1 Akorinto 12
12
Vifewa ufuma kunë Mwahu Mweru
1Itungwee gwa uhonga vifewa nëviujaa ufuma kunë Mwahu Mweru, arunaane, nene ntiufenja nyenye mwekeumanya. 2Nyenye mumanyie mwino itungo në nyenye na kë mwa antu nëvëtiumukuryaa Muungu, nyenye mwendie uyaghaywa gwa ukurya arungu në vëtina ufanga. Gwa njëa imwedu mba ëngëja nyenye mwadahie uheywa kuuko. 3Gwa uvii nene ngufenja nyenye mumanye mwino gutie muntu mba umwedu nëugurighëëtya gwa Mwahu Mweru uguhanya “Yesu në ajumwe!” na gutie muntu mba umwedu nëugudaha uhanya “Yesu në Müküü” ëgweeso gwa Mwahu Mweru.
4Gwina makhakho hiya hiya a vifewa vya unkho, ëgweeso Mwahu Mweru në uyuuyo. 5Gwina njëa hiya hiya ya utumami, ëgweeso Müküü në uyuuyo. 6Gwina makako hiya hiya a utenda mwëmo, ëgweeso Muungu në uyuuyo në ugufunya meeso oong'e gwa mu muntu. 7Muungu ugumufaa mu muntu ukunukuo wa Mwahu Mweru udahe utumëka gwa gyarëëya. 8Mwahu Mweru ugumufaa muntu umwedu udaho wa urighëëtya sayu në ijue ihaa në ikuu, na Mwahu uyuyo ugumufaa muntu ungëja udaho wa urighëëtya sayu në ijue umanyi. 9Mwahu Mweru ugumufaa muntu ungëja udaho wa umuhuvëa Kiristo gwa nguu, na Mwahu uyuyo ugumufaa muntu ungëja udaho wa uforya. 10Mwahu Mweru ugumufaa muntu ungëja ntendo ya makura, gwa muntu ungëja ugumufa urighëëtya sayu a Muungu. Mwahu Mweru uyuyo ugumufaa muntu ungëja udaho wa urekanua mukhatë a nkhoo, gwa muntu ungëja ugumufa makhakho hiya hiya a mërighëëtyo në mëghenyi, gwa muntu ungëja ugumufa udaho wa ukunukua ryana ra mërighëtyo në mëghenyi. 11Ayaa oong'e ëgutëndewa nguu na Mwahu Mweru umwedu, na uyuuyo, unë ugufunya udaho hiya hiya gwa mu muntu umwemwe mwino mweeso ugufenjaa.
Mwëërë Rumwedu wina Nongo Nyingë
12Gusoko mwino mwëërë rumwedu ukwetë nongo nyinge, na nongo yasëë yoong'e kë mwëërë rumwedu. Mbesa chu gwina nongo nyingë mung'ë a mwëërë rumwedu, uvii Kiristo wë mwino mwëërë rumwedu në wina nongo nyingë. 13Gusoko gwa Mwahu umwedu sese soong'e gwabadisiwe mung'ë a mwërë, rumwedu (Ayahudi mba Ayunani, atughwa mba në vina uhaaragho). Na sese soong'e Muungu wagufee gënywewa ga Mwahu umwedu.
14Gusoko mwëërë utitëndiwe gwa nongo ëmwedu ëgweeso utëndiwe gwa nongo nyingë. 15Nesa mughuu ugudaha uhanya, “Gusoko nene nti mukhono, nene nti wa mwëërë.” Gwa utënda uwuu utiudaha giheya mu nongo a mwëërë. 16Na nesa ikutwë rëudaha uhanya, “Gusoko nene nti riho, nene nti wa mwëërë. Gwa utënda uwuu ritiudaha giheya mu nongo a mwëërë.” 17Nësa na mwëërë woong'e arë riho, ëse na gutie udaho wa utëgheeya. Nësaa na mwëërë woong'e wë ikutwë, naa sa gutëe udaho wa unyuncha. 18Ëgweeso mwino chu gurë, Muungu wafangie nongo mung'ë a mwëërë, mu emwedu mu yasii, mwino mweeso wahwaniye. 19Nësa nongo yoong'e arë nongo ëmwedu, gwa uvii na sa gutië mwëërë. 20Mwino chu gwë uwuu, gwina nongo nyingë, kë mwëërë në rumwedu. 21Riho rëtiudaha uhanya kunë mukhono, “Nene ntiugufenja veve.” Mbesa kangë itwe rëtiudaha uhanya kunë mëghuu, “Nene ntiugufenja veve.” 22Hiya na asaa, nongo ya mwëërë në antu vëuyighemaa mwino itina nguu, nongo mwino yasii isëghëtwe nanguu. 23Na nongo ëyoo ya mwëërë unë sese gughemaa itina ikuryo sese guyifaa ikuryo ikuu. Na nongo yitu niitidwëëre gwa antu voong'e sese guvifaa uja uküü nanguu, 24në nongo yitu niidwëëre itina uja wasuu. Ëgweeso Muungu wa ukhuvëye mwëërë, gwa uyifa ikuryo në iküü nanguu kunë nongo iyo në ihoriywe. 25Muungu watëndie wuu gusoko nongo yoong'e ya mwëërë yeke gëkhuva nongo ëmwe na mbuya. Ëgweeso njeeso idahe gikeera nongo gwa nongo mbuya. 26Nësa nongo ëmwedu ëguvaara, nongo ëngenja yoong'e yuvaara itambëëmwe. Nesa nongo ëmwedu ëgukuriwa, nongo ëngeja yoong'e yinjë gëririsya itambëëmwe.
27Nyenye nyoong'e mwë mwëërë wamwa Kiristo, na mu muntu mukhatë anyu në nongo a mwëërë wasuu. 28Na Muungu wadahie uhwania mungë a kanisa mwandyo atumami, gavëë anyagëdaghu, gatatu aseyi, kangë avoo nëvëutëndaa makura, kangë avoo nëvëuforya, kangë avoo nëvëgwarëëya atuki. Vangëja në avoo nëvëutongeera antu, kangë avoo nëvëurighëëtya gwa mërighëtyo në mëghenyi. 29Mu muntu në mutumamina? Mu muntu në munyagëdaghuna? Mu muntu në musëyina? Voong'e vëutënda makurana? 30Voong'e vëkwetë udaho wa uforyana? Voong'e vëurëghëëtya na mërëghëtyo në mëghenyina? Voong'e vëukunukuana? 31Ëgweeso hunukwi nanguu uhanga vifewa në vikuu.
Na nene ninjë umuraghëëra nyenye vifewa nëvikëriye vyoonge gwa ukuu.
Currently Selected:
1 Akorinto 12: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.