1 Akorinto 15
15
Ufëtyo wamwa Kiristo
1Itungwee nene ngufenja umukumbukëya nyenye, aruna ane, Sayu Njija në nene namëtanantiye kunë nyenye, unë nyenye mwamëghenyifie, gusoko ësëë uhuvëi wanyu wimëkie. 2Gwa ësëë nyenye mutyowa nesa mwinjë ukwatëëra gii rasëë në nyenye mwarëfewe. Ëgweeso nyenye mwahuvëe intu gutië.
3Nene namëghenyifie sayu a udaho në uküü nanguu na nene namëkërëye sayu ësëë kunë nyenye. Në mwino Kiristo wakuree gusoko a mahutye itu gwa uhonga maandëko. 4Na veeso vëgamuvëka, Muungu wa mufëtya ufuma gwakuyi itiku ra gatatu mwino gwa uhonga na maandëko. 5Na mwino mweeso agamudwëëra Kefa, kangë avoo në viikumi na umwe. 6Kangë mweeso wendie uvadwëëra antu vingë nanguu ukëra anyandughu maghana atano gwa itungo rëmwedu. Në vingë mukhatë a vasaa kë afanga, mbesa vangënja vakuree. 7Kangë mweeso wendie gëdwëëya kunë Yakobo, kangë gwa atumami voong'e. 8Gwa itungo ra mpeo, mwino gwa muntu nëwafafiwe ti gwa itungo, mweeso wendie gëdwëëya kunë nene noo. 9Gusoko nene në munyughuu mwa atumami, ntinoneye utaanwa mutumami, gusoko nene nendie urëkhasya Kanisa ra Muungu. 10Ëgweeso mwino nene nërë reo, nene nëuwu gusoko a mboto a Muungu, na mboto ya Muungu kunë nene yinatëndeka ya usoo. Hiyo na asaa, nene nitumie mwëëmo gwa nguu ukera veeso voong'e, mbesa na ti nene, ëgweeso mboto a Muungu naarë itambëëmwe na nene. 11Mbesa uvii arë nene mba veeso, uvii sese gwatanantiye na uvii nyenye mwahuvëe.
Ufëtyo Witu
12Itungwee nësa Kiristo ugutanantiwa mwino Muungu wamufëtëye ufuma gwakuyi, wure antu vangëja mukhatë anyu vëuhanyaa mwino gutie ufëtyo wa akuyi? 13Ëgweeso nësa gutië ufëtyo wa akuyi, uvii Muungu inadaha umufëtya Kiristo ufuma gwakuyi. 14Na nësa Kiristo inadaha ufëtëwa ufuma gwakuyi, uvii itanantya ritu në ndeende nanë uhuvëi wanyu në ndeende. 15Sese gwendie udwëëra mwino gwevegheghe usonge a Muungu, gusoko sese gwasudangëe mwino Muungu mweeso wamufëtëye Kiristo ufuma gwakuyi. Ëgweeso nesa në tutë mwino akuyi vëtiufëtëwa, uvii Muungu inamufëtëa Yesu. 16Gusoko nesa akuyi vëtiufëtëwa, uvii Muungu inamufëtëa Kiristo. 17Nësa Muungu inamufëtëa Kiristo, uhuvëi wanyu kunë Kiristo në ndeende, na mahutye anyu kë inarekewa. 18Uvii avoo noo unë varee mung'ë amwa Kiristo vendie gwa arungu va makhaa. 19Nësa gusoko a ufanga uruu sese gwina ighonje mung'ë amwa Kiristo, sese igunoneye gonewa uvavi ukëra muntu woong'e mu urëmi.
