Jâŋ 13
13
Yěso sôghʼ məku ngaŋə-jyêʼ-no yé
1Ə́ lə pə́ ghíʼ nzʉ̂ lə təi fóghʼ, ə̂ pə́ leʼé lətsei Pásʉ́ka pəyúda, Yěso pə̂ njí ńgó ye mpfu kuʼ mə́ ghíʼ a wo fú cər nzʉ̂ yo lə̌r wǒ cə́r Tə́ ye. Ghíʼ zʉ́ Yěso lə kǒŋ pye pi gháp pə̂ pé ndəu nzʉ̂ yáʼa lə̂, a lə nkə́ nkǒŋ gháp koŋə́ tə ngwó ndyəghʼtə́. 2Ə́ pə̂ mpfu-ngwʉ̂, Yěso gháp pə ngaŋə-jyêʼ-no yé nyáŋ sê mə́ nzʉ̂ zə̂u, ə́ ghi pə́ mə́i Sə́tə côghʼ mə́ kwaŋtə cər ntə̂ʉ Yúda Isəkaryôtə môu Síməu lə̂ féi Yěso ŋə́. 3Yěso pə̂ njî ńgó Tə́ ye lə ŋə̂ mətəʉ lə́ zʉ́ lə̂ ndághʼ ńgʉ̌ zə̂u tsəm, ə́ nkə́ ncí mə́ njî ńgó a lə fú pə́ mbó Sê, ə́ mbǒu mə́ mbə̂ʉ yé lə̂ mbó Sê. 4Ə́ nyáŋ tə ndêse, ə́ sǎr ndǐ fwôghʼ ye nuŋú sê, ə́ mbyé táwərə ə́ mbə́ʉtə́ lətyêr zʉ́. 5Ə́ ncóghʼ nci cər kâŋ, ə́ njǐ lə̂ ndághʼ sǒghʼ məku ngaŋə-jyêʼ-no yé, ə́ ndǎghʼ táwərə yi a yǎa mbə́ʉtə́ lətyêr zʉ́ lêi ńzághʼ. 6Ə́ ndə̌r tə nkə́u lə́ Síməu Pyêh, a lâʼ lə́ Yěso ngô: «Ńgó gho Nde, o wo sǒghʼ məku mâa?» 7Yěso pwôr lə́ zʉ́ ngô: «Ə zə̂u yi n ngʉ zěi, mboʼ o zûʼ gho mpfu wo po, lə́ o táa poŋə́ zúʼ.» 8Pyêh lâʼ lə́ zʉ́ ngô: «Lyeʼe zâa, mboʼ o sôghʼ gho məku mâa po.» A lâʼ lə́ zʉ́ ngô: «N ndə̌i ndə́iʼ sǒghʼ məku mô po, poghʼo kə̂ mbyêr wóghʼə lə̂ có no po.» 9Síməu Pyêh lâʼ lə́ zʉ́ ngô: «Ə́ lə̌i mbə́ yə́rə́, Ə Nde, koo o sôghʼ pə́ ndaʼ məku mâa, fǔ sǒghʼ mbô mâa gháp tû zâa!» 10Yěso lâʼ lə́ zʉ́ ngô: «Kâa pə́ ntúŋu yé ńgó pə kə́ ncí sôghʼ mbəʉ ŋuu yi a yaa mə́ sǒghʼ [tə ndyéʼ məku mé,] ńté no ngaŋ fu mə́ ndéi. Pei pə̌ ndéi, lə́ kâa pə́ pei pə́tsəm.» 11Yěso lə lâʼ ńgó káa pei léi pə́tsəm, ńté no a lə pə́ njî ŋuu yi a wo féi zʉ́ ŋə́.
