila utiku uruuro vende faka uBeroya. Na naarë vafika vëgaenda usinagogi ra Ayahudi. 11Na Ayahudi avai arë vëmwighuyo ukëa avoo va uTesalonika, gusoko vëgaughenyifa ukhani gwa nkhoo a winyumpii. Veeso mwitiku vëgayafeenkeya Maandëko në Maeru vëufenja vaone mpa mantu ayai arë ëuyi. 12Gwa uvii vaingë mukhatë ao vëgahuvëa, itambëëmwe na akhema vaingë va Gëyunani naarë vakweti ukumu wa unto mwino wa aghosya. 13Ëgweeso Ayahudi va uTesalonika naarë vamanya mwino ukhani wa Muungu ugutanantiwa na Faulo kuuko uBeroya noo, vëgaenda kuuko noo, vëuvalaghundua na uvasoseya mwirundo. 14Uvii genyahafo ahuvëi vasaa vëgamutoa Faulo faka girambo, ëgweeso Sila ina Timoteo vëgasagha kuuko. 15Ahuvëi vasaa naarë vamutindëkëa Faulo vëgamutoa faka Ateni. Na vëgahora maraghëëyo ufuma kunë Faulo mwino chu Sila ina Timoteo nëgwadahëka vatatinye umusambëya urë. Veeso vëgaenda kunë vijë.

Faulo Ugusanya na Antu va Ateni

16Faulo naarë këë uvaindëe kuuko Ateni va Sila ina Timoteo, nkhoo akwe ëgefya ino naarë waona muji wasuu wijue sanamu ya arungu. 17Uvii agagikunguma mukhatë a sinagogi na Ayahudi nanë antu nëvëumuromba Muungu. Na mwitiku arë ugikungumaa itambëëmwe na antu vasaa nëvadwëëra hafo. 18Na vangëja noo nëvahongete elimu wa Efikuro na wa Asitoiko, vëgagikunguma inao. Na vangëja vëgahanya, “mufutu uyi ugufenja uhanya ntunihe?” Vangëja vëgahanya, “Mweeso wigheete mwino mutanantii wa arungu në aghenyi,” gusoko arë ugutanantya sayu amwa Yesu nanë ufëtyo. 19Na veeso vëgamuhoa Faulo na vëgamweta faka usonge a barasa ra Areofago#17:19 Areofago: Ibarasa raurongea choo mba gisëyo masëyo në mafya. vëuhanya, “Sese gudahana umanya ntuni isëyo ërëë në ifya në veve ugurërighëëtya? 20Gusoko veve ugweta mantu mafya u matwe itu. Gwa uvii sese gufenja umanya mantu ayaa ryana rayo ntuni.” 21Itungwee antu voong'e va ung'ë a Atemi nanë aghenyi nëvëgikhaa kuuko vëuyaghaya matungo ao oong'e ndende gwa sang'ida na utegheeya nkhani ya mantu në mafya.

Matanantyo amwa Faulo

22Uvii Faulo agaëmëka mukhatëkhatë a barasa ra Areofago, agahanya, “Nyee antu va Atemi, nene namwoona mwino chu nyenye gwa njëa yoong'e mwë antu va dini ino. 23Gusoko mwino nëaja nëkëëre uko na uko, u muji wanyu, na nëgaona sanamu yanyu ya ikuryo, nëgaona noo masabahu ëmwë nëandëkie, ‘Kunë Muungu nëatimanyëkie.’ Gwa uvii wasuu në nyenye mumukuryaa na kunu mutimumanyie uyuu nene ngumutanantya kunë nyenye. 24Muungu unë mutundi wa urëmi nanë mantu oong'e në ërëfo mung'ë ayo, në Müküü wa irunde nanë ng'ë. Mweeso atigikhaa u mahekalu nëëjengiwe na mëkhono a antu, 25mbesa atiutumëkëwa na mëkhono a antu mwë munyaufenja afewe gëntu. Gusoko mweeso mughonjo në uguvafaa antu ufanga nanë nguu ya uchea na mugëntu. 26Na mweeso watundie ndughu yoong'e ya antu ufuma u muntu umwedu muu ndughu ya antu yikhae mu usyu wa ng'ë, na agavaghania matungo nanë mëmbë ya mikhao.

27“Uvii veeso vëufenjiwa vëmufenje Muungu, gwa uhuvëi mwino veeso vadahe umufafatia mweeso, na umuhanga mweeso. Kë mweeso atikurengi ufuma u mu muntu mukhatë itu, 28gusoko,

‘Mukhatë akwe sese guduvaa na uenenda

na gukweti ufanga witu,’

mwino mbesa aëmbi vanyu vëgëtunga vadahie uhanya,

‘Gusoko tutë sese soong'e gwë ufafo wakwe.’

29“Uvii utendëka gwë vana va Muungu, sese itinoneye ughema mwino, Uungu wikhwetë na sahabu, nampa hela, na mbesa igwe intu nërëtianiwe gwa uremu na mahaa a antu. 30Matungo a ufutu Muungu agatenda mwino atikengee, ëgweeso itungwee mweeso uguraghëëya antu voong'e matumbë oong'e vafee. 31Gusoko mweeso waëkie itiku në ujie uramwua urëmi gwa tutë gwa njëa a muntu në mweeso wamuhwaniye, na kunë uyuu waaraghëëre antu voong'e gwa umufëtya mweeso ufuma gwa akuyi.”

32Naarë veeso vategheeya ufëtyo wa ukuyi, vangëja vëgamuheka iheko ra horo. Ëgweeso vangëja vëgahanya, “Sese gwinjë ugutegheeya veve kangë u sayu ëyëi.” 33Uvii Faulo agafuma unji mukhatë ao. 34Ëgweeso antu vëgëtunga vëgakhuvëa na mweeso na vëgamuhua, mukhatë ao arë Dinisio wa Areofago nanë mukhema umwedu rina rakwe Damarisi nanë vangëja itambëëmwe inao.

Currently Selected:

Nte 17: RNT

Highlight

Copy