20Ëgweeso tutë në chëëyë Muungu wamufëtëye Kiristo ufuma gwakuyi, nkhari ya mwandyo avoo nëvaree tuo. 21Gusoko mwino gwa muntu umwedu ikuya rajie, viuyi antu gwa muntu umwedu ufëtyo wa akuyi wajie noo. 22Gusoko mwino antu voong'e unë vë mung'ë amwa Adamu vëukuya, viuyi noo antu voong'e unë vë mung'ë amwa Kiristo vinjë gwetëwa ufanga. 23Ëgweeso Muungu winjë umufëtëa mu muntu gwa ntende akwe, Kiristo winjë utënda wa songe gwa voong'e. Uvii itungo nëikwe mweeso wasuka veeso vëjie utënda vamwa Kiristo. 24Uvii mpeo a urëmi ëjie; Kiristo winjë uhuma nkhoo yoong'e nëyitemie, wibali woong'e, na nguu yoong'e, na winjë umufa Muungu Tata utëmi. 25Gusoko Kiristo inoneye atëme faka fana Muungu uguvahuma arughu voong'e na uvavëka fang'ë a mëghuu akwe. 26Na murughu wa mpeo nëujie guuraghwa në ikuya. 27“Gusoko Muungu wadahie uvëka mantu oong'e fang'ë a mëghuu akwe.” Ëgweeso fana guhanya, “Mantu oong'e ahumiwe na ëvëkiwe fang'ë a mweeso,” në daaji, mwino nkhani yiërë, mantu oong'e ëtimwingëye Muungu mukhatë unë uguvëkaa mantu oong'e fang'ë amwa Kiristo. 28Itungo në Muungu wadahie uvëka mantu oong'e fang'ë a Mwana, mweeso winjë noo umuvëka Mwana kunë mweeso mughonjo. Uvii Muungu winjë uvëka mantu oong'e fang'ë a Mwana, uvii Muungu adahe utënda wë mu gëntu gwa mu muntu.
29Ëgweeso gwina ryana kë gwa antu ubadiswa gusoko a antu nëvakure? Nesa akuyi vëtiufëtëwa mbanduvë, gusoko kë antu vëubadiswa gusoko awe (avoo nevakure). 30Nësa gutëe ufëtëo, gusoko kë në sese gwë mu makasëko mu itungo? 31Nene ngutanantya gwa nguu, aruna ane, gwa gëkumwua mukhatë anyu unë nene nëkwetë mukhatë a Müküü, nene ngukuyaa mu itiku! 32Nene nguhanga ntuni nësa, urighëëtya gëuntu nene nihomie itambëëmwe na maimwana a gihaka ra Efeso? Nesa akuyi vëtiufëtëa, “Reki sese gule na unywa, gusoko fadiu gukuya.” 33Antu vëtamukhongee nyenye; “Ukhuvëi na antu në uvë uguruvangaa uduvi në uja.” 34Vëki ihaa ranyu mwino ëufenjiwa, na mutatëndee mahutye kangë. Gusoko vangëja mukhatë anyu vëtina umanyi wa uja wa Muungu. Nene nguhanya wuu gwa mënyaa anyu.
Ufëtëo wa Mwëëre
35Ëgweeso muntu umwedu winjë uwëya, “Muungu ugufëtëa wurë akuyi? Vëutënda vina mwëërë wë wurë?” 36Veve muntu nëumufutu! Mbeyu në veve ugumëfandëa ëtiutëndaa mpanga faka ëkuye tanju. 37Na mbeyu në veve ugumëfandëa ti mwëërë nëukhomie wa muti. Ëgweeso në mbeyu gutufu, fangëja mbeyu a ngano mba mbeyu ëngëja a gëviyo. 38Ëgweeso Muungu ugumëfaa mbeyu ësëë mwëërë mwino mweeso wadahie uhwania, na mu ikhakho ra mbeyu mwëërë wayo. 39Gusoko mwëërë wa mantu në mafanga utiikhwetë gwa ikhakho ra mwëërë. Ëgweeso gwina ikhakho ra mwëërë gusoko a antu, na ikhakho rëngëja gwa maimwana, ikhakho rëngëja gusoko a nyonyi, na ikhakho rëngëja gusoko a somba. 40Gwina mëërë në a gunto na gwina mëërë në a fang'ë. Ëgweeso uja wa mëërë a gunto ë hiya, na uja wa mëërë a fang'ë ëhiya. 41Gwina uja wa yuva, na uja ungëja wa mweri, na uja ungëja wa njota; gusoko njota i hiya hiya ufuma njota na njota gwa uja.