12Yěso sôghʼ məku tə nyér, ə́ mbyé ndǐ fwôghʼ ye mâʼ, ə́ mbə̌ʉ nyáŋ sê ńtúŋú gháp ngô: «Tə pei zûʼ no yi zə̂u yi n nyǎŋ ngʉ lə́ pei lo laghʼ ńdâʼ? 13Pei fûŋ ghâa ńgó Cícye mbaa ńgó Nde, ə́ pə̂ no. N nyâa mbə́ wěi. 14Ə́ lə̌i mbə́ yi məŋ yi m mbə̌ Cícye, ə́ mbə́ Nde, n sôghʼ məku méi, mə́i ə́ pə́ ntúŋu ńgó pei zéi sôghʼ məku méi təcər pei. 15N nyarə́ wéi gháʼá tâʼ fəiʼ yi pei wo lǎghʼ ghʉ̌ ghíʼ pei nyǎŋ njwô n ngʉ̂ lə́ pei lo. 16Məŋ ndaʼ wéi kwaʼ lə́nə́ʉ ńgó môu-faʼ kâa ghûʼ yé ndêi tə́ faʼ ye, ngaŋə-ntə̂u káa a kə́ ngûʼ yé ndêi ŋuu yi a tə̌u yé. 17Ghíʼ pei pə̌ njî mpfu wo lə̂, pei lə̌i ngʉ́ yə́rə́ mə́i pêi pəndʉʉ-mboŋ. 18Kâa n ndâʼ yo no gháʼa lə́ pei pə́tsəm; m mə̌ njî pye pi n ndə tsóʼ gháp. Ə́ poŋ ńgó no yi pə́ lə ŋwaʼá cər ŋwaʼa Sê pə̂utə́. Pə́ lə ŋwáʼa ngô: “Ŋuu yi paghʼ zʉ́ kə pə́ ntəm zə̂u nzʉ́ kə shərə ə́ ncʉ̂ʼ ngaŋə-mbəu ghâa.” 19N nzâʼ nzʉ̂ ndǎʼ wéi məno mêi mpfu wo, záʼa-ndě měi poŋə́ tó; ńjí ńgó měi lə̌i ntáa ntó, pei pə̂i ngô: “Mə̂ŋ ŋuu yi m mbə́ wó.” 20Kwaʼ lə́nə́ʉ, n ndaʼ wéi ńgó ŋuu lə̌i mpfú ŋuu yi n ntə̌u yé, mə́i a pfû gháʼá ghâa. Ŋuu póu mpfú ghâa, mə́i a pfû ŋuu yi a tə̌u ghâa.»
Yěso lâʼ ńgó Yúda wo féi yé ńŋə́
(Mat 26.20-25; Mks 14.17-21; Lks 22.21-23)
21Yěso lâʼ yə́rə́, nzoʼ ye tsóʼo, a sâa-sǎa ndáʼ ngô: «N ndáʼ wéi kwaʼ lə́nə́ʉ ńgó cǒ ŋuu lə́ pei wo féi ghâa ŋə́.» 22Ngaŋə-jyêʼ-no yé zûʼ yə́rə́, wǒwó shə́rə ńnáŋ fə̌r ye, ə́ mə́ ntúŋu cər ntə̂ʉ zʉ́ ngô: «A laʼ gháʼa wǒ?» 23Cǒ tâʼ ngaŋə-jyêʼ-no yi Yěso lə koŋ no yé gháʼate nyâŋ mbəʉ zʉ́, gháp pə pǎp pə̂ nzʉ̂ məzʉ̂. 24Síməu Pyêh mə̂iʼ nyôghʼ lə́ zʉ́ ə́ ndaghʼ ńdâʼ ńgó a túŋú Yěso ńgó a laʼ wǒ ŋuu? 25A ŋúʼu lətuŋú Yěso, ə́ ntsəmtə́ ńtúŋú yé ngô: «Ə́ Nde wêi ŋuu wǒ?» 26Yěso pwôr ngô: «Â ŋuu yi n ngwo cʉ̌ŋ mbwôʼ məzʉ̂ ńŋə́ lə́ zʉ́.» Ə́ ndǎʼ yə́rə́, ə́ ncʉ̌ŋ mbwôʼ məzʉ̂ ńŋə́ lə́ Yúda Isəkaryôtə môu Síməu. 27Yúda lêi tə́ mpfú, Sə́tə kə̂u cər ntə̂ʉ zʉ́. Yěso lâʼ lə́ zʉ́ ngô: «Fátə́ ngʉ̌ zə̂u yi o lou lə̂ ngʉ́ zěi.» 28Kâa cǒ ŋuu lə́ pye pi ə́ lə pə́ yʉʼ wó zûʼ yé no yi Yěso laghʼ ndâʼ lə́ zʉ́. 29Pəcó pye kwaŋ záp pə́ ńgó Yěso lâʼ lə́ zʉ́ ńgó a wó ńzə́u máp pə pǎp məzə̂u lətsei Pásʉ́ka, káa ńgó â ŋə́ məzə̂u lə́ pəpûŋ; ńté no zʉ́ lə́ lə lóʼo môu-paa gháp pə pǎp. 30Yúda pfû mbwôʼ məzʉ̂ zei, ə́ nděi-lěi ə́ fú ndə̂ nkwár, ə́ ghi pə́, mə́i twûʼ shʉ́ŋ mə́.
