Jâŋ 15
15
Yěso pə́ ghíʼ kwaʼ ləcʉŋə́ tʉ́
1Yěso kə̂ ncí ndáʼ lə̂ ngaŋə-jyêʼ-no yé ngô: «Mə̂ŋ kwaʼ tʉ̌ rəzêŋ#15.1 Ə́ laghʼ ḿbə̂ tʉ̌ yi pə́ fûŋ ńgó vînyə, ə́ mbə́ tʉ̌ yi pə́ pǐ zěi Ísə́lahêl gháʼate; ə́ pou nzə́m məntǎa, ə́ poŋ gháʼate; pə́ laghʼ ńtsúŋú məluʼ, ə́ ndə́iʼ yə́rə́ po, pə́ saŋ ńdághʼ ńgʉ̌ məzʉ̂. Zěi tʉ̌ pə́ cər ŋwaʼa Sê, ə́ mbə́ ləiʼi pye Ísə́lahêl pi Sê lə tsóʼ gháp, ə́ ncóghʼ gháp cər ngoŋ ghíʼ pə́ pyê tʉ̌ mbî sê., Tə́ ghaa pə̂ ŋuu yi a fâʼ mə́u. 2A lei tə njwó pô tʉ̌ yi kâa pə́ nzə̂m yé, ə́ nzâʼ. Ə́ ngwǒ lə́ yi ə́ pə́ nzə̂m ntǎa, a kwôghʼtə ńgó ə́ zə̂m kwaʼ shʉʼʉ. 3Məno mi n nkə jyéʼ wéi ghʉ mə́ pei cʉ̂ʼ pətə-lǒʼ. 4Pei lâr mbəʉ zei lə́ məŋ, ghíʼ n ndǎr zâa lə́ pei. Ghíʼ mboʼ pô tʉ̌ zə̂m yé tə́ ghó ə́ larə lə̂ tʉ̌ po lə̂, ə́ kə́ mbə́ ndʉŋ-ndʉŋ yə́rə́, ghíʼ mboʼ pei zə̂m wéi ntǎa tə́ ghó pei larə́ lə́ məŋ po. 5M mbə́ ghíʼ tʉ̌, pei pə̂ ghíʼ mbô tʉ̌ zêi. Ŋuu lə̌i ndár mbəʉ yé lə́ məŋ, n nkə̂ ndâr zâa lə́ zʉ́, ngaŋ ghʉ̂ məno shʉʼʉ gháʼate, ńté ńgó paghʼə lə̌i ndə́iʼ nǎa pə́ po, pei kûʼ wéi lə̂ ngʉ́ có zə̂u po. 6Ŋuu lə̌i ndə́iʼ lǎr mbəʉ yé lə́ məŋ po, a pə̂ ghíʼ ləpô tʉ̌ yi pə́ záʼ ə́ mǎʼ nzəm nkâʼ, ə́ zə̂u, pə ghʉ mbyé ḿmâʼ mǒghʼ ə́ sʉ̂. 7Pei lə̌i ndár mbəʉ zéi lə́ məŋ, tsâr zâa póu mbə́ cər ntə̂ʉ pei, pei lóu zə̂u tsəm yi pei pə̌ nkǒŋ, mə́i pə́ wo ŋə́ lə́ pei. 8Ə zə̂u yi mboʼ pei lâghʼ nyárə́ ləghûʼ Tə́ ghâa, ə́ pə́ ńgó pei ghʉ̂ məno shʉʼʉ ə́ zâa, ə́ ndaghʼ ńnyárə́ ńgó pêi ngaŋə-jyêʼ-no zâa. 9N nkoŋ wéi ghíʼ Tə́ ghâa kǒŋ ghâa zâa. Pei lâr mbəʉ zéi lə́ məŋ lə̂ mbə̂u yi n ngwo kə́ pə́ koŋ wéi koŋə́. 10Pei lə̌i ŋə́i ghíʼ məntǎghʼ mâa pə́ ntúŋú, mə́i n ngwo kə́ pə́ koŋ wéi koŋə́, ə́ ndʉŋ-ndʉŋ ghíʼ n ndə ŋə̌i lə̂ məntǎghʼ Tə́ ghâa ə́ ngʉ̌ ghíʼ ə́ pə́ ntúŋú, a kə̂ mə́ nkôŋ ghâa koŋə́.»