42Në viuyi mwino Muungu ugufëtëa akuyi. Mwëërë wasuu nëuguvëkwa fang'ë ugukuya, mwëërë wasuu nëugufëtëwa utiukuya. 43Itungo në mwëërë uguvëkwa në usuu nëutina ikuryo, winjë ufëtëwa mwëërë në wa uja. Itungo në mwëërë uguvëkwa në usuu nëulegheku, winjë utendeka uja na wina nguu. 44Nëuguvëkwa në mwëërë wa irongo; nëugufëtëwa në mwëërë wa gënkhoo. Nesa gwina mwëërë wa irongo, urëfo noo mwëërë wa gënkhoo. 45Uvii mwino ëandëkiwe, “Muntu wa mwandyo Adamu agatëndeka wina ufanga wa gëmwëërë.” Adamu wa gavëë,#15:45 Adamu wa gavëë: Kiristo. agatënda wina ufanga wa gënkhoo. 46Ëgweeso ti mwëërë wa gënkhoo në wa songe ëgweeso wa irongo, na uvii wa gënkhoo. 47Muungu wamutundie muntu wa mwandyo wa irongo ufuma fang'ë; na muntu wagavëë ufuma girunde. 48Mwino naa muntu wa irongo, viuyi në avoo unë vëfumie u muntu wa irongo vikhwetë na muntu wa irongo. Na mwino në muntu wa girunde, viuyi në avoo unë va muntu wa girunde vikhwetë na muntu wa girunde. 49Itungwee mwino sese gwikhwetë na muntu nëwatundiwe ufuma fang'ë, sese gujie noo gikhwa na muntu unë wajie ufuma girunde. 50Nene ngumukhanëa nyenye aruna ane, mwëërë na saghami vitiudaha uwusaa utëmi wa Muungu, mba mwëërë wa ikuya usaa mwëërë nëutikuya.
51Rarava! Nene ngumukhanëa nyenye gëmpëhë. Sese soong'e gutinjë ukuya, ëgweeso sese soong'e gwinjë ukhanëkëywa, 52gwa itungo ikufi, ututya na urangua, itungo në antu vinjë utëgheeya ruri wa ifembe ra mpeo. Gusoko itungo në ifembe rinjë uduya ruri, akuyi vinjë ufëtëwa gwa ufanga wa khae na khae. Ëgweeso sese në kë gwa afanga (gwinjë) ughenyifa mwëëre në ufya. 53Gusoko ntundo ëyëë në itu unë injë ughora ënoneye ëkhanëkëywe mung'ë a ntundo ëyoo në inje uduva khae na khae, na ëyëë në a ikuya ënoneye ëkhanëkëywe ëyoo nëëti ukuya. 54Itungo në mwëërë wa ughora winjë urya mwëërë nëutiughoraa, nanë wa ikuya winjë uryaa nëutiukuyaa, uvii inje udwëëra mwino ëandëkiwe:
“Ikuya ramiriwe gwa uhumi.”
55“Veve ikuya wëfe uhumi wako?
Veve ikuya, wëfe uvavi wako?”
56Uvavi wa ikuya në mahutye, na udaho wa mahutye në seria. 57Ëgweeso sese gumurumba Muungu, unë wagufee sese uhumi ukëërëa Müküü witu Yesu Kiristo.
58Gwa uvii, aruna ane ayanjwi, imëki sësë, mutahingëhëke, fwaghëëri ino utënda mwëmo wa Müküü matiku oong'e, saa mumanyie mwino mung'ë a Müküü mwëëmo wanyu utiutendeka wa ndende.
Currently Selected:
1 Akorinto 15: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.