Yěso ŋə̂ ləpə̌ʉ yi shwî
31Yúda lêi tə nkwâr, Yěso lâʼ ngô: «Ə́ ghí pə́ mpfu wo gháʼa, mə́i pə́ jwô ləghûʼ Môu Ŋuu; Môu ŋuu pôu ngʉ́, pə́ jwô ləghûʼ Sê. 32[Ghíʼ pə́ wo lěi lə́ Môu ŋuu ə́ jwó ləghûʼ Sê lə̂,] tû-mbəʉ Sê wo ghʉ̌ pə jwó ləghûʼ Môu ŋuu. Ə́ cʉ̂ʼ mpfu pwô, â ghʉ́ ə́ pə jwó. 33Ghəpə́ zâa, káa m mbyêr ghâa lə̂ nkə́ ncí təcər pei tə́sə́ʉ. Pei ghʉ̌ ŋáa lǒu ghâa; ghíʼ n ndə lǎʼ lə́ pəyúda ngô: “Yʉʼ yi n ndər lə̂ wó, mboʼ pei kûʼ wéi lə̂ ntó tə nkə́u wó po.” N nkə̌ ndǎʼ lə́ pei zéi lə́wó mpfu wo. 34N ngwo ŋə́ ləpə̌ʉ yi shwî lə́ pei, zěi pə̂ ngô: Pei koŋə́ mbəʉ zéi təcər pei ghíʼ məŋ zâa n nkə kǒŋ wéi lə̂. Pei koŋə́ mbəʉ zéi təcər pei. 35Pei lə̌i nkóŋə́ mbəʉ zéi təcər pei, mə́i ŋuu ntsəm wo jí ńgó pêi ngaŋə-jyêʼ-no zâa.»
Yěso laʼ ńgó Síməu Pyêh wo muŋú yé
(Mat 26.31-35; Mks 14.27-31; Lks 22.31-34)
36A lâʼ yə́rə́, Síməu Pyêh túŋu yé ngô: «Ə́ Nde o lər pə́ lə̂ ghó?» Yěso pwôr lə́ zʉ́ ngô: «Yʉʼ yi n ndər lə̂ wó, koo o kûʼ ghô lə̂ ntsə́ʉ nzəm məŋ mpfu wo, lə́ o táa poŋə́ tsə́ʉ nzəm məŋ.» 37Pyêh túŋu Yěso ngô: «Ə́ Nde ńté hó kâa n nkûʼ ghâa lə̂ tsə́ʉ nzəm gho mpfu wo? N ntə̌ʉ lə̂ ŋə́ tû zâa ńté gho.» 38Yěso pwôr lə́ zʉ́ ngô: «O laʼ ńgó o wo ŋə́ tû zô ńté ghâa? Kwaʼ lə́nə́ʉ məŋ ndaʼ gho ńgó mənkhwoʼ ghǐ tóŋ leʼé wo, mə́i o muŋú mə́ ghâa mpfu tárə́.»
Currently Selected:
Jâŋ 13: NLA
Highlight
Share
Copy
Want to have your highlights saved across all your devices? Sign up or sign in