11N ndaʼ yo no lə́ pei, ńjí ńgó lətsei yi a pə̌ cər ntə̂ʉ məŋ kə̌ mbə̂ yé cər ntə̂ʉ pei, ə́ fú mbə́ tə có zə̂u kə̂ mbûŋ yé mə́u po. 12Yo ntǎghʼ ghâa yi n ŋə̂ lə́ pei: Pei koŋə́ mbəʉ zéi təcər pei, ə́ ndʉŋ-ndʉŋ ghíʼ n nkə kǒŋ zâa wéi lə̂. 13Kâa cǒ ŋuu ghwô yé nkoŋə tə ə́ lei yi ŋuu yi a ŋə̌ tû ye ńté pye pi a kǒŋ gháp. 14Pei lə̌i ngʉ́ zə̂u yi m mə̌ ntúŋú, pei pə̂ pəsə̌u pâa. 15Ə̂ pə́ yə́rə́, n nkə̂ fúŋ ghâa wéi ńgó ghəpə́-faʼ po, ńté ńgó káa môu-faʼ pə́ njî yé məkwaŋtə mi tə́-faʼ ye ghwǒ tû zʉ́. N ngwo cʉ́ʼ fúŋ wéi mpfu wo pə́ ńgó pəsə̌u pâa ńté ńgó n ngʉ mə́ pei jî zə̂u tsəm yi n ndə zúʼ mbó Tə́ ghâa. 16Káa pei lə̂ lə tsôʼ wéi ghâa, lə́ məŋ lə̂ lə tsóʼ wéi, ə́ ntə́u wéi ńgó pei wó fǎʼ zěi; ə faʼ yi pei wo fǎʼ wó ə̂ nzə́m məntǎa mi ə́ láʼ cí pə̂ wó. Ə̂ lêi yə́rə́, zə̂u tsəm yi pei lǎghʼ ləjôghʼ zâa ndóu mbó Tə́, â ŋə́ lə́ pei. 17Zə̂u yi m mə̌ ntúŋu wéi pə́ ńgó pei ghwô nkoŋə təcər pei.
Pye cər nzʉ̂ pə́ mbaa Yěso, ə́ mə́ mbâa pye pé
18«Pye ndəu-nzʉ̂ lə̌i mə́ mbâa wéi, pei jî ńgó gháp lə tsəmbi mbâa ghâa zâa. 19Pei tə̌i mbə́ ghíʼi ə́ mbə́ pye ndəu-nzʉ̂, mə́i ndəu-nzʉ̂ koŋ wéi gháʼate, ńté ńgó ndəu-nzʉ̂ koŋ zə̂u tsəm yi ə́ pə̂ yé. Lə́ káa pei pə̂ wéi pye ndəu-nzʉ̂. N nkə tsóʼ wéi, ə́ fǎghʼ wéi lə̂ pye ndəu-nzʉ̂. Ə̂ zə̂u yi ə́ ghʉ̌, pye ndəu-nzʉ̂ paa wéi. 20Pei kʉ́ʉtə́ no yi n ndə lǎʼ lə́ pei ngô: “Môu-faʼ kâa lêi yé tə́-faʼ ye.” Ə́ lə̌i mbə́ yi pye lə ŋə́ ghâa ngwôʼ, mə́i gháp ghʉ̌ kə́ ŋə́ wéi zéi ngwôʼ lə́wó, ə́ mbə́ yi pye lə zûʼ tsâr zâa ə́ mbǒu ńgʉ́ ghíʼ ə́ pə́ ntúŋú, mə́i gháp ghʉ̌ kə́ zûʼ zéi, ə́ ghʉ̌ ghíʼ ə́ pə́ ntúŋú lə́wó. 21Gháp ghʉ̌ ghʉ yə́rə́ lə́ pei, ńté ńgó pei pye pâa. Káa gháp pə́ njî gháp ŋuu yi a lə tə́u ghâa. 22N ndə ghíʼi ndə́iʼ tó po, ə́ ndə́iʼ lǎʼ no lə́ páp po, mə́i kâa có no tə́poŋ pə̂ yé lə́ páp. Lə̂ mpfu wo, mboʼ gháp kə̂ mbóu ndaʼ gháp ńgó gháp lə ghí ghʉ̌ məno tə́poŋ, káa pə́ jî gháp po. 23Ŋuu lə̌i mbâa ghâa, mə́i a paa gháʼá Tə́ ghâa. 24N ndə ghíʼi ndə́iʼ ghʉ̌ məfaʼ mi cǒ ŋuu laa kə́ ghʉ́ yé təcər páp po, mə́i káa ŋuu fə̂r yé gháp. Lə̂ mpfu wo, gháp kə jwô məfaʼ mêi, ə́ nkə́ mbyér mə́ mbâa wághʼ Tə́ ghaa pǎa. 25Ə́ pə̂ yə́rə́, ə́ ndaghʼ ḿbə̂utə lə̂ no yi pə́ lə ŋwáʼá cər ŋwaʼa ləpə̌ʉ ghap ngô: “Gháp kə pâa ghâa pə́ sôu.”»
26«Nzoŋ-tû wei yi n ngʉ̌ fú mbəʉ Tə́ ghâa, ə́ tə́u ŋə́ lə́ pei, â Zəghʼə yi ə́ fû mbó Sê, a lâʼ pə̂ no lə́nə́ʉ, ə́ mbə́ ŋuu yi a leʼtə pye məno mi a jǐ lə́ məŋ. 27Pei zéi lə́wó, pêi pye pi pei leʼtə məno mi pei jǐ lə́ məŋ, ńté ńgó paghʼə lə̂ kə̌ mbə́ tə fú ləjitə́.»
Currently Selected:
Jâŋ 15: NLA
Highlight
Share
Copy
Want to have your highlights saved across all your devices? Sign up or sign in
