Jâŋ 12

Mǎyaa laghʼ lamə́ndaa ńzóʼ məku Yěso

(Mat 26.6-13; Mks 14.3-9)

1Ə́ lə pə́ mbûŋ leʼé ntoghʼó, leʼé lətsei Pásʉ́ka pəyúda kûʼ, Yěso lə̂r lə̂ Betanî ə́ lâʼ yi Lazâa yi a lə ghʉ̌ a zʉ̂ʉ lə̂ ləwʉ̂ lə̂ cî wó. 2Ə́ nkə́u wó, pə́ tsuŋu məzʉ̂ lə̂ ndághʼ mpfú yé, Máatə pə̂ ngâptə́, Lazâa pə̂ yé təcər pye pi gháp pə Yěso lə pə́ nzʉ̂ zə̂u. 3Mǎyaa nyâŋ tə nkhwór tsə̌m lítə ləmə́ndaa yi lətəi-ndwuŋ, ə́ pə́ yi pə́ lə lǎghʼ cǒ mbə̂u ləghěi yi pə́ fûŋ ńgó nârd ntsúŋú, ə́ ndaghʼ ńzóʼ məku Yěso, ə́ mbou ndághʼ mənyuŋu tû mé ńzâghʼ, jaghʼə́ lamə́ndaa zêi kôʼ ndóghʼə́ ndə̂. 4Cǒ tâʼ lə̂ ngaŋə-jyêʼ-no Yěso, yi ləjôghʼ Yúda Isəkaryôtə, ə́ mbə́ ŋuu yi a lə təi féi Yěso ŋə́, lâʼ ngô: 5«Káa pə yáa fə̌i yo ləmə́ndaa, ə́ mpfú ndənyê nkʉ tárə́ ə́ ŋə́ lə̂ pəpûŋ ńté hó?» 6Ə́ ndaʼ yə́rə́, káa lǎghʼ tsâa pə̂ məjʉ̂ŋ pəpûŋ, a lə pə́ ntsǒŋ, ə́ mbou mbə́ ŋuu yi a lə lóʼo môu-paa pəghaŋə-jyêʼ-no Yěso, pə́ pə̂ ŋə́ nkâp lə́ zʉ́, a pə̂ njû cǒ. 7Yěso cʉ̂ʼ ndâʼ ngô: «Nyér məngyě pə́ gháʼá lə́, a ghʉ gháʼa, ə́ ndaghʼ nzâʼ nzʉ̂ ńtsûŋtə leʼé yi pə́ wo cóghʼ ghâa cər ləshi. 8Pei yaa nkə́ ngwô pəpûŋ təcər pei pə̂ mpfu ntsəm; lə́ ngwǒ lə́ məŋ, mə́i paghʼə ghʉ̌ kə́ pə́ wághʼə pə̂ mpfu ntsəm po.»

Pətə́-ndə̂ pənuŋú-poʼ-Sê pə́ ndou lə̂ njwí Lazâa

9Pye Yudêi tə nzáa zûʼ ńgó Yěso pə́ Betanî, ə́ ntô záp, káa tô pə́ lə̂ njwó yé, ə́ ntô pə́ lə̂ njwó Lazâa yi Yěso lə ghʉ̌ a zʉ̂ʉ lə̂ ləwʉ̂ lə̂. 10Pətə́-ndə̂ pənuŋú-poʼ-Sê jwô yə́rə́, ə́ ntághʼ ńgó pə́ jwí Lazâa yé lə́wó. 11Ńté no pye Yudêi tə nzáa lə fú lə̂ no Lazâa, ə́ nkhʉ̌ pətə́-ndə̂ pənuŋú-poʼ-Sê, ə́ ncʉ́ʼ mə́ mbə̂i pə̂ no Yěso.

