2 Akorinto 12
12
Ndoti yamwa Faulo na Ighuya Rakwe
1Nene inoneye nikumajue. Gutie muntu nëuguhanga sao gwa nene utënda uyi. Egweeso nene ninjë ufwaghëëra urighëëtya mantu në Müküü Yesu wandaghëëre nene gënya ndoti na vimpihe në mweeso wantendie nene nëmanye munkhoo ane. 2Mëakha ikumi na ëne nëakëire Muungu agamuhumbua gunto Mukiristo ungëja në nene nëmumanyie, na agamuhora mweeso faka girunde nërëgunto nanguu. (Nene tutë ntimanyie nesa mwëëre wakwe tutë wendie girunde mba nkhoo akwe; ëgweeso tutë Muungu umanyie.) 3Na nene nëmanyie mwino Muungu agamuhora muntu uyi faka girunde në Muungu ugikhaa. (Nene ntimanyie mbesa ëyëë atëndekie gëmwëërë na mba munkhoo, Muungu umanyie.) 4Na mweeso watëgheeye mantu a utako nanguu në gutie muntu nëudahëtë urighëëtya gwa nkhani. 5Giyoma ra muntu uyi nene ninjë gitenda, ëgweeso nene mughonjo ntije gitënda, ëgweeso gusoko a ulegheku wane. 6Mbesa nene ninjë gitënda, nene ntinjë utënda në mufutü, gusoko nene aja sa ngurighëëtya tutë. Ëgweeso nene nginegha utënda uyi, gusoko muntu mba umwe mukhatë anyu adahe ughema mantu mingë nanguu në ane ukëra asaa në mweeso uguonaa mukhatë ane mba ugutëgheeya ufuma kunë nene. 7Na untenda nene nëkë gitenda nanguu gusoko a wingë wa makunukuuo, nene ngafewa mughuya mung'ë a mwëërë wane, mutumwa wamwa Setani, gwa untumwua nene, untenda nene neke gitenda nanguu. 8Nene nëgamunena Müküü [Yesu] mëhënjo ëtatu ang'eeye nene ighemwa ërëi ufuma kunë nene. 9Ëgweeso mweeso agahanya kunë nene, “Mboto ane ëkhondie gwa mantu oong'e në veve ugufenja, gusoko udaho wane në ugukhondeka mung'ë a ulegheku.” Nene gwa uyanjo në üküü ninjë gitëndea ulegheku wane, gusoko udaho wamwa Kiristo udahe gikhaa gunto ane. 10Nene nëyanjëtë itungo në nene ntina nguu, itungo në antu vëuntuka nene, itungo në nene ntikweti intu, itungo në antu vëunkhasya na itungo në nene nguvaara gusoko amwa Kiristo. Gusoko në nene nëmulegheku, nene nëkweti nguu.
Faulo Ugufenja Uvaarëëya Antu Va uKorinto
11Nene arë ngatënda mwino mufutü. Nyenye unë mwantendie nee nëtënde uyi [mwino mufutu]. Gusoko nyenye në antu unë naa mudahëtë unkumwua nene. Gusoko nene naa nti muntu wa horo mba nduvë gwa avaa në nyenye muvataana “atumami në akuu,” mbesa nene nti gëntu. 12Itungo nënaa nene nëitambëëmwe ginayu, nene naa nëmughimu na mung'ë a mwëmo wane nëgatënda makura anguu nanë ndolyo nanë mantu a utako a uraghëëra mutumami në wa tutë. 13Në gwa njëa kë në nene namutëndee nyee vivë nanguu ukëra makanisa angëja, ëgweeso nene ntinamunempea nyenye? Nyonei uvavi gusoko a utënda ihutye kunë nyenye.
14Raravi! Gwa muhënjo wa gatatu nene nighondanëye uja kunë nyenye. Na nene ntinjë utënda në murigho kunë nyenye. Nene nëjie umwarëëya nyenye; nene ntijie ufenja hela yanyu. Gusoko ang'ënya vëtinoneye uvëka mpamba gusoko a afafi vawe, ëgweeso afafi inoneye uvëka mpamba gusoko a ang'ënya vawe. 15Nene gwa uyanjo ninjë ufunya oong'e në nene nëkweti na nene në woong'e gusoko a uduvi wanyu. Nësa nene nëmunyanjëtë nanguu vii, nyenye mwinjë unyanja nene nduvëngë viina? 16Nyenye mwinjë uyanja, kangë mwino nene naa nti murigho kunë nyenye. Ëgweeso muntu umwedu winjë uhanya nene naa nëmuhughu, na namukwatiye nyenye gwa wegheghe. 17Nene tutë ntinatendaa muntu mba umwe wa va saa në nene namutumie uhora sao kunë nyenye. 18Nene ngamuromba Tito uja umusoya nyenye, na ngamutuma muuna witu ungëja në nyenye mumumanyie, Tito tutë inahoraa sao anyu. Mweeso na nene gwatëndie intu ërëëro na gwa nkhoo ëyëëyo.
19Ayanjwi nyenye mwaghemie oong'e mwino sese naa gugitetea aghonjo usonge anyuna? Në usonge a Muungu mwino sese naa gurighëëtya gwa ukhuvëi na Kiristo, na oong'e na gusoko a umwarëëya nyenye. 20Gusoko nene nëoghofetë mwino fangëja nene ngudaha uja na umuhanga nyenye ti mwino nene ngufenja, na viuyi nyenye mudaha ung'anga nene ti mwino nyenye mufenja. Fangëja ëdahëtë sa gwina wikhuvi, wiru, makuo, muntu ufenja mantu akwe mughonjo, witëti, nkhani ya ureegheghe, gëdida, na mukhombeko wa mantu. 21Nene nëoghofetë itungo në nene naja kangë Muungu në nene ngumwitumëkëa ujie untenda nene ninyumpie usonge anyu gusoko a uvavi. Në nene naja nëdahëtë uhanga uvavi gwa antu vingë mu avoo nëvatëndie mahutye songe na vinadaha ufea. Veeso vinafea uvaya, uramatwë na uramatwë wa gëbwabwa, në veeso vawutendie.
Currently Selected:
2 Akorinto 12: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.
