1 Akorinto 14
14
Vifewa vingëja ufuma kunë Mwahu Mweru
1Utendi uyanjo utëndeke ndolyo anyu, na nanguu hunukwi vifewa vya gënkhoo, ino nanguu nyenye mudahe uhanga udaho wa utanantya sayu a Muungu. 2Gusoko muntu unë ugurighëëtya gwa mërighëtyo në mëghenyi atiurighëëtya gwa antu ëgweeso kunë Muungu. Gusoko gutië muntu nëugumumanya mweeso, ëgweeso ugurighëtya gëmpëhe mung'ë a Mwahu Mweru. 3Gwa uvaru ungëja, mweeso unë ugurighëëtya sayu a Muungu ugurighëëtya na antu gwa uvajënga mu uhuvëi na uvakhomia nkhoo na uvafefeheya. 4Mweeso unë uguriighëëtya gwa mërighëëtyo në mëghenyi ugijenga mughonjo, ëgweeso mweeso unë ugurighëëtya sayu a Muungu ugujenga kanisa. 5Nene ngufenja nyenye nyoong'e murighëëtye gwa mërighëëtyo në mëghenyi, ëgweeso nanguu nangu muhange gëfewa ga utanantya sayu a Muungu. Mweeso unë ugurighëëtya sayu a Muungu në müküü nanguu ukëra mweeso unë ugurighëëtya gwa mërighëëtyo në mëghenyi, ëgweeso nësa urëfo muntu nëugukunukua, uvii kanisa rëdahe ujengwa.
6Itungwee, aruna ane, nësa nene nëjie kunë nyenye ngurighëëtya gwa mërighëëtyo në mëghenyi, nene nguhanga ntuni kunë nyenye, ëgweeso nene ngumwetea ukunukuo mba umanyi mba utanantya sayu a Muungu mba usëya? 7Mbesa vifee nëvitana ufanga, mwino mbiringë mba ginubë vitiuduya nduri niidwëre, gutië muntu mba umwe në winjë umanya në mwinisyo kë nëuginisiwa. 8Na nësa ifembe rëufunya ruri nëutimanyikie, uvii gutië muntu mba umwe nëugighondanëya gwa fëta. 9Viuyi viuyi në kunë nyenye. Nësa nyenye murighëëtya gwa mërighëtyo në mëghenyi në etimanyikie, uvii gutië muntu mba umwe në winjë umanya intu nërëuhanywa. Gusoko nkhani yanyu yiuhiëra u mpefo. 10Gwina mërighëëtyo mingë mu urëmi, kë oong'e a asëë ëkwetë ryana. 11Nësa nene ntiumanya murighëëtyo në muntu ugurighëëtya, nene ngutënda në mughenyi kunë munya urighëëtya na munya urighëëtya ugutënda mughenyi kunë nene. 12Uvii kunë nyenye aghonjo. Gusoko nyenye mwina nkumbu gusoko a makunukuo a Mwahu Mweru, tintaari nanguu mung'ë a urëjenga kanisa.
13Gwa uvii, mweeso unë ugurighëëtya gwa mërighëëtyo në mëghenyi ugufenjiwa arombe gusoko afewe udaho wa ukunukua. 14Gusoko nesa nene nguromba gwa mërighëëtyo në mëghenyi, nkhoo ane ëguromba ëgweeso ihaa rane rëtiuhanga intu. 15Nësa mantu ë uwuu, nene inoneye nëtënde ntuni? Nene ninjë uromba gwa nkhoo na nene ninjë uromba gwa ihaa noo. Kangë nene ninjë gwëmba gwa nkhoo na nene ninjë gwëmba gwa ihaa noo. 16Gusoko, nësa nyenye mufunya asi kunë Muungu gwa nkhoo, gutië muntu mba umwe në atikwetë gëfewa ga umanyi uhanya “Amini” gwa irumbi ranyu itungo në mweeso atimanyie nyenye muhanya ntuni. 17Gusoko nyenye mudaha uduya asi vija nanguu ëgweeso muntu ungëja atiudaha ujengwa. 18Nene ngumurumba Muungu gusoko ngurighëëtya gwa mërighëëtyo në mëghenyi nanguu ukëra nyenye nyoong'e. 19Ëgweeso mung'e a kanisa nene ngufenjaa bahu urighëëtya nkhani itano gwa umanyi wane, gusoko nëdahe uvasëya vangëja, ukëra nkhani maghana a njou ikumi gwa mërighëëtyo në mëghenyi.
