Jâŋ 14
14
Yěso laŋə́-ndə̂u yi pə́ lei mə́u ə́ njwô Tǎa Sê
1Yěso kə̂ ncí ndáʼ lə̂ ngaŋə-jyêʼ-no yé ngô: «Koo mənzoʼ méi kə̂ ntsoʼó! Pei pə́i no Sê, ə́ nkə́ mbə́i no zâa lə́wó. 2Məyʉʼ lənyǎŋ pə́ ndə̂ Tə́ ghâa tə nzáa, ə́ tə́i ndə̌iʼ pə́ wó po, mə́i kâa n ndâʼ ghâa wéi ńgó n ngwo wǒ wó tsuŋú méi məyʉʼ lənyǎŋ. 3Məŋ ndə̌i ngʉ́ ngwǒ tə n ntsuŋú yʉʼ zéi, mə́i n ngwo pə̌ʉ tó lǒu wéi, paghʼə lə́r, ńjí ńgó yʉʼ yi m mbə̌ wó, pei kə̌ mbə̂ zéi yʉʼ wó lə́wó. 4Ə́ ngwǒ lə̂ yʉʼ yi pei lər lə̂ wó, mə́i pei pə̌ njî laŋə́-ndə̂u zěi.» 5Tomásʉ lâʼ lə́ zʉ́ ngô: «Ə́ Nde káa paghʼ pə́ njî wághʼ yʉʼ yi o lər lə̂ wó, paghʼ wo ghʉ gháʼá poŋə́ jí laŋə́-ndə̂u?» 6Yěso lâʼ lə́ zʉ́ ngô: «Mə̂ŋ laŋə́-ndə̂u, ə́ mbə́ no lə́nə́ʉ, ə́ mbə́ ŋuu yi a ghʉ pə́ pə̂ wó. Mboʼ ŋuu wô yé ncə́r yé Tə́ tə́ lěi pə́ lə́ məŋ po. 7Pei tə̌i ngíʼi ə́ mə́ njî ghâa, mə́i pei pə̌ njî Tə́ ghâa yé lə́wó. Lə̂ mpfu wo, pei pə mə́ njî yé, pei jwó yé.»
8Fílîp zûʼ ńdáʼ lə́ Yěso ngô: «Ə́ Nde, nyárə́ wághʼ Tə́ gho wêi, ə̂ kûʼ mbó paghʼ yə́rə́.» 9Yěso lâʼ lə́ zʉ́ ngô: «Paghʼə cî mə́ ndwuŋ wo o pyêr pə́ tə jǐ ghâa Fílîp? Ŋuu yi a jwǒ ghâa jwo mə́ Tə́. Ńté hó o lâʼ ngô: “Nyárə́ wághʼ Tə́ gho?” 10Koo o pə́ mbə̂i ńgó m mbə́ ndəu Tə́, Tə́ pôu mbə́ ndəu məŋ mo? Məno mi n ndâʼ wéi lo kâa fû yé pə́ mbó məŋ. Tə́ yi a pə̌ ndəu məŋ laghʼ ghâa ńgʉ məfaʼ mé. 11Pei pə́i no yi məŋ ndaʼ wéi: m mbə́ ndəu Tə́, Tə́ pə̂ ndəu məŋ. Ə́ lə̌i mbə́ yi pei lə̌iʼ pə̂i wéi po, pei nâŋtə lə̂ məfaʼ mi n ngʉ měi, ə́ měi mbə́i. 12Məŋ ndaʼ wéi kwaʼ lə́nə́ʉ, ŋuu lə̌i mbə́i no zâa, mə́i a wo kə́ faʼ yé məfaʼ mi n faʼ měi lə́wó. Ə́ pə̌i fǎʼ mi ə́ ghúʼ tə ndêi měi, ńté ńgó m mə̌ ndər ghâa lə̂ mbəʉ Tə́. 13Pei lə̌i ndághʼ ləjôghʼ zâa ńdóu pə̂ hó, mə́i n ngwo ŋə́, ə́ njí ńgó pə́ lei lə̂ ləjôghʼ Môu, ə́ ngúʼtə́ Tə́. 14Pei lə̌i ndághʼ ləjôghʼ zâa ndóu pə̂ hó, mə́i n ngwo ŋə́ lə́ pei.»
