1 Akorinto 11

1Hongi wikhori wane, mwino nene nëhongie wikhori wamwa Kiristo.

Ukumba Itwe mung'ë a Ikuryo

2Nene ngumurumba nyenye gusoko nyenye munkumbukiwe nee mung'ë a mu gëntu. Na nyenye muhongie ntende në nene nayihangie ufuma gwa antu vangëja na nene nadahie umufa nyenye. 3Ëgweeso nene ngufenja nyenye mumanye mwino itwe (udaho) ra mughosya në Kiristo, na itwe ra mu mukhema në mughosya, na itwe (udaho) ramwa Kiristo në Muungu. 4Mughosya woong'e unë uguromba mba ugutanantya sayu a Muungu kunu itwe rakwe rëkumbiwe ugumuhorya Kiristo unë itwe. 5Mukhema woong'e unë uguromba mbesa ugutanantya sayu a Muungu kunu itwe rakwe rëtikumbie ugumuvirya mënyaa mughosya wakwe. Në mwino itwe rakwe nësa aja rëjurwe. 6Nësa mukhema atinjë gikumba sela#11:6 Sela: Isaa në musyeda ugikumba itiku ra lughu. uvii imunoneye mweeso ujura ntuka. Ëgweeso nësanëmënyaa gwa mukhema ujura ntuka, bahu mweeso arie sela.* 7Gusoko mughosya atinoneye akumbe itwe, gusoko mweeso në nyinkhori a üküü wa Muungu. Ëgweeso mukhema në üküü wa mughosya. 8(Gusoko Muungu ina mutundaa mughosya ufuma kunë mukhema, ëgweeso wamutundie mukhema ufuma kunë mughosya. 9Mbesa Muungu ina mutundaa mughosya gusoko a mukhema, ëgweeso Muungu wamutundie mukhema gusoko a mughosya.) 10Gusoko ëyëë mukhema inoneye arye gëtambaa gitwe rakwe gëmanyëko (ndolyo) mwino mweeso wafiwe udaho wa uromba na utanantya sayu a Muungu, gusoko va malaëka vëdahe umanya mwino mweeso wina udaho. 11(Kë mung'ë a ukhuvëi wa Müküü mukhema atiudaha uduva gunji a mughosya mba mughosya gunji a mukhema. 12Gusoko mwino mukhema watendiwe ufuma u mughosya, uvii mu mughosya wafafiwe na mukhema. Na mantu oong'e ëfumie kunë Muungu.) 13Nyenye ramwui aghonjo; inoneye gwa mukhema uromba Muungu kunu gutie intu nërëkumbie itwe rakwena?. 14Gusoko ntundo ëumusëya nyenye mwino gwa mughosya utuga ntunka në ndifu në mënyaa kunë mweeso. 15Ëgweeso nësa mukhema wina ntuka ndifu, në intu ra gitëndea kunë mweeso. Gusoko Muungu wamufee mweeso ntuka gusoko a ukunëkëa itwe rakwe. 16Ëgweeso nësa muntu woong'e ugufenja gëkunguma gwa ërëë, oong'e në nene nguhanya, sese gutimanyie ntende ëngëja, mba kanisa a Muungu.

Ilëwa ra Müküü

17Ëgweeso mung'ë a maraghëëyo nëëhongie nene ntiufenja umukuta nyenye, itungo në nyenye mutang'ana itambëëmwe mung'ë a ikuryo mutiutang'ana utënda në maja ëgweeso gwa utënda në mavë. 18Intu ra mwandyo, itungo në nyenye mutang'ana itambëëmwe mwino kanisa, nene ntegheeye mwino nyenye mutemamukie mukhatë anyu nyenye gwa nyenye. Nene nguhuvëa mwino gwina tutë nyughuu mu ërëë. 19Gusoko inoneye gwina mutëmanuko mukhatë anyu gusoko vasaa unë vë ihaa mukhatë anyu vëdahe umanyëka. 20Itungo në nyenye mutang'ana itambëëmwe, ti ilëwa ra Müküü në nyenye mulaa. 21Gusoko në mula, mu muntu wikhakhatie ula malëwa akwe. Na uyuu wë njaa na ungëja ugheete. 22Ntuni! Nyenye mutina nyumba fana mudaha ula malëwa na unywa muvinyona? Mba nyenye muhorya kanisa ra Muungu na uvirya mënyaa avoo nëvëtikwetë intu? Nene nguhanya ntuni kunë nyenye? Nene nëmukutë nyenye gwa ërëëna? Ti uwu! Nene ntiutënda uwuu.

23Gusoko nene naghenyifie ufuma kunë Müküü rasëë në nene noo namufee nyee, mwino Müküü Yesu utiku wasuu nënaa mweeso wadwëëywa agahora mukhatë, 24na nënaa mweeso wadaha ufunya asi kunë Muungu, mweeso agauvegha mukaatë na agahanya, “Uruu unë mwëërë wane në wadweiywe gusoko anyu. Tendi vii sa kunu nyee munkumbukiwe nene.” 25Viuyi viuyi noo agahora gakuu, nënaa vadaha ula, uguhanya, “Gakuu akaa në iraghano në ifya mung'ë a saghami ane. Matungo oong'e në nyenye munywa muvinyo ufuma mu gakuu akaa, inoneye nyenye mutënde vii gwa unkumbukwa nene.” 26Gusoko faka fana Müküü ujie kangë, mu itungo në nyenye mula mukatë uruu na munywa muvinyo ufuma gakuu akaa nyenye mutanantya ikuya rakwe.

27Gwa uvii, muntu woong'e, nëugula mukaatë mba unywa muvinyo mu gakuu ga Müküü gwa njëa nëëtinoneye winjë utënda ihutye ra uwukhomba mwëërë na saghami a Müküü. 28Muntu nëagifime mughonjo, na uvii ale mukaatë na unywa muvinyo mu gakuu. 29Gusoko nesa veve utimanyie ryana ra mwëërë wa Müküü itungo nëugula mukaatë na unywa muvinyo ufuma mu gakuu, Muungu winjë uguruvanga mwino ugula na unywa. 30Ëyëë në soko antu vingë mukaatë anyu vëroe na vëugiëka, na antu vëgëtunga vëree (vëkure). 31Nësa gugifiima sese aghonjo, Kiristo atinjë uguramwua sese. 32Ëgweeso itungo në Müküü uguguramwua na ugugughora sese, gusoko mpeo Muungu atinjë uguruvanga sese itambëëmwe na urëmi.

33Uvii kangë, aruna ane itungo në mutang'ana itambëëmwe gwa ilëwa ra Müküü, giindëi nyenye nyoong'e. 34Nësa muntu woong'e wë njaa inoneye ale intu ukhaya tanju; mutaje utang'ana itambëëmwe gwa uramwuwa. Gwa mantu angëja nene nëjieumufa maraghëëyo itungo në nene naja.

Currently Selected:

1 Akorinto 11: RNT

Highlight

Copy