2 Akorinto 11
11
Faulo na Atumami va Weegheghe
1Nene ngufenja nyenye arë mudahe ughëëmëya itambëëmwe nanee mung'ë a ufutu në unyughu. Ghëmëëyë itambëëmwe na nee. 2Nene nitegheeye wiru wa gëmungu gusoko anyu. Nene ngumwona nyenye mwino muncha nëkëë inatang'ana gëmwëëre na mughosya. Na nene nadahie ufanga gusoko anyu maraghoe na muntu umwedu unë Kiristo. 3Ëgweeso nene nina choghofi mwino, njokha ëgamukhonga Eva gwa wegheeghe wakwe, uvii muntu umwedu winjë umukhonga nyenye mureke uyanjo wa tutë nanë ukhomie gusoko amwa Kiristo. 4Gusoko nësa muntu umwedu ugujaa na umutanantëya nyenye Yesu ëngëja ti uyoo në sese gwamutanantëye nyee, mba nësa nyenye mwaghenyifie nkhoo në hiya ufuma ëyoo në nyenye mwamëghenyifie mba nyenye mwaghenyifie Sayu Njija në ëhiya na ëyoo në nyenye mwamëghenyifie, nyenye mughimëëya gwa uyanjo. 5Nene ngughema antu vasaa në nyenye muvatana “atumami në akuu” tutë ti aküü nanguu ukëra nene mba nduvë. 6Mbesa nene nti muremu wa urighëëtya, nene ntina umanyi, gwa njëa yong'e sese gwadahie uraghëëra daaji kunë nyenye mantu oong'e.
7Nene ntina mutëënda nyenye mumpe nee gënyamwëmo gusoko a Sayu Njija a Muungu në nene namëtanantiye kunë nyenye. Nene ninyumpiye mughonjo gusoko umutënda nyenye muhumbuke. Ërëë naa ihutye kunë nenena? 8Nene nafumpie makanisa angëja gwa ughenyifa waarëyi, gusoko nene nëmwitumëkëe nyenye. 9Na itungo nënaa nene nëitambëëmwe na nyenye nene naa nina mantu nënangufenja. Nene ntinamunempea muntu woong'e, gusoko na aruna ane unë navajie ufuma uMakedonia veeso vampee nee mantu nangufenja. Uvii nene nineghie na ninjë ginegha ntamunempee nyenye gwa njëa oong'e. 10Mwino tutë amwa Kiristo nëëmukhatë ane, gutië muntu mba umwe mu mukoa woong'e wa Akaya në winjë umuntya ukumwui wane. 11Na soko kë? Gusoko nene ntimuyanjëtë nyenyena? Muungu umanyie nene nëmuyanjëtë nyee.
12Na rasëë në nene ngutënda ninjë ufwagheera urëtënda. Nene ngufenja uvafënga antu avoo nevëufenja soko a gitënda. Veeso vëgitendaa, mwino mwëmo në veeso vëuwutendaa wikhwetë na mwëmo në sese guwutëndaa. 13Gusoko antu avaa ti atumami mba nduvë, mbesa veeso vegitenda uwuu. Veeso nëatendi mwëmo në afutu. Veeso vëufenja gitënda aghonjo vëdwëëre mwino atumami vamwa Kiristo. 14Na ti utako, gusoko mbesa Setani ugitënda mughonjo adwëëre mwino malaëka wa weru. 15Uvii ti intu në ighenyi nëmbesa atumami vakwe noo vighee aghonjo vëdwëëre mwino atumami va tutë. Mpeo awe inje gining'ana na ntëndo yawe.