Yěso kə̌u Yelúsalêm ghíʼ fou

(Mat 21.1-11; Mks 11.1-11; Lks 19.28-40)

12Nzʉ̂ fôghʼ, nou lâʼ yi ə́ kə tó yʉʼ lətsei Pásʉ́ka zûʼ ńgó Yěso pə̌ ntô Yelúsalêm; 13ə́ ncʉ́ʼ nkhwóʼ məzâŋ lətwǒ ə́ ndaghʼ ńkwár túsoŋ lə̂ ngwó mbəutə́ yé, ə́ ŋə̌i mə́ ndâʼ lə̂ təʉ ngô: «Wuwîi#12.13 Laghʼ ńdâʼ ńgó Hosána. Ə́ mbə́ mbə̂u yi Pəyúda laghʼ ńsóghʼə fou., ə Sê pə́ lə́ ŋuu yi a tô lə̂ ləjôghʼ Nde! Ə Sê pə́ lə́ fou pə Ísə́lahêl.» 14Yěso pfû môu njəkáasʉ, ə́ nkóʼ nyáŋ mə́u; ə́ pə̂ ghíʼ pə́ lə ŋwaʼá cər ŋwaʼa Sê ngô:

15«Pye túsoŋ Siyôŋ koo pei pôghʼ,

pei jwó ghíʼ fou wei tô,

ə́ nyáŋ ndəu môu njəkáasʉ.»

16Ngaŋə-jyêʼ-no Yěso jwô yo no, káa tóghʼ jî gháp no yi ə́ laghʼ ńdáʼ, Yěso ghʉ̌ kə́u cər ləghûʼ ye, gháp poŋə́ kʉ́ʉtə́ ńgó pə́ lə záʼ mə́ nzʉ̂ ŋwaʼá no zêi ńté yé, ə́ kə́ cí kʉ́ʉtə́ ńgó ə lâʼ lə ghʉ lə́ zʉ́ gháʼá ghíʼ pə́ lə ŋwaʼá.

17Ə lâʼ lə ghí tó lə̂ mbə̂utə́ Yěso, mə́i pye pi gháp lə pə́ yʉʼ ləshi mpfu yi Yěso lə ghʉ̌ Lazâa zʉ̂ʉ lə̂ ləwʉ̂ lə ŋáa ndǎghʼ no zêi sâr yʉʼ. 18Ə̂ zə̂u yi ə́ lə ghʉ̌, ə lâʼ kwar ngwó mbəutə́ Yěso, ńté no gháp lə zúʼ ńgó a ghʉ yo nkəʼə-no. 19Pəfalísia jwô yə́rə́, ə́ ndǎʼ təcər páp ngô: «Pei jwǒ, káa pei pyér kûʼ wéi lə̂ ngʉ̂ có zə̂u. Ŋuu ntsəm cʉ̌ʼ mbə́ pə́ nzəm zʉ́!»

Pəcó pye Gərêghʼ pə́ ndou ńjwó Yěso

20Pəcó pye Gərêghʼ lə pə́ lə̂ nou pye pi gháp lə kóʼ ńgwó Yelúsalêm lə̂ ngúʼtə́ Sê mpfu lətsei. 21Gháp tô ńjwó Fílîp ŋuu Betsayída cər paghʼə-ngoŋ Galilêi, ə́ ndǎʼ lə́ zʉ́ ngô: «Ə́ Nde, paghʼ pə̌ nkoŋ lə̂ njwó Yěso.» 22Fílîp wô ńdáʼ Aŋderê, gháp zʉ́ wo ndâʼ Yěso. 23Yěso pwôr lə́ páp ngô: «Mpfu kuʼ mə́ ghíʼ Sê wo ghʉ̌ pə jwó ləghûʼ Môu ŋuu. 24N ndaʼ wéi kwaʼ lə́nə́ʉ ńgó mbəm ngəsáŋ lə̌i mpfúŋ sê ə́ ndə̌iʼ kwʉ́ po, ə pə̂ pə́ zə́ghʼə́-zʉ́; ə́ nkə́ nkwʉ́, ə sâʼ, ə́ ŋə́ məmbəm tə nzáa. 25Ŋuu lə̌i nkôŋ ləcǐ-mbî ye, mə́i a ghʉ̌ cwí wěi; ŋuu póu ngwaʼá ləcǐ-mbî ye, mə́i a ghʉ̌ ghwǒ ləcwôr tə me. 26Ŋuu lə̌i mə́ ndôu lə̂ mbə́ ngaŋə-faʼ ghâa, a tsə̂ʉ nzəm məŋ; yʉʼ yi m mbə̌ wó, ngaŋə-faʼ ghâa ghʉ̌ kə́ pə̂ yé yʉʼ wó lə́wó. Ŋuu lə̌i fáʼ mbó məŋ, mə́i Tə́ ghâa ghʉ̌ fə́tə́ yé.»

