2 Akorinto 10
10
Faulo Ugwambëëra mwëëmo
1Nene, Faulo, mughonjo ngumunena nyenye gwa ufoo na gëhe gamwa Kiristo muntegheeye nene. Antu vëgëtunga vëunsitaaka nene, atë nene në mulegheku në nëitambëëmwe nanyee, ëgweeso në mukharë itungo në nëëkurengë na nyenye. 2Nene ngumunena nyenye itungo në nërëfo, nene ntadahe uraghëëra ukharë, mwino nene naramwue uraghëëra hiya na avoo në vëusëghaa nene ngutenda mwino antu va mu urëmi. 3Gusoko mbesa sese guduva mu urëmi sese gutiutenda fëta gwa njëa a gëuntu. 4Gusoko mataa a fëta itu ti a mu urëmi ëgweeso ina nguu ya kimungu gwa uruvanga nguu ya murughu. 5Sese guruvanga mahaa nanë gëdida goong'ë nëgëufënga umanyi wa Muungu, na guhora mu isëgho rende umukurya Kiristo. 6Sese gwighondanëye umukuurya mu muntu unë ugutënda gwa gëdida, itungo në sese gugoona mwino nyenye mwina ikuryo kunë Kiristo tutë tuutë.
7Nyenye ihengi rasëë në rëusonge a miho anyu. Nësa muntu woong'e uhuvëe mwino mweeso në wamwa Kiristo, mweeso nëakumbukwe mughonjo mwino mweeso në wamwa Kiristo, uvii sese noo gwë wamwa Kiristo. 8Mbesa nene naa ngijaghumbua nanguu nëëghokee udaho uroo në Müküü wagufee sese, nene ntigitegheeya mënyaa. Soko në mweeso në wampie nene udaho urui në ti umuruvanga nyenye ëgweeso gusoko na nyenye mudahe ukhoma. 9Nene ntiufenja uraghëëra genya mwino nene ngufenja umwoghofya nyenye gwa keeti yane. 10Muntu umwedu wahanyiye, “Keeti yakwe në ndito na yina nguu, ëgweeso mweeso në urëfo gëmwërë në mulegheku, na nkhani yakwe itina ryana.” 11Nene ngufenja muntu mwino wasuu amanye mwino rasëë në sese gugwandëka mung'ë a keeti yitu itungo në gwëkureng'ë na nyenye, sese gutenda uwuu nanë gwitambëëmwe na nyee. 12Ti mwino sese gudaha givëka gikaafu rëmwedu na gikhwanëya sese aghonjo na antu vëgëtunga mung'ë avoo unë vëgikumwua aghonjo. Ëgweeso itungo në veeso vëgifimaa aghonjo muntu umwe umwe, na gikhwanëya aghonjo itambëëmwe na muntu umwe umwe, veeso vëtina umanyi.
13Ëgweeso sese gutinjë gijaghumbua gwa mantu nëëgunji a mwëmo në sese gwafewe guwutënde. Sese gwinjë uvëka mëmbe mu wijaghumbui witu gwa mwëmo në Muungu wagufee sese. Na mwëmo uruu ukhuvëye mwëmo witu itambëëmwe na nyee. 14Gusoko sese aghonjo gutinjë unankëa mëmbë mung'ë a wijaghumbui witu, gënya mwino sese gwinajaa kunë nyenye. Sese na gwëvasonge uja nanë kunë nyenye itambëëmwe na Sayu Njija nëëmughokee Kiristo. 15Sese gutigijaghumbua ukëanëya, mung'ë a mwëmo nëwatëndiwe fana antu vangëja vadahie utënda. Ëgweeso uhuvëi witu në mwino uhuvëi wanyu wiongeeye. Uvii mwëëmo witu mukhatë anyu udahe ukura na ugharëmpa. 16Gusoko ësëë sese gudahe utanantya Sayu Njija u matumbë nëëkurungë anyu. Sese gutinjë gikumwua aghonjo gwa mwëmo në antu vangëja vadahie utënda mung'ë a matumbë ayoo fana Muungu waafee veeso mwëmo vëtënde. 17Mwino maandëko ëguhanya,
“Mweeso nëugikumajua, nëikumajue
soko a Müküü Kiristo.”
18Gusoko ti muntu unë ugikumwua mughonjo unë uguyanjiwaa, ëgweeso muntu unë Müküü ugumukumwua unë ukweti ukumwu wa tutë.
Currently Selected:
2 Akorinto 10: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.
