1 Akorinto 10
10
Maonyo gusoko a Arungu va Wegheghe
1Nene ngufenja nyenye mukumbukwe, aruna ane, mwino va kükü vitu voong'e vëgaghojwa na gëfandwa ga irunde (mu mbugha në njeru) na voong'e vëganankëa irambo në Ëkhoku gwa mëghuu. 2Veeso voong'e, vëgabadiswa gwa ukhuvëa na Musa mung'ë a irunde na mung'ë a irambo. 3Na voong'e vëgala ilëwa ërëëro ërëëro ra ngënkhoo. 4Na voong'e vëganywa majë ayaayo ayaayo a genkhoo. Gusoko veeso vëganywa ufuma majë a gënkhoo, italaghwe nërëgëndekhania na veeso. Italaghwe rasëë arë Kiristo. 5Mbesa nënaa ayaa oong'e atëndeka, Muungu inayanjisiwa na va kükü vitu në vingë; gusoko asëë Muungu agavauragha veeso na umëfaghatia mëërë awe u mbugha në njeru.
6Itungwee, mantu ayaa oong'e në makeneo gusoko itu, sese gutahunukwe uvë mwino antu vasaa. 7Mbesa itigunoneye sese ukurya arungu va wegheghe mwino antu avoo vëgëtunga vëgatënda. Gusoko mwino ëandëkiwe, “Antu vëgikhaa fang'ë vëgala na unywa na kangë vëgaandya giisa.” 8Sese igunoneye gwekegighumëa muulehadi wa gëbwabwa mwino antu vëgëtunga mukhatë awe vëgatënda. Na antu maghana a njou makumi avëë na vatatu vëgakuya itiku rëmwedu. 9Sese igunoneye gweke umwingëya Müküü mu iëgheeyo, mwino antu vëgëtunga mukhatë awe vëgatënda na vëgaruvangwa na njokha. 10Mbesa sese gutanang'ane, mwino antu vëgëtunga mukhatë awe vëgatënda na malaëka wa ikuya agavaruvanga. 11Mantu ayaa oong'e adwëëre kunë va Isiraeli mwino makeneo, ëgweeso meeso aandëkie gusoko a ugukenea sese, sese në guduva mwitungo në rëfifë na mpeo. 12Mukiristo gëkaku unë ugughema mwino mweeso ukhomie në bahu nanguu ighoje ëkeugwa. 13Gutie iëghëëyo nërëumuhanga nyenye nërësya na ra antu vangëja. Muungu nëmuhuvëi, na mweeso atinje umureka nyenye mwëëghëëywe ukëra udaho wanyu. Ëgweeso itungo në iëghëëyo raja mweeso winjë gwa itungo rasëë ugufa njëa a udwëëra gunji, na uvii nyenye mudahe ughimëëya.
14Gwa uvii, Akiristo woyane rekanuki na ikuryo ra arungu va wegheghe. 15Nene ngurëghëëtya na nyenye mwino gwa antu në vina ihaa. Ramwui gusoko anyu aghonjo asaa në nene nguhaya. 16Itungo në sese gunywa (muvinyo) ufuma ugakuu akoo në sese gugatumëa mung'ë a ilëwa ra Müküü unë sese gumufunyiya Muungu asi; Në tutë sese gukhuvëa mung'ë a saghami amwa Kiristo. Na itungo në sese guvegha mukhatë na uwula, në tutë gukhuvëa mung'ë a mwëërë wamwa Kiristo. 17Gusoko gwina mukaatë rumwedu, sese soong'e, mbesa gwë vingë gutëndeka mwëërë rumwedu. Gusoko sese soong'e gukhuvëa ula mukaatë rumwedu. 18Ghemi antu va Gëyahudi, avoo unë vëula sadaka vëukhuvëa itambëëmwe mung'ë a dahwa kunë Muungu nëatëndiwe gunto a ikumbëkëo. 19Nene nina ryana tëërë: ilëwa rasëë nërëudwëëywa gwa arungu va wegheghe në intu, arungu va uregheghe në gëntuna?. 20Ti uwuu! Rasëë në nene nguhanya në mwino anyagëlungu vëufunya dahwa gunto a ikumbëkëo ra masetani, na ti kunë Muungu. Na nene ntiufenja nyenye mutënde mwë akhuvëi itambëëmwe na masetani. 21Nyenye mutiudaha unywee (muvinyo) ufuma mu gakuu nëgëutumëwa mwilëwa ra Müküü na itungo ërëëro ërëëro munywea ufuma mu gakuu akoo nëgëutumëwa mu sigunkuu ya masetani. Nyenye mutiudaha ukhuvëa malëwa u mesa a Müküü na itungo ërëëro ërëëro ula malëwa u mesa a masetani. 22Nesa nyenye mutënda vii, në gusoko nyenye mumuhumia Müküü makuwo. Sese gughema mwino sese gwina nguu nanguu umukëra Müküü na umutenda ëke ugukhuva?
23“Mantu oong'e në ruksa”#10:23 Ruksa: Uhagharo wa utënda intu. ëgweeso mantu oong'e ëtinoneye. “Mantu oong'e në ruksa,” ëgweeso mantu oong'e ëtiukhomia. 24Muntu woong'e atafenje sao akwe mughojo, ëgweeso a antu vangëja. 25Li roong'e rasëë në veeso vëurinja u sokoni. Ula nyama mwino asëë ëtinoneye gweta ifoto munkhoo ako. 26Gusoko ëandëkiwe mu Maandëko në Meru, “Fang'ë në a Müküü, nanë oong'e në ëmukhatë ayo.” 27Nësa muntu mukhatë a antu nëvëtihuvëe wamusambëa nyenye ula malëwa na nyenye mufenja utënda uwuu, endi. Li roong'e nërëuvëkwa usonge anyu mutawëye ëwëyo roong'e gwa musingi wa dhamiri. 28(Ëgweeso nesa muntu ugahanya kunë nyenye, “Ëyëë adwëëywe sadaka,” uvii gwa umughema muntu wasuu, mutalee, ti gusoko a dhamiri anyu ëgweeso gusoko a dhamiri a muntu ungëja unë wamukhanëa nyeye nëëghokoe nyama. 29Nene nina ryana a dhamiri akwe, ti anyu, uvii mutalee nyama ësëë.) Gusoko uhaghaaro wanë utinoneye ufiimwa gwa dhamiri a muntu ungëja. 30Nësa nene ngula gwa irumbi, gutëë soko a muntu unkosoa nene, gusoko a ilëwa unë nene ngufunya asi.
31Uvii mbesa nyenye mula mba munywa tëndi oong'e gwa umufa Muungu ikuryo. 32Duvi uduvo nëutigweta ifoto mbesa gwa Ayahudi mba gwa Ayunani mba gwa Kanisa ra Muungu. 33Mwino nene ngusoya uvayanjisya antu voong'e mung'ë a gëntu goonge në nene ngugëtënda. Nene ntiufenja sao ane mughonjo, ëgweeso sao a antu në vingë, gusoko veeso vedahe utyowa.
Currently Selected:
1 Akorinto 10: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.