Yěso lâʼ ńgó Sê ghʉ̌ ŋə́ Zəghʼə Nděi-lěi
15«Pei lə̌i nkoŋ ghâa, pei ŋə̂i lə̂ məntǎghʼ mâa. 16Ə́ njí ńgó n sʉʉtə́ Tə́, a ŋə̂ cǒ Nzoŋ-tû wei yi ndeʼe; ə́ yi pei pə pǎp láʼ cí pə́ wó lə̂ mənguʼ mənguʼ. 17Nzoŋ-tû wêi pə̂ Zəghʼə yi ə́ ghʉ pə́ jî ghíʼ Sê pə̌; ə́ mbə́ yi pye nzʉ̂ yo kâa kûʼ yé lə̂ mpfú yé, ńté no káa gháp pə́ njwó gháp məfaʼ, káa kə́ pə́ jî gháp yé; lə́ ə́ ngwǒ lə́ pei, mə́i pei pə̌ njî yé, ńté no a pə́ mbəʉ pei, ə́ ghʉ̌ kə́ pə̂ pə́ ndəu pei mpfu tsəm. 18N ngʉ̌ nyér ghâa wéi pei lə́ pei, pêi cʉ́ʼ mbə́ ghíʼ pəcǐ po; n ngʉ̌ pə̌ʉ tó, ə́ pə́ təcər pei. 19Mpfu pə̂ mə́ nkǔʼ ghíʼ pye nzʉ̂ pwo kə́ jwó gháp ghâa po. Lə́ ə́ ngwǒ lə́ pei, mə́i pei ghʉ̌ pə́ jwô ghâa; m mbə̂ ntəʉ, pêi kə́ mbə̂ zéi ntəʉ lə́wó. 20Ə́ ghʉ̌ pə́ leʼé wêi, pei jí ńgó m mbə́ ndəu Tə́ ghaa, pei pə̂ lə́ məŋ, m mbə̂ lə́ pei.»
21«Ŋuu yi a zûʼ məntǎghʼ mâa, ə́ mbou mə́ ŋə̂i mə́u, â ŋuu yi a kǒŋ ghâa. Ŋuu lə̌i nkóŋ ghâa, mə́i Tə́ ghâa wo koŋ yé, n nkə́ nkôŋ zâa ngaŋ, ə́ ngʉ̌ a jí ghíʼ m mbə̌.»
22Jwîdə yi káa a pə́ yé Yúda Isəkaryôtə tuŋú Yěso ngô: «Ə́ Nde, ə́ wo lěi gháʼá o nyárə́ mbəʉ zô pə̂ ndaʼ mbó paghʼ, tə lə́u ŋuu tsəm jwô yé ghô po?» 23Yěso pwôr lə́ zʉ́ ngô: «Ŋuu lə̌i nkoŋ ghâa, a ŋə̂i ghíʼ tsâr zâa pə́ ntúŋú, Tə́ ghâa pou nkóŋ yé, paghʼ zʉ́ tó ńcə́r ngaŋ, ə́ ncʉ́ʼ cî pə́ cər ntə̂ʉ zʉ́. 24Ŋuu lə̌i ndə́iʼ kǒŋ ghâa po, a ŋəi yé ghíʼ tsâr zâa pə́ ntúŋú po; ə tsâr yi pei zûʼ lêi, káa fû yé pə̂ mbó məŋ, ə́ fû pə̂ mbó Tə́ ghaa, ə́ zʉ́ yi a lə tə̂u ghâa. 25Məŋ ndaʼ wéi mwo məno, ə́ mpfu wo yi m mbyěr təcər pei lo. 26Lə́ pei wo cʉ́ʼ nzəm, Nzoŋ-tû wei yi a pə̌ Zəghʼə Nděi-lěi yi Tə́ wo lǎghʼ ləjôghʼ zâa tə́u ŋə́ lə́ pei, wo jyêʼ wéi zə̂u tsəm, ə́ pǒu ghʉ̌ pei nkʉ́ʉtə́ zə̂u tsəm yi n nkə lǎʼ wéi.»
27«Koo pei cʉ̂ʼ nzəm, mənzoʼ méi kə̂ ntsóʼó, koo pei kə̂ mbóghʼ; n ngwo cóghʼ mbwórə məntə̂ʉ pei, ə̂ pə́ mbwórə yi fû mbó məŋ; káa ə̂ pə̂ yé mbə̂u yi pye lou cər nzʉ̂ yo. 28Pei zuʼ mə́ ghíʼ n ndǎʼ wéi ngô: “N ndə̌r ə́ kə́u pə̌ʉ cə́r wéi.” Pei tə̌i mbə́ ghíʼi ə́ mə́ nkôŋ ghâa, mə́i pei ghwô pə́ lətsəi ghíʼ m mə̌ ndər lə̂ mbəʉ Tə́ ghaa; ńté ńgó Tə́ ghaa ghǔʼ nděi ghâa. 29N nzâʼ nzʉ̂ ndǎʼ wéi mêi mwo məno mpfu wo, ə́ njí ńgó měi táa ntó, pei pə̂i no zâa. 30Káa paghʼə pyér ngwó wághʼə tsâr tə ə́ záa, ńté no fou yi a sâʼ nzʉ̂ yo pə̌ ntó. Káa a ghwô yé məcó mətəʉ ndəu məŋ. 31Lə́ ə́ pə́ ntúŋú ńgó pye-mə́soŋ jí ńgó n nkôŋ Tə́ ghaa, ə́ mbou ngʉ̂ pə̂ zə̂u yi a lǎʼ ńgó məŋ ngʉ́.» Yěso lâʼ yə́rə́, ə́ ndǎʼ lə̂ ngaŋə-jyêʼ-no yé ngô: «Pei lêsê paghʼə fú yaʼa ndə́r!»
Currently Selected:
Jâŋ 14: NLA
Highlight
Share
Copy
Want to have your highlights saved across all your devices? Sign up or sign in