Yěso pə̌ mbwʉ̂ ləwʉ̂ yé

27Yěso kə̂ ncí ndáʼ ngô: «Lə̂ mpfu wo, nzoʼ zâa pə̌ ntsoʼó. N ngwo lǎʼ ńgó ho? N ngwo lǎʼ ńgó Tə́ ghâa, koo o pə̂i ngwôʼ yo cə̂r ghâa áa? N ndə yaa ntô cər nzʉ̂ ńté pə̂ mpfu ngwôʼ yo. 28Tǎa, ghʉ̌ pə jwó mbə̂u yi o lǎghʼ ngúʼ.» Cǒ nji fû tʉ̌-lə́pû, ə́ ndǎʼ ngô: «N ngʉ mə́ yə́rə́, n ngwo kə́ cí ghʉ̌ pə̂ shwi shwî.» 29Ə lâʼ yi ə́ lə pə́ yʉʼ wó zûʼ zêi nji, ə́ ndǎʼ ngô: «Ə̂ ləfaŋ pyêtə.» Pəcó pye lâʼ ngô: «Cwôʼ Sê lâʼ no lə́ zʉ́.» 30Yěso kə̂ ncí ndáʼ lə́ páp ngô: «Káa yo nji kwâr gháʼa ńté pə́ ghâa, ə́ kwar ńté pə́ wéi. 31Mpfu kuʼ mə́ ghíʼ Sê wo fěʼ nzʉ̂ yo. Ə́ mbə́ mpfu yi a wo fú cər nzʉ̂ yo, ə́ kwarə́ fou məno nzə̌m, ə́ mǎʼ yé pěi. 32Ə́ ngwǒ lə́ məŋ, pə́ lə̌i ngʉ́ nkóʼó ghâa tə ŋə́ tʉ́, mə́i n ngwo shǔŋ ŋuu ntsəm, ə́ ŋə́ mbəʉ məŋ.» 33Yěso lə laghʼ yo tsâr ńdêʼtə mbə̂u ləwʉ̂ yi a ghʉ̌ kwʉ́ zěi. 34Ə lâʼ pwor lə́ zʉ́ ngô: «Paghʼ lə zúʼ cər ŋwaʼa ləpə̌ʉ Mə̌usə̂i ńgó Nzaʼ-nkʉ láʼ cí pə̂ pə́ wó. Ə́ pou nděi gháʼá o lâʼ ńgó pə́ ghʉ̌ kóʼó Môu ŋuu ŋə́ tʉ́? Môu ŋuu wêi wǒ?» 35Yěso lâʼ lə́ páp ngô: «Nkeʼ kâa kə́ mbyêr yé təcər pei tə ndǐ sâghʼ. Pei ŋə̂i mpfu nkeʼ pyěr wó, ə́ mbóghʼ nzə̌m lə̂ nkwátə́ wéi. Ŋuu lə̌i mə́ ŋə̂i cər nzə̌m, a jî yé yʉʼ yi a lər lə̂ wó po. 36Nkeʼ lə̌i mbyér təcər pei, pei ŋə̂ ntə̂ʉ wéi lə̂ nkeʼ, ə́ ncʉ́ʼ ghəpə́ nkeʼ.»

Pəyúda ləʼ no Sê

Yěso lâʼ yo no tə ə́ kuʼ, a nyêr gháp, ə́ ndə̌r tə ndǐ saghʼ, ə́ ndwǒ. 37Yěso lə pə́ tə ngʉ́ mənkəʼə-məno mbi pye gháʼate, lə́ káa gháp pə̂i gháp no yé. 38Ə́ laghʼ ḿbə̂utə lə̂ no yi ntsətə-nkəʉ-Sê Esǎya lə lǎʼ ngô:

«Ə́ Nde, wǒ ŋuu lə pə̂i no yi paghʼ lə lǎʼ?