Makhasiko amwa Faulo mwino Mutumami
16Nene ngurighëëtya kangë, muntu woong'ë nëang'eme nene nëmufutu. Ëgweeso mbesa nyenye munyona nene në mufutü, ng'enyifi nene mwino në mufutü, gusoko nene noo nëdahe gikumwua nduvëngë. 17(Rasëë në nene nguhanya, ti gwa udaho wa Müküü ëgweeso mwino në mufutu. Gwa njëa ëyëë nene ngijaghumbua nanguu. 18Gusoko vingë va avoo në nyee muvaëtana “atumami në aküü” vëgitëndea mantu a mu urëmi. Nee noo ninjë gitënda.) 19Mbesa nyenye aghonjo mwihaa, kë nyenye gwa uyanjo muvaghëmëëya afutu. 20Gusoko nyenye mughimëëya mbesa muntu ugumutënda nyenye mwë atughwa vakwe. Nyenye mudaha ughimëëya mbesa muntu ugumhëmba nyenye mba uguhoa mantu në maja ufuma kunë nyenye, mba givëka gunto anyu, mba umukhuva nyenyu mu usyu. 21Nene nguhanya gwa mënyaa anyu. Nene inoneye uhanya, sese noo naa gwëalegheku gusoko asëë. Ëgweeso gwa roong'e në muntu woong'e ugudaha gitëndea nene noo ngitëndea rasëë. Nene ngurighëëtya vii mwino në mufutü. 22Gwa uhonga na ndughu, veeso vëuhanyaa veeso në Vaebrania? Uvii në nene. Gwa uhonga na dini, veeso vëuhanyaa veeso në va Isiraelina? Uvii në nene. Gwa uhonga na mwango, veeso vëuhanyaa veeso në ufafo wamwa Iburahimuna? Uvii në nene. 23Veeso në atumami vamwa Kiristona? Nene në mutumami muja nanguu wamwa Kiristo. Itungwee nene tutë ngurighëëtya mwino në mufutü. Nene natëndie mwëmo gwa nguu nanguu, ukëra veeso. Nene nutëërwe ujera mëhenjo mingë ukëra veeso. Nene nakhuviwe makhuvi në ëtina isabu, ukëra veeso. Na mëhënjo mingë nafonie nkuya, ukëra veeso. 24Mëhënjo ëtano hiya hiya nakhuviwe viboko na Ayahudi. Mu muhënjo vankhuvie viboko makumi atatu na kenda. 25Mëhënjo ëtatu Arumi vankhuvie nene na mëanga. Muhënjo rumwedu antu vëgëtunga vanturie na magwe gusoko nëkuye. Nene naa në mung'ë a meli itatu hiya hiya në yiuruvëka mwirambo. Itungo rëmwedu nene naa nëgagikhaa mumwë nanë utiku mung'ë a majë. 26Mung'ë a mëhenjo ane mingë natang'anie na holota hiya hiya: holota ya umayongo, holota ufuma gwaafumpi, holota ufuma gwa antu va ndughu ane. Holota ingëja në natang'anie nayo në ufuma gwa antu vë ndughu ingëja, holota ya u miji në mëkuu, holota ya girambo, holota ufuma gwa Akiristo va wegheghe. 27Nene nahangie uvavi gwa ukaku wa mwëmo. Mëhënjo mingë ntinaraa. Nene nareere na ntinanywaa majë, faka ntinalaa malëwa. Nene nadahie gitëgheeya mpefo gwa udëa utënda nina masaa mingë në a untendeya mututu. 28Na, gunji a mantu angëja, në ukaku wa mwëmo në nene nguwuhangaa mwitiku ufuma u makanisa oong'e. 29Itungo në muntu umwedu mulegheku, uvii nene noo ngitëgheeya në mulegheku. Itungo në muntu umwedu ugutenda ihutye, nene ngijuwa na uvavi.
30Nesa inoneye nene gitënda ninjë gitënda gwa mantu nëëguraghëëra ulegheku wane. 31Muungu nanë Tata wa Müküü witu Yesu akuriwe khae na khae, gusoko mweeso umanyie mwino nene ngurighëëtya tutë. 32uDamesiki, mutëmi nëutëmie fang'ë a mutëmi Areta agavëka aghoji mu vinyamwango vya muji gusoko unkwata nene. 33Uvii aruna ane vëgansimia fang'ë mung'ë a ikaafu ukëërëa giboyo, na nëgatëja ufuma u mëkhono a arughu vane.
Currently Selected:
2 Akorinto 11: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.