20Aruna ane, mutatënde mwë ang'ënya mung'ë a magheme anyu. Nyenye inoneye mutënde mutina ihutye mwino ang'ënya, ëgweeso mwino antu unë aküü gwa ughema. 21Gwandëkie vii mung'ë a seria, “Nene ninjë utumëa antu unë vëurighëëtya mërighëëtyo në mëghëënyi gwa urighëëtya na antu vane na mbesa uvii veeso vëtinjë untegheeya nene, uguhanya Müküü.” 22Uvii mërighëëtyo në mëghenyi në gëmanyëko (ndolyo) ti gusoko avoo nëvëmuhuvëe ëgweeso gwa avoo nëvëtihuvëë. Utanantya sayu a Muungu ti gusoko a voo në ti ahuvëe ëgweeso gusoko avoo nëvëhuvëe. 23Gwa uvii, nësa Kanisa roong'e gutang'ana itambëëmwe na voong'e vëurighëëtya gwa mërighëëtyo në mëghenyi, na antu në vëtina vifewa mba antu në vëtihuvëe vingëa, veeso vëtinjë uhanya mwino nyenye mwaharina? 24Ëgweeso nesa voong'e vëurighëëtya sayu a Muungu, na muntu në ti huvëe mba muntu në atina vifewa wingëa, mweeso winjë uraghëërwa mahutye gwa oong'e nëuguyatëgheeya. Na mweeso winjë uramwuwa gwa oong'e nëuguyatëgheeya. 25Vimpihë vya nkhoo akwe vinjë ukunukuwa na uvii mweeso winjë ugwa uumbama, mweeso winjë umukurya Muungu na utanantya mwino Muungu tutë wë mukhatë anyu.
Ntende në Njija mung'ë a Kanisa
26Ntuni kangë, aruna ane? Në nyenye mutang'ana itambëëmwe muntu umwedu ukwetë wëmbo, isëyo, ukunukuo, mërighëëtyo në mëghënyi, mba muntu nëugukunukua. Nyenye inoneye mutënde mantu oong'e gusoko a uvajenga ahuvëi vamwa Kiristo. 27Nësa muntu gëkaku ugurighëëtya gwa mërighëëtyo në mëghenyi, në vëtende vavëë gutufu mba vatatu, na mu muntu gwa intu rakwe; na muntu atënde urëfo nëugukunukua rasëë nërëurighëëtiwa. 28Ëgweeso nesa gutië muntu mba umwe nëugukunukua, uvii muntu nëugurighëëtya gwa mërighëëtyo në mëghenyi akire twë mu kanisa na arighëëtye kunë mweeso na kunë Muungu. 29Në vëtëndeke anyagëdaghu vavëë mba vatatu, na antu vangëja vëhunguhëe rasëë në rëurighëëtiwa. 30Nësa ukunukuo ugudwëëywa na muntu në mwikhee mwitandee, munya urighëëtya wa mwandyo akire. 31Gusoko nyee nyoong'e mudaha urighëëtya sayu a Muungu muntu umwe umwe gusoko nyenye nyoong'e mudaha gësëya na nyoong'e muujengwa. 32Nkhoo ya anyagëdaghu yiuyikuryaa nkhoo ya anyagëdaghu. 33Gusoko Muungu ti Muungu wa yaghayagha ëgweeso wa majëghana.
Mwino mung'ë a makanisa oong'e a antu në veru
34Akhema vëufenjiwa vëkire twë mung'ë a kanisa. Gusoko veeso vëtirekerewe urighëëtya, ëgweeso vëtiudaha uhora iyoma ra utongeeri, mwino gusoma mu seria. 35Nësa gwina intu në veeso vina nkumbu umanya, nëvëvawëëye aghohi vawe u ukhaya. Gusoko në mënyaa gwa mukhema urighëëtya mung'ë a kanisa. 36Ntuni! wurë ukhani wa Muungu wajie kunë nyenye mba wafikie kunë nyenye mwiyenena? 37Nësa muntu gëkaku ugughema mwino mweeso në munyagëdaghu, mba muntu nëukwetë gëfewa ga nkhoo, mweeso inoneye amanye mwino rasëë në nene ngurëandëka kunë nyenye në iraghëëyo ra Müküü. 38Nësa muntu gëkaku atinjë umanya iraghëëyo ërëë, ukhuvëi wa Akiristo vëtinjë umumanya mweeso. 39Uvii, aruna ane, hangi nkumbü a utanantya sayu a Muungu, na mutavaghiiye ahuvëi urighëëtya gwa mërighëëtyo në mëghenyi. 40Ëgweeso mantu oong'e ëgufenjiwa ëtendeke gwa njëa nëënoneye na gwa witegheeyi.
Currently Selected:
1 Akorinto 14: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.