Tə Sê lə nyarə mətəʉ mé pə́ mbó pəwǒ?»

39Mboʼ gháp lə yâa mbə̂i gháp no Sê po, ńté no Esǎya lə kə́ ncí ndáʼ zə̂u yi ə́ wo ghʉ̌ lə́u gháp pə̂i gháp no yé po; a lə lâʼ ngô:

40«Ə Sê kə ghʉ gháp fwoghʼ,

ə́ mbǒu ntsághʼə́ jîno záp,

ə́ mbóghʼ no gháp wo jwó yʉʼ, məfôu tû máp fâʼ, gháp ghwô jîno,

Ńjí ńgó gháp kə̂p gháp laŋə́-ndə̂u, ə́ ntsə́ʉ nzəm zʉ́; â ghʉ gháp shwítə po.»

41Esǎya lə laʼ yə́rə́, ńté no a lə zâʼ nzʉ̂ ńjwó ləghûʼ Yěso, ə́ mboŋə́ pə́ laʼ mwo məno ńté Yěso. 42Tə mbaa pə́ ghíʼ pə́ lə pə́ ngwâghʼ Yěso waghʼə́, pəcó pəkə̌m pəyúda pə̂ mbə̂i no yé, lə́ ə́ mbə̂i pə̂ ndwo lwǒ ə́ mbóghʼ no pəfalísia wo zǔŋ gháp ndə̂ cûʼtə. 43Ńté no gháp lə koŋ məkuʼ mi fû mbó pye-mə́soŋ, ə́ ndêi mi ə́ fû mbó Sê.

Ə tsâr Yěso ghʉ̌ fěʼ kôr pye-mə́soŋ

44Yěso lâʼ lə̂ təʉ ngô: «Ŋuu lə̌i mbə́i no zâa, mə́i káa a pə̂i yé pə̂ ndaʼ no zâa, a pə̂i no ŋuu yi a lə tə́u ghâa. 45Ŋuu yi a jwǒ ghâa, kə̌ njwó ŋuu yi a lə tə́u ghâa. 46Məŋ ndə tó cər nzʉ̂ ə́ mbə́ nkeʼ, ńjí ńgó ŋuu yi a pə̌i no zâa, kə̌ tə̂i yé cər nzə̌m po. 47Ŋuu lə̌i nzúʼ tsâr zâa ə́ ndə̌iʼ ghʉ̌ ghíʼ ə́ pə́ ntuŋú po, mə́i káa məŋ lə̂ ngwô lə̂ fêʼ kôr yé; ńté ńgó kâa n ndə tó lə̂ fêʼ kôr təcər Sê gháp pə pye-mə́soŋ, n ndə tô pə́ lə̂ ngʉ́ pye-mə́soŋ cwór. 48Ŋuu lə̌i ndə̂ʼ no zâa, ə́ nkə́ ndə̂ʼ lə̂ nzúʼ tsâr zâa, mə́i ngaŋ ghwo ŋuu yi a ghʉ̌ pə́ ndyəghʼ-nzəm leʼé, ə́ fěʼ kôr yé; wêi ŋuu pə̂ mətsâr mi n ndə jyéʼ yé měi, a lə̂ʼ lə̂ ŋə́i mə́u. 49Ńté no káa n ndə lâʼ no pə́ ndʉʉ məŋ, n ndə lâʼ pə̂ no yi Tə́ ghâa lə tə́u ghâa ńgó n ndâʼ ə́ mbou njyéʼ pye zěi. 50M mbôu mə́ njî ńgó no yi a lə tə́u ghâa ńgó n ndáʼ ə́ ghʉ pə́ ghwo ləcwôr tə me. Ə́ pə̂ yə́rə́, no yi n ndaʼ zěi pə̂ yi Tə́ ghâa lǎʼ ńgó məŋ ndáʼ.»

Currently Selected:

Jâŋ 12: NLA

Highlight

